Garvita Odia
ନୂଆଦିଲ୍ଲୀ: ବେଙ୍ଗଲରେ ବିଜେପିର ଐତିହାସିକ ବିଜୟ ପରେ ବଡ଼ କଥା କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଏଠାରେ ବିଜେପି ପ୍ରଥମଥର ପାଇଁ ସରକାର ଗଠନ କରିବାକୁ ଯାଉଥିବାରୁ ଦଳୀୟ ମୁଖ୍ୟାଳୟରେ କର୍ମୀଙ୍କୁ ସମ୍ବୋଧନ କରିଛନ୍ତି ପ୍ରଧାନମନ୍ତ୍ରୀ ମୋଦି। ପାରମ୍ପରିକ ବେଙ୍ଗଲ ପୋଷାକ ପରିଧାନ କରି ମୁଖ୍ୟାଳୟକୁ ଆସିଥିବା ପ୍ରଧାନମନ୍ତ୍ରୀ କହିଛନ୍ତି, “ଜନ ସଂଘର ପ୍ରତିଷ୍ଠାତା ଶ୍ୟାମା ପ୍ରସାଦ ମୁଖାର୍ଜୀଙ୍କ ଆତ୍ମାକୁ ଆଜି ଶାନ୍ତି ମିଳିଛି। ଦେଶ ପାଇଁ ଜୀଇଁବା ଓ ମରିବାକୁ ସେ ସନ୍ଦେଶ ଦେଇଥିଲେ।
ରାଷ୍ଚ୍ର ସର୍ବପ୍ରଥମ ନାରାକୁ ଶ୍ୟାମା ପ୍ରସାଦ ମୁଖାର୍ଜୀ ପ୍ରାଥମିକତା ଦେଉଥିଲେ। ବେଙ୍ଗଲକୁ ନେଇ ସେ ଅନେକ ସ୍ୱପ୍ନ ଦେଖିଥିଲେ। ଏଥିପାଇଁ ଦୀର୍ଷ ବର୍ଷ ଅପେକ୍ଷା କରିବାକୁ ପଡ଼ିଲା। ବେଙ୍ଗଲରେ ଆଜିଠୁ ନୂଆ ଅଧ୍ୟାୟ ଯୋଡ଼ି ହେଲା। ଆଜିଠୁ ବେଙ୍ଗଲ ଭୟମୁକ୍ତ ଓ ବିକାଶର ଭରସାଯୁକ୍ତରେ ପରିଣତ ହେବ। ଆଜିର ଦିନ ଐତିହାସିକ। ବର୍ଷ ବର୍ଷର ପରିଶ୍ରମ ସଫଳ ହୋଇଛି। ପ୍ରତିଟି ବିଜେପି କର୍ମୀଙ୍କ ଖୁସିରେ ମୁଁ ସାମିଲ୍। ଆଜିର ଦିନ ଅନେକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ। ଗଣତନ୍ତ୍ର ଉପରେ ଲୋକଙ୍କ ଭରସା ଦର୍ଶାଉଛି। ଆଜି କେବଳ ଗଣତନ୍ତ୍ରର ବିଜୟ ହୋଇନି, ବରଂ ସମ୍ବିଧାନ ବି ଜିତିଛି। ପଶ୍ଚିମବଙ୍ଗରେ ୯୩ ପ୍ରତିଶତ ମତଦାନ ଐତିହାସିକ। ଏଥିରେ ବି ମହିଳାଙ୍କ ଭାଗିଦାରୀ ଅଧିକ।
ବିହାର ରେଜଲ୍ଟ ବେଳେ କହିଥିଲି ଗଙ୍ଗା ଏବେ ବଙ୍ଗକୁ ପ୍ରବାହିତ ହେବ। ଗଙ୍ଗୋତ୍ରୀରୁ ଗଙ୍ଗାସାଗର ସବୁଠି ପଦ୍ମ ଫୁଟିଲା। ଗଙ୍ଗା ଉପକୂଳରେ ଥିବା ସବୁ ରାଜ୍ୟରେ ପଦ୍ମ ଫୁଟିଲା। ମା’ ଗଙ୍ଗାଙ୍କ ଆଶୀର୍ବାଦ ନିଶ୍ଚୟ ଆମ ଉପରେ ରହିଛି। ଗଙ୍ଗା ସହ ବ୍ରହ୍ମପୁତ୍ରଙ୍କ ଆଶୀର୍ବାଦ ବି ମିଳିଛି। ଆସାମରେ ବିଜେପିକୁ ତୃତୀୟ ଥର ସମର୍ଥନ ମିଳିଛି। ବେଙ୍ଗଲରେ ନୂଆ ସୂର୍ୟ୍ୟର ଉଦୟ ହୋଇଛି। ବେଙ୍ଗଲର ବିକାଶ ହେବ।
ମୁଁ ପ୍ରତିଟି ରାଜ୍ୟବାସୀଙ୍କୁ ଏହାର ଆଶ୍ୱସନା ଦେଉଛି। ମହିଳାଙ୍କୁ ସୁରକ୍ଷାର ମାହୋଲ ମିଳିବ। ଯୁବକଙ୍କୁ ରୋଜଗାର ମିଳିବ, ପଳାୟନ ରୋକିବାକୁ ପଦକ୍ଷେପ ନିଆଯିବ। ପ୍ରଥମ କ୍ୟାବିନେଟରେ ଆୟୁଷ୍ମାନ ଭାରତ ଲାଗୁ କରିବୁ। ଅନୁପ୍ରବେଶକାରୀଙ୍କ ବିରୋଧରେ କଡ଼ା କାର୍ୟ୍ୟାନୁଷ୍ଠାନ ହେବ। ବେଙ୍ଗଲରେ ଭୟମୁକ୍ତ ବାତାବରଣ ମିଳିବ ଏହା ମୋଦିର ଗ୍ୟାରେଣ୍ଟି। ଏଥର ପଶ୍ଚିମବଙ୍ଗରେ ଶାନ୍ତିପୂର୍ଣ୍ଣ ମତଦାନ ହୋଇଛି। ପ୍ରଥମ ଥର ବେଙ୍ଗଲରେ ଭୟ ନୁହେଁ, ଗଣତନ୍ତ୍ର ଜିତିଲା। ପରିବର୍ତ୍ତନର ଏକ ନୂଆ ଯୁଗରେ ପ୍ରବେଶ କରିଛି ପଶ୍ଚିମବଙ୍ଗ। ଏଥର ପ୍ରତିଶୋଧ ନୁହେଁ, ପରିବର୍ତ୍ତନର ନାରା ଶୁଭିବ। ରାଜନୀତିରୁ ଊର୍ଦ୍ଧ୍ୱକୁ ଉଠି ବିକାଶ ପାଇଁ କାମ କରିବା।”
ନିଜ ଅଭିଭାଷଣ ବେଳେ ଓଡ଼ିଶାର ସମୃଦ୍ଧ ଇତିହାସକୁ ମନେ ପକାଇ ପ୍ରଶଂସା କଲେ ମୋଦି। ସେ କହିଛନ୍ତି, “ଅତୀତରେ ଅଙ୍ଗ, ବଙ୍ଗ, କଳିଙ୍ଗ ୩ଟି ଗୁରୁତ୍ୱପୂର୍ଣ୍ଣ ସ୍ତମ୍ଭ ଥିଲା। ପଶ୍ଚିମ ଏସିଆରେ କଳିଙ୍ଗ ସମୁଦ୍ର ପଥରେ ବାଣିଜ୍ୟ କରୁଥିଲା। ବିକଶିତ ଭାରତ ପାଇଁ ପୁଣି ଅଙ୍ଗ, ବଙ୍ଗ, କଳିଙ୍ଗ ମଜବୁତ ହେବା ଆବଶ୍ୟକ। ମୁଁ ଖୁସି ଅଙ୍ଗ, ବଙ୍ଗ ଓ କଳିଙ୍ଗରେ ବିଜେପି ସରକାର ଅଛି।”
ମହିଳା ସଂରକ୍ଷଣ ବିଲ୍କୁ ନେଇ ବିରୋଧୀଙ୍କୁ ଟାର୍ଗେଟ କରିବାକୁ ପଛାଇ ନାହାନ୍ତି ମୋଦି। ସେ କହିଛନ୍ତି, “ନାରୀ ଶକ୍ତି ଏବେ ଦ୍ରୁତ ଗତିରେ ଆଗକୁ ବଢୁଛି। କିନ୍ତୁ ବିରୋଧୀ ସଂସଦରେ ମହିଳା ସଂରକ୍ଷଣ ବିଲ୍କୁ ରୋକିଲେ। କଂଗ୍ରେସ ଓ ସହଯୋଗୀ ଦଳ ମା’ ଓ ଭଉଣୀଙ୍କୁ ଦଣ୍ଡ ଦେଇଛନ୍ତି। ଏହି ପାପକୁ ନାରୀମାନେ କେବେ ବି କ୍ଷମା କରିବେନି। ଲୋକମାନେ କଂଗ୍ରେସର ରାଜନୀତିକୁ ପ୍ରତ୍ୟାଖ୍ୟାନ କରିଛନ୍ତି।
ବାମପନ୍ଥୀ ବିଚାରଧାରା ପୂରା ଦେଶ ପ୍ରତ୍ୟାଖ୍ୟାନ କରିଛି। କିନ୍ତୁ କଂଗ୍ରେସ ବାମପନ୍ଥୀ ବିଚାରଧାରା ଆପଣାଉଛି। କଂଗ୍ରେସର ରାଜନୀତି ଯୋଡ଼ିବା ନୁହେଁ, ଭାଙ୍ଗିବା। ସଂପୂର୍ଣ୍ଣ ବିପରୀତ ଦିଗରେ ଗତି କରୁଛି କଂଗ୍ରେସ। କଂଗ୍ରେସ ଦେଶର ସମ୍ବେଦନ ଓ ସଂସ୍କୃତିକୁ ବୁଝିପାରୁନି। ଦଶନ୍ଧି ଧରି କଂଗ୍ରେସର ଅଧୋପତନ ଜାରି ରହିଛି। ବିଜେପି ପାଇଁ ଭାରତ ଓ ଭାରତୀୟତା ସବୁ କିଛି।”
