ଦୀଘା ଜଗନ୍ନଥ ମନ୍ଦିରରୁ ହଟିବ ଧାମ ଶବ୍ଦ, ଓଡିଶା ସରକାର ଆରମ୍ଭ କରିବେ ଉଦ୍ୟମ

ଭୁବନେଶ୍ବର: ପଶ୍ଚିମବଙ୍ଗରେ ବିଜେପି ସରକାର ଆସିବା ପରେ ଦୀଘା ଜଗନ୍ନଥ ମନ୍ଦିରରୁ ହଟିବ ଧାମ ଶବ୍ଦ। ସରକାର ଗଠନ ହେବା ପରେ ଓଡିଶା ସରକାର ଆରମ୍ଭ କରିବେ ଉଦ୍ୟମ। ଏନେଇ ସୂଚନା ଦେଇ କହିଛନ୍ତି ରାଜସ୍ବ ମନ୍ତ୍ରୀ ସୁରେଶ ପୂଜାରୀ। ସାରା ବିଶ୍ବରେ ହଜାର ହଜାର ଜଗନ୍ନାଥ ମନ୍ଦିର ଅଛି। କିନ୍ତୁ ସବୁ ଧାମ ନୁହେଁ। ଧାମ ଗୋଟିଏ । ଅନ୍ୟ ସବୁ ମନ୍ଦିର। ତେଣୁ ଦୀଘା ଧାମ କୁ ନେଇ ଯେଉଁ ଜଗନ୍ନାଥ ପ୍ରେମୀଙ୍କ ମନରେ ଆଘାତ ହୋଇଛି ତାକୁ ସମାହିତ କରିବାକୁ ସରକାର ଉଦ୍ୟମ ଆରମ୍ଭ କରିବେ। ସରକାର ଗଠନ ହେବା ପରେ ଏନେଇ ଉଦ୍ୟମ କରାଯିବ। ମମତା ଜଗନ୍ନାଥ ପ୍ରେମୀଙ୍କ ମନରେ ଆଘାତ ଦେଇଥିଲେ। ମହାପ୍ରଭୁଙ୍କ ବଙ୍ଗାଳୀ ଭକ୍ତଙ୍କୁ ପୁରୀ ଆସିବାକୁ ବାରଣ କରାଯାଇଥିଲା ତାର ଫଳ ସେ ଭୋଗିଛନ୍ତି ବୋଲି ରାଜସ୍ବମନ୍ତ୍ରୀ ସୁରେଶ ପୁଜାରୀ କହିଛନ୍ତି।

ଗତ ୨୦୨୫ରେ ଅକ୍ଷୟ ତୃତୀୟା ଦିନ ପଶ୍ଚିମବଙ୍ଗର ଦୀଘାରେ ପ୍ରତିଷ୍ଠା ହୋଇଥିଲା ଜଗନ୍ନାଥ ମନ୍ଦିର। ପୁରୀ ଶ୍ରୀମନ୍ଦିରର ଅବିକଳ ନକଲରେ ଗଢ଼ାହୋଇଛି ଦିଘା ଜଗନ୍ନାଥ ମନ୍ଦିର । ୨୦ଏକର ଜମିରେ ଓ ୨୫୦କୋଟି ବ୍ୟୟରେ ନିର୍ମାଣ ହୋଇଛି ମନ୍ଦିର । ୨୦୧୯ ମସିହାରୁ ମନ୍ଦିର ନିର୍ମାଣ କାମ ଆରମ୍ଭ ହୋଇଥିଲା। ମୁଖ୍ୟମନ୍ତ୍ରୀ ମମତା ବାନାର୍ଜୀ ଏହି ମନ୍ଦିରକୁ ‘ଜଗନ୍ନାଥ ଧାମ’ ବୋଲି କହିଥିଲେ। ହେଲେ ପୁରୀ ଗଜପତି ଏହାକୁ ଅସ୍ୱୀକାର କରିଥିଲେ ଏହାକୁ ନେଇ ବିବାଦ ଓ ଦେଖାଦେଇଥିଲା।
ଦୀଘା ଜଗନ୍ନାଥ ମନ୍ଦିରକୁ ଧାମ ନାମ ଦେବା ନେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ମଧ୍ୟ କଡ଼ା ପ୍ରତିକ୍ରିୟା ଦେଇଥିଲେ। ଏନେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ପଶ୍ଚିମବଙ୍ଗର ତତକାଳୀନ ମୁଖ୍ୟମନ୍ତ୍ରୀ ମମତା ବାନାର୍ଜୀକୁ ଚିଠି ଲେଖିଥିଲେ। ଆଦି ଗୁରୁ ଶଙ୍କରାଚାର୍ୟ୍ୟ ମଧ୍ୟ କହିଛନ୍ତି ଜଗନ୍ନାଥ ଧାମ ଆସ୍ଥା ବିଶ୍ୱାସ ସହିତ ଜଡ଼ିତ । କୌଣସି ବ୍ୟକ୍ତି କିମ୍ବା କୌଣସି ସରକାର ଧାମ କୁ ପରିବର୍ତ୍ତନ କରି ପାରିବେ ନାହିଁ। ମମତା ଅହଂକାରର ଚରମ ସୀମାରେ ଅଛନ୍ତି ଲୋକେ ତାର ଜବାବ ଦେବେ ବୋଲି କହିଥିଲେ ମୁଖ୍ୟମନ୍ତ୍ରୀ ମୋହନ ମାଝୀ।