ମେଟ୍ରୋ ପ୍ରକଳ୍ପ ପାଇଁ କୌଣସି ପ୍ରସ୍ତାବ ନାହିଁ

ଭୁବନେଶ୍ବର: କଟକ-ଭୁବନେଶ୍ବରରେ ଚାଲିବ ମେଟ୍ରୋ । ଏ ସ୍ବପ୍ନ ଅନେକ ଦିନ ଆଗରୁ ଦେଖି ଆସୁଛନ୍ତି ଟ୍ବିନସିଟିବାସୀ । ଆଉ ପୂର୍ବ ସରକାର ସମୟରେ ଏଥିପାଇଁ କାମ ମଧ୍ୟ ଆରମ୍ଭ ହେଲା । ହେଲେ ଏବେ ଏହି ମେଟ୍ରୋ ପ୍ରକଳ୍ପ ଅନିଶ୍ଚିତତା ଭିତରକୁ ଠେଲି ହୋଇଯାଇଛି । ଏମିତିକି କଟକ-ଭୁବନେଶ୍ବର ମେଟ୍ରୋ ପ୍ରକଳ୍ପ ପାଇଁ ରାଜ୍ୟ ସରକାରଙ୍କ ତରଫରୁ କେନ୍ଦ୍ର ସରକାରଙ୍କଚୁ କୌଣସି ପ୍ରସ୍ତାବ ଦିଆଯାଇନାହିଁ । ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟଙ୍କୁ ଚିଠି ଲେଖି ଜଣାଇଛନ୍ତି କେନ୍ଦ୍ର ଗୃହନିର୍ମାଣ ଓ ନଗର ଉନ୍ନୟନ ବ୍ୟାପାର ରାଷ୍ଟ୍ରମନ୍ତ୍ରୀ ତୋଖନ ସାହୁ । ରାଜ୍ୟସଭାରେ ଶୂନ୍ୟକାଳରେ ଏ ପ୍ରସଙ୍ଗ ଉଠାଇଥିଲେ ଦେବାଶିଷ ।
ଏବେ ଏହା ଉପରେ ସ୍ପଷ୍ଟୀକରଣ ରଖିଛନ୍ତି କେନ୍ଦ୍ର ଗୃହନିର୍ମାଣ ଓ ନଗର ଉନ୍ନୟନ ବ୍ୟାପାର ରାଷ୍ଟ୍ରମନ୍ତ୍ରୀ ଚିଠିରେ ଉଲ୍ଲେଖ କରିଛନ୍ତି ଯେ, ସହରାଞ୍ଚଳ ପରିବହନ ବ୍ୟବସ୍ଥା ଓ ମେଟ୍ରୋ ରେଳ ପ୍ରକଳ୍ପ ରାଜ୍ୟ ସରକାରଙ୍କ ଅଧୀନରେ ରହିଛି କିନ୍ତୁ ମେଟ୍ରୋ ରେଳ ପ୍ରକଳ୍ପ ବ୍ୟୟବହୁଳ ହୋଇଥିବାରୁ ସତର୍କତାର ସହ ଯୋଜନା କରିବାର ଆବଶ୍ୟକତା ରହିଛି ଟ୍ବିନସିଟି ଗମନାଗମନ ବ୍ୟବସ୍ଥାକୁ ଅଧିକ କ୍ରିୟାଶୀଳ କରିବା ପାଇଁ ବସ୍ ରାପିଡ୍ ଟ୍ରାଞ୍ଜିଟ୍ ସିଷ୍ଟମ ବା ବିଆରଟିଏସ ଅଧିକ ଉପଯୋଗୀ । ଏଥିରେ କମ ବ୍ୟୟ ଓ ମେଟ୍ରୋ ରେଳ ସେବା ଭଳି ସୁବିଧା ମିଳିଥାଏ । ଟ୍ରାଫିକ ବ୍ୟବସ୍ଥା ଓ ଅନ୍ୟ ପ୍ରସଙ୍ଗକୁ ଦୃଷ୍ଟିରେ ରଖି ପିଏମ୍ ଇ-ବସ୍ ସେବା ଯୋଜନାରେ କଟକ ଓ ଭୁବନେଶ୍ବର ପାଇଁ ୨୦୦ଟି ଇଭି ବସ୍ ଯୋଗାଇ ଦିଆଯାଉଛି । ସମାନ ଭାବେ କଟକ ପାଇଁ ୧୦୦ଟି ଓ ଭୁବନେଶ୍ବର ପାଇଁ ୧୦୦ଟି ବସ୍ ମଞ୍ଜୁର କରାଯାଇଛି । ଅନ୍ୟପଟେ ରାଜ୍ୟସଭାରେ ଦେବାଶିଷ ସାମନ୍ତରାୟ ଉଠାଇଥିବା ପ୍ରସଙ୍ଗକୁ ରାଜ୍ୟ ସରକାରଙ୍କ ଅବଗତି ପାଇଁ ପଠାଇ ଦିଆଯାଇଛି ବୋଲି ତୋଖନ ସାହୁ କହିଛନ୍ତି ।