ନିଲମ୍ବନ ହେଲେ କୋରେଇ ବିଇଓ

ଯାଜପୁର: ଯାଜପୁର ଜିଲ୍ଲା କୋରେଇ ମଣ୍ଡଳ ଶିକ୍ଷାଧିକାରୀଙ୍କ କାର୍ୟ୍ୟାଳୟରେ ସାଢ଼େ ୫ କୋଟିରୁ ଊର୍ଦ୍ଧ୍ବ ଟଙ୍କାର ଆର୍ଥିକ ଅନିୟମିତତା ମାମଲାରେ ବିଇଓ ସୁଦର୍ଶନ ମଲ୍ଲିକଙ୍କୁ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ନିଲମ୍ବନ କରାଯାଇଛି। ପରବର୍ତ୍ତୀ ନିର୍ଦ୍ଦେଶ ପର୍ୟ୍ୟନ୍ତ ତାଙ୍କୁ ଜିଲ୍ଲା ଶିକ୍ଷା ବିଭାଗ କାର୍ୟ୍ୟାଳୟରେ ଅବସ୍ଥାପିତ କରାଯାଇଛି ବୋଲି ଡିଇଓ ମହେଶ୍ବର ସାହୁ ସୂଚନା ଦେଇଛନ୍ତି। ପୂର୍ବରୁ ଏହି ଦୁର୍ନୀତିର ମାଷ୍ଟରମାଇଣ୍ଡ ପୂର୍ବତନ ପ୍ରଧାନଶିକ୍ଷକ ପ୍ରଦୀପ କୁମାର ମହାନ୍ତି, ତାଙ୍କ ପତ୍ନୀ ଗୀତରାଣୀ ଓ ପୁଅ ମାତୃପ୍ରସାଦଙ୍କ ସମେତ କୋରେଇ ବିଇଓ କାର୍ୟ୍ୟାଳୟର ପୂର୍ବତନ କନିଷ୍ଠ କିରାଣି ବିଷ୍ଣୁପ୍ରସାଦ ଦାସଙ୍କୁ ଭିଜିଲାନ୍ସ ଗିରଫ କରିଛି। ତେବେ ବିଇଓଙ୍କ ବିରୋଧରେ କାର୍ୟ୍ୟାନୁଷ୍ଠାନ ହୋଇନଥିଲା।

ସୂଚନାଯୋଗ୍ୟ, ୨୦୧୮ରୁ ୨୦୨୪ ମସିହା ପର୍ୟ୍ୟନ୍ତ କୋରେଇ ମଣ୍ଡଳ ଶିକ୍ଷା ଅଧିକାରୀଙ୍କ କାର୍ୟ୍ୟାଳୟରେ ୬ ବର୍ଷ ଧରି ୧୩ ଜଣ ଅବସରପ୍ରାପ୍ତ ଶିକ୍ଷକଙ୍କ ଆଇଡି ବ୍ୟବହାର କରି ସେମାନଙ୍କ ନାଁରେ ୫.୫୬ କୋଟିରୁ ଊର୍ଦ୍ଧ୍ବ ଟଙ୍କା ହଡ଼ପ କରାଯାଇଥିଲା। ଏହି ସମୟ ଭିତରେ ବର୍ତ୍ତମାନର ବିଇଓ ସୁଦର୍ଶନ ମଲ୍ଲିକଙ୍କୁ ମିଶାଇ ୪ ଜଣ ବିଇଓ କାର୍ୟ୍ୟରତ ଥିଲେ। କେତେଜଣ ଅସାଧୁ କର୍ମଚାରୀ ଅର୍ଥ ହଡ଼ପ କରିଚାଲିଥିଲେ ମଧ୍ୟ ବିଇଓମାନେ ନିରବଦ୍ରଷ୍ଟା ସାଜିବା ନେଇ ପ୍ରଶ୍ନ ଉଠିଥିଲା। ଏହି ମାମଲାରେ ବିଇଓ ସୁଦର୍ଶନ ମଲ୍ଲିକ, ପୂର୍ବତନ ୩ ଜଣ ବିଇଓଙ୍କ ସମେତ ୧୨ ଜଣଙ୍କ ନାଁରେ ଭିଜିଲାନ୍ସରେ ମାମଲା ହୋଇଛି। ଗିରଫ ହୋଇଥିବା କର୍ମଚାରୀଙ୍କୁ ଚାକିରିରୁ ନିଲମ୍ବନକରାଯାଇଥିବାବେଳେ ଅଭିଯୁକ୍ତ ଅବସରପ୍ରାପ୍ତ କର୍ମଚାରୀ ପ୍ରଦୀପ କୁମାର ମହାନ୍ତିଙ୍କ ପେନ୍‌ସନ୍‌ ବନ୍ଦ କରାଯାଇଛି। ବିଇଓ ସୁଦର୍ଶନ ମଲ୍ଲିକଙ୍କ ବିରୋଧରେ ଶୃଙ୍ଖଳାଗତ କାର୍ୟ୍ୟାନୁଷ୍ଠାନ ଗ୍ରହଣ କରିବାକୁ ବିଦ୍ୟାଳୟ ଓ ଗଣଶିକ୍ଷା ବିଭାଗକୁ ଲିଖିତ ଭାବେ ଅବଗତ କରାଯାଇଛି। ଏଥିସହିତ ପୂର୍ବତନ ବିଇଓଙ୍କ ବାବଦରେ ମଧ୍ୟ ବିଭାଗକୁ ଚିଠି ଲେଖାଯାଇଛି ବୋଲି ଡିଇଓ ମହେଶ୍ବର ସାହୁ କହିଛନ୍ତି।