Garvita Odia
ରିୟାଦ/ୱାଶିଂଟନ : ଆମେରିକା ଓ ଇରାନ ମଧ୍ୟରେ ଲାଗି ରହିଥିବା ଉତ୍ତେଜନା ଏବେ ବି ଥମିନାହିଁ । ଏଭଳି ସମୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଆଉ ଏକ ଶକ୍ତ ଝଟ୍କା ଲାଗିଛି । ରିପୋର୍ଟ ଅନୁସାରେ ଟ୍ରମ୍ପ ପ୍ରଶାସନ ହୋର୍ମୁଜ ପ୍ରଣାଳୀରେ ଫସିଥିବା ଜାହାଜ ଓ ଟ୍ୟାଙ୍କରକୁ ସୁରକ୍ଷିତ ଭାବେ ବାଟ କଢ଼ାଇ ନେବା ଲାଗି ଆରମ୍ଭ କରିଥିଲା ଅପରେସନ ପ୍ରୋଜେକ୍ଟ ଫ୍ରିଡମ । କିନ୍ତୁ ଏହାକୁ ବର୍ତ୍ତମାନ ରୋକିଦିଆଯାଇଛି । ସାଉଦି ଆରବ ଆମେରିକା ବିମାନକୁ ନିଜର ବାୟୁସୀମା କିମ୍ବା ବିମାନଘାଟି ବ୍ୟବହାର କରିବା ଲାଗି ଅନୁମତି ଦେବାକୁ ମନା କରିଦେବା ପରେ ଟ୍ରମ୍ପ ପ୍ରଶାସନ ଏଭଳି ପଦକ୍ଷେପ ନେଇଛି ।
ଏନ୍ବିସି ନ୍ୟୁଜ ରିପୋର୍ଟ ଅନୁସାରେ ଆମେରିକାର ଯୋଜନା ଥିଲା କି ଏହାର ନୌସେନା ହୋର୍ମୁଜରେ ଫସିଥିବା ଜାହାଜ ଓ ଟ୍ୟାଙ୍କରକୁ ସୁରକ୍ଷା ପ୍ରଦାନ କରିବ । ଏଥିପାଇଁ ଆମେରିକାର ବିମାନ ସାଉଦି ଆରବର ରାଜଧାନୀ ରିୟାଦର ଦକ୍ଷିଣ-ପୂର୍ବରେ ଥିବା ପ୍ରିନ୍ସ ସୁଲତାନ ବିମାନଘାଟିକୁ ବ୍ୟବହାର କରିଥାନ୍ତା । କିନ୍ତୁ ସାଉଦି ଆରବ ଆମେରିକାର ଏହି ପ୍ରସ୍ତାବକୁ ଗ୍ରହଣ କରିବାକୁ ମନାକରିଦେଇଛି । ରାଷ୍ଟ୍ରପତି ଟ୍ରମ୍ପ ଏହି ପ୍ରସଙ୍ଗରେ ସାଉଦିର ଯୁବରାଜ ମହମ୍ମଦ ବିନ ସଲମାନଙ୍କ ସହିତ ଟେଲିଫୋନ୍ ଯୋଗେ କଥାବାର୍ତ୍ତା କରିଥିଲେ । କିନ୍ତୁ ବିମାନଘାଟି ବ୍ୟବହାରକୁ ନେଇ ସହମତି ହୋଇପାରି ନଥିଲା ।
ସେପଟେ ସାଉଦି ସୂତ୍ରରୁ କୁହାଯାଇଛି ଯେ ବର୍ତ୍ତମାନ ମଧ୍ୟପ୍ରାଚ୍ୟ ସ୍ଥିତିରେ ପରିବର୍ତ୍ତନ ଆସିଛି । ପାକିସ୍ତାନ ପକ୍ଷରୁ ଆମେରିକା ଓ ଇରାନ ମଧ୍ୟରେ ଯୁଦ୍ଧ ବନ୍ଦ କରିବା ଲାଗି ଚାଲିଥିବା କୂଟନୈତିକ ପ୍ରୟାସକୁ ସାଉଦି ଦୃଢ଼ ସମର୍ଥନ କରେ । ଆମେରିକା ପକ୍ଷରୁ ଗତ ୪ ତାରିଖରେ ପ୍ରୋଜେକ୍ଟ ଫ୍ରିଡମ ଆରମ୍ଭ କରାଯାଇଥିଲା । କିନ୍ତୁ ୨ ଦିନ ଭିତରେ ମାତ୍ର ୩ଟି ଜାହାଜକୁ ଜଳମାର୍ଗରେ ପାର୍ କରାଇଛି ଆମେରିକା । ତେବେ ପ୍ରୋଜେକ୍ଟ ଫ୍ରିଡମ ରୋକାଯିବା ଘଟଣାରେ ପାକିସ୍ତାନର ଭୂମିକା ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି । କାରଣ ଟ୍ରମ୍ପ ନିଜେ ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ ସୋସିଆଲରେ ଲେଖିଛନ୍ତି ଯେ ପାକିସ୍ତାନ ଓ ଅନ୍ୟ କେତେକ ଦେଶର ଅନୁରୋଧକ୍ରମେ ପ୍ରୋଜେକ୍ଟ ଫ୍ରିଡମକୁ ଅସ୍ଥାୟୀ ଭାବେ ବନ୍ଦ କରାଯାଇଛି । ଯାହାଫଳରେ ଆମେରିକା ଓ ଇରାନ ମଧ୍ୟରେ ହେବାକୁ ଥିବା ଶାନ୍ତି ବୁଝାମଣାକୁ ଚୂଡାନ୍ତ ରୂପରେଖ ଦିଆଯାଇପାରିବ । କିନ୍ତୁ ଦାବି କରାଯାଉଛି କି ପାକିସ୍ତାନର ଅନୁରୋଧ ନୁହେଁ, ବରଂ ସାଉଦି ଆରବର କଠୋର ଆଭିମୁଖ୍ୟ ଯୋଗୁ ଏହି ଅଭିଯାନ ବନ୍ଦ ରହିଛି ।
