ରି-ନିଟ୍ : ସତର୍କତା ଏବଂ ସୁରକ୍ଷା ସହ କୌଣସି ବୁଝାମଣା ନାହିଁ- ଧର୍ମେନ୍ଦ୍ର ପ୍ରଧାନ

୧୯ /୦୫/୨୦୨୬: ଜୁନ୍ ୨୧ ରେ ପୁର୍ନବାର ହେବାକୁ ଥିବା ନିଟ୍ ପରୀକ୍ଷାର ପ୍ରସ୍ତୁତି ନିମନ୍ତେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏକ ଉଚ୍ଚସ୍ତରୀୟ ସମୀକ୍ଷା ବୈଠକରେ ଅଧ୍ୟକ୍ଷତା କରି ପରୀକ୍ଷା ସମୟରେ କଠୋର ସୁରକ୍ଷା ପ୍ରୋଟୋକଲ୍ ଏବଂ ସ୍ୱଚ୍ଛତା ସୁନିଶ୍ଚିତ କରିବାକୁ ନିର୍ଦ୍ଦେଶ ଦେଇଛନ୍ତି। ଏହି ବୈଠକ ଅବସରରେ ପରୀକ୍ଷା ଆୟୋଜନରେ ସମ୍ପୂର୍ଣ୍ଣ ନିଷ୍ଠା ଓ ସ୍ୱଚ୍ଛତାର ଅନୁପାଳନ ଉପରେ ଜୋର୍ ଦେଇ ଧର୍ମେନ୍ଦ୍ର ପ୍ରଧାନ ନିର୍ଦ୍ଦେଶ ଦେଇଛନ୍ତି ଯେ, ପୂର୍ବ ପରୀକ୍ଷା ପ୍ରକ୍ରିୟାରେ ଚିହ୍ନଟ ହୋଇଥିବା ସମସ୍ତ ତ୍ରୁଟିକୁ ସମ୍ପୂର୍ଣ୍ଣ ରୂପେ ଦୂର କରି କଠୋର ସୁରକ୍ଷା ପ୍ରୋଟୋକଲ୍ ଅଧୀନରେ ସୁରକ୍ଷିତ, ସୁଚାରୁ ଏବଂ ତ୍ରୁଟିଶୂନ୍ୟ ଭାବରେ ପୁର୍ନବାର ନିଟ୍ ପରୀକ୍ଷା କରାଯିବା ଉଚିତ୍। ପରୀକ୍ଷା ବ୍ୟବସ୍ଥାର ଦୃଢ଼ ନିରୀକ୍ଷଣ ଏବଂ ପ୍ରଭାବଶାଳୀ କାର୍ୟ୍ୟାନ୍ୱୟନ ସୁନିଶ୍ଚିତ କରିବା ପାଇଁ, ସମସ୍ତ ରାଜ୍ୟର ଜିଲ୍ଲା ମାଜିଷ୍ଟ୍ରେଟ୍ ଏବଂ ପୋଲିସ ସୁପରିଣ୍ଟେଣ୍ଡେଣ୍ଟମାନଙ୍କ ସହ ସମନ୍ୱୟ ବୈଠକ ଆୟୋଜନ କରିବାକୁ ମଧ୍ୟ ନିର୍ଦ୍ଦେଶ ଜାରି କରାଯାଇଛି।