କେରଳରେ ମୌସୁମୀ ବର୍ଷା: ୨୪ ଘଣ୍ଟା ପାଇଁ ‘ରେଡ ଆଲର୍ଟ’ ଜାରି

ନୂଆଦିଲ୍ଲୀ: ପ୍ରାୟ ତିନି ଦିନ ବିଳମ୍ବ ପରେ, ଶନିବାର ମୌସୁମୀ ବାୟୁ ଗତି ବୃଦ୍ଧି ପାଇଛି ଏବଂ ଏହା ଗୋଆରେ ପହଞ୍ଚିଛି। କେରଳରେ ଆଗାମୀ ୨୪ ଘଣ୍ଟା ପାଇଁ ବର୍ଷାକୁ ନେଇ ‘ରେଡ ଆଲର୍ଟ’ ଜାରି କରାଯାଇଛି। ୱାୟାନାଡ ଏବଂ କାସରଗୋଡର ସ୍କୁଲଗୁଡ଼ିକ ଆଜି ବନ୍ଦ ରହିବ। ପାଣିପାଗ ବିଭାଗ ଅନୁଯାୟୀ, ଆଗାମୀ ତିନି ଦିନ ମଧ୍ୟରେ ମୌସୁମୀ ଆସାମ, ମେଘାଳୟ, ତ୍ରିପୁରା, ମଣିପୁର, ନାଗାଲାଣ୍ଡ, ଅରୁଣାଚଳ ପ୍ରଦେଶ ଏବଂ ବଙ୍ଗଳାର କିଛି ଅଂଶରେ ପହଞ୍ଚିପାରେ। ପରବର୍ତ୍ତୀ ସମୟରେ, ଏହା ୧୦ ଦିନ ମଧ୍ୟରେ ବିହାର, ଝାଡ଼ଖଣ୍ଡ ଏବଂ ଓଡ଼ିଶାରେ ପହଞ୍ଚିପାରେ। ଗୁଜୁରାଟ ବ୍ୟତୀତ ସମସ୍ତ ରାଜ୍ୟରେ ପ୍ରାକ ମୌସୁମୀ କାର୍ଯ୍ୟକଳାପ ଚାଲିଛି। ରାଜସ୍ଥାନ, ମଧ୍ୟ ପ୍ରଦେଶ, ଉତ୍ତର ପ୍ରଦେଶ, ଦିଲ୍ଲୀ, ପଞ୍ଜାବ, ହରିୟାଣା ଏବଂ ଜମ୍ମୁ ଓ କଶ୍ମୀରରେ ବର୍ଷା ହେଉଛି, ଯେଉଁଠାରେ ‘ଅରେଞ୍ଜ ଆଲର୍ଟ’ ଜାରି କରାଯାଇଛି।ଆଇଏମଡି ଅନୁଯାୟୀ, ଜୁନ ଶେଷ ସପ୍ତାହ ସୁଦ୍ଧା ମୌସୁମୀ ଦିଲ୍ଲୀ, ନୋଏଡା, ଗୁରୁଗ୍ରାମ ଏବଂ ଗାଜିଆବାଦରେ ପହଞ୍ଚିପାରେ। ଏହି ସମୟ ମଧ୍ୟରେ, ଏହା ହରିୟାଣା, ପଞ୍ଜାବ ଏବଂ ଚଣ୍ଡିଗଡ଼ର କିଛି ଅଂଶକୁ ମଧ୍ୟ ଆଗକୁ ବଢ଼ିପାରେ। ପାଣିପାଗ ବିଭାଗ ପୂର୍ବାନୁମାନ କରିଛି ଯେ ହିମାଚଳ ପ୍ରଦେଶ, ଜମ୍ମୁ ଓ କଶ୍ମୀର ଏବଂ ଲଦାଖର କିଛି ଅଞ୍ଚଳରେ ପ୍ରାୟ ସମାନ ସମୟରେ ବର୍ଷା କାର୍ଯ୍ୟକଳାପ ପରିଲକ୍ଷିତ ହୋଇପାରେ।
ଶୁକ୍ରବାର ରାତିରେ କେରଳରେ ପ୍ରବଳ ବର୍ଷା ଯୋଗୁ ପାଣି ଜମି ରହିବା ସହିତ ଅନେକ ଅଞ୍ଚଳରେ ଗଛ ଉପୁଡ଼ି ପଡ଼ିଛି। ବର୍ଷା ସହିତ ସମ୍ଭାବ୍ୟ ଝଡ଼ ଆସିବା ନେଇ ସତର୍କ କରାଇ ଆଇଏମଡି କେରଳର ଆଠଟି ଜିଲା ପାଇଁ ‘ଅରେଞ୍ଜ ଆଲର୍ଟ’ ଜାରି କରିଛି।