ଇରାନ ଅଶୋଧିତ ତୈଳ ଉପରୁ ସାମୟିକ ପ୍ରତିବନ୍ଧକ ହଟାଇଲା ଆମେରିକା

ୱାଶିଂଟନ : ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରଶାସନ ବଡ଼ ନିଷ୍ପତ୍ତି କ୍ରମେ ଇରାନ ଦ୍ବାରା ଉତ୍ପାଦିତ ଅଶୋଧିତ ତୈଳ ଏବଂ ପେଟ୍ରୋକେମିକାଲ୍ସ ଉପରୁ ସାମୟିକ ଭାବେ ପ୍ରତିବନ୍ଧକ ହଟାଇ ଦିଆଯାଇଛି। ଆମେରିକାର ଅର୍ଥ ମନ୍ତ୍ରଣାଳୟ ପକ୍ଷରୁ ଜାରି ନିର୍ଦେଶ ଅନୁଯାୟୀ ଆସନ୍ତା ଅଗଷ୍ଟ ୨୧ ତାରିଖ ପର୍ଯ୍ୟନ୍ତ (୬୦ ଦିନ ପାଇଁ) ପ୍ରତିବନ୍ଧକ ହଟାଯାଇଛି। ଆମେରିକା ଓ ଇରାନ ମଧ୍ୟରେ ଚାଲିଥିବା ଶାନ୍ତି ଆଲୋଚନାର ଏହା ଏକ ଅଂଶବିଶେଷ। ଆମେରିକାର ଏହି ନିଷ୍ପତ୍ତି ଭାରତ ପାଇଁ ଲାଭଦାୟକ ହେବାକୁ ଯାଉଛି। ଆମେରିକାର ନିଷ୍ପତ୍ତି ପରେ ଆନ୍ତର୍ଜାତିକ ବଜାରରେ ଅଶୋଧିତ ତୈଳର ମୂଲ୍ୟ ପ୍ରାୟ ୩ ପ୍ରତିଶତ କମିଯାଇ ବାରେଲ ପିଛା ୭୭ ଡଲାର ପାଖାପାଖି ପହଞ୍ଚିଛି। ପ୍ରତିବନ୍ଧକ ହଟିବା ପରେ ଭାରତୀୟ ରିଫାଇନାରୀ (ତେଲ ବିଶୋଧନାଗାର) ଗୁଡ଼ିକ ଏବେ ପୁଣି ଥରେ
ଇରାନରୁ ସେମାନଙ୍କ ଆବଶ୍ୟକତା ଅନୁଯାୟୀ ସହଜରେ ଅଶୋଧିତ ତେଲ କିଣିପାରିବେ। ଇରାନ ସାଧାରଣତଃ ଅନ୍ୟ ଦେଶ ତୁଳନାରେ ଅଧିକ ଦିନର କ୍ରେଡିଟ୍ ଅବଧି (୬୦-୯୦ ଦିନ) ଦେଇଥାଏ, ଯାହା ଭାରତୀୟ କମ୍ପାନୀଗୁଡ଼ିକ ପାଇଁ ଲାଭଦାୟକ। ଆମେରିକା ଏହି ୱେଭର (ଛାଡ଼) ଜରିଆରେ ଇରାନ ସହ ତେଲ କାରବାର ପାଇଁ ଆମେରିକୀୟ ଡଲାର ବ୍ୟବହାର କରିବାକୁ ଅନୁମତି ଦେଇଛି। ଏହାଦ୍ୱାରା ଭାରତୀୟ ବ୍ୟାଙ୍କ ଏବଂ କମ୍ପାନୀଗୁଡ଼ିକ ବିନା କୌଣସି ପ୍ରତିବନ୍ଧକ ଭୟରେ ସିଧାସଳଖ ଅର୍ଥ ପୈଠ କରିପାରିବେ। ଭାରତ ଏବଂ ଇରାନ ମଧ୍ୟରେ ଭୌଗୋଳିକ ଦୂରତା କମ୍ ଥିବାରୁ ତେଲ ଆମଦାନୀର ପରିବହନ ଖର୍ଚ୍ଚ ଯଥେଷ୍ଟ କମ୍ ରହିବ। ବିଶ୍ୱ ବଜାରରେ ତେଲ ଦର କମିଲେ ଭାରତରେ ପେଟ୍ରୋଲ ଏବଂ ଡିଜେଲ ଦର ନିୟନ୍ତ୍ରଣରେ ରହିବ, ଯାହା ମୁଦ୍ରାସ୍ଫୀତିକୁ କମାଇବାରେ ସାହାଯ୍ୟ କରିବ। ସ୍ୱିଜରଲ୍ୟାଣ୍ଡରେ ଆମେରିକା ଏବଂ ଇରାନ ମଧ୍ୟରେ ଚାଲିଥିବା ଆଲୋଚନା ପରେ ଏହି ସହମତି ପ୍ରକାଶ ପାଇଛି।