୪ରେ ଆସିପାରନ୍ତି ଅମିତ୍‌ ଶାହା

ଭୁବନେଶ୍ୱର: ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଆସନ୍ତା ୪ ତାରିଖରେ ଓଡ଼ିଶା ଗସ୍ତରେ ଆସିପାରନ୍ତି। ଶାହାଙ୍କ ରାଜ୍ୟ ଗସ୍ତ ନେଇ ପ୍ରସ୍ତାବନା ରହିଛି। ମାତ୍ର କେଉଁ କାର୍ଯ୍ୟକ୍ରମରେ ଯୋଗଦେବା ଲାଗି ସେ ଓଡ଼ିଶା ଆସୁଛନ୍ତି ସେ ବାବଦରେ କିଛି ସ୍ପଷ୍ଟ ହୋଇ ନ ଥିବା ରାଜସ୍ବ ମନ୍ତ୍ରୀ ସୁରେଶ ପୂଜାରୀ କହିଛନ୍ତି। ମଙ୍ଗଳବାର ମନ୍ତ୍ରୀ ପୂଜାରୀ ତାଙ୍କ କାର୍ଯ୍ୟାଳୟରେ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି, ସୋମବାର ଶାହା ଆସିବେ ବୋଲି ସ୍ପଷ୍ଟ ହେଇଛି। ମାତ୍ର କେଉଁସବୁ କାରଣ ଲାଗି ସେ ଆସୁଛନ୍ତି ସେକଥା ସ୍ପଷ୍ଟହୋଇ ନାହିଁ, ଯଥାଶୀଘ୍ର ଏହା ଜଣାପଡିଯିବ ବୋଲି ପୂଜାରୀ କହିଛନ୍ତି। ମାତ୍ର ଶାହାଙ୍କ ଗସ୍ତ ବାବଦରେ ଭାଜପାର ଅନେକ ଦଳୀୟ ନେତାଙ୍କ ପାଖରେ କୌଣସି ଖବର ନାହିଁ। ଯେଉଁ କେତେଜଣ ଆଗଧାଡ଼ିର ଭାଜପା ନେତାଙ୍କୁ ଶାହାଙ୍କ ଗସ୍ତ ସମ୍ପର୍କରେ ପଚାରିଥିଲୁ ସେମାନେ କେହି ଏ ବାବଦରେ କିଛି ସୂଚନା ପାଇନାହାନ୍ତି ବୋଲି କହିଥିଲେ। ଏହାପରେ ଅନ୍ୟ କେତେଜଣ ସରକାରୀ ଅଧିକାରୀଙ୍କୁ ପଚାରିବାରୁ ମଧ୍ୟ ସେମାନେ କିଛି ସୂଚନା ଦେଇପାରିନାହାନ୍ତି। ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ମଧ୍ୟ ଶାହା ଆସୁଛନ୍ତି ବୋଲି ଖବର ଅଛି, ଯାହା ଚୂଡ଼ାନ୍ତ ନୁହେଁ ବୋଲି ଜଣାପଡ଼ିଛି। ଏନେଇ କୌଣସି କାଗଜପତ୍ର ଆସି ନ ଥିବା ଜଣେ ଉପସଚିବଙ୍କ ସୂତ୍ରରୁ ଜଣାପଡିଛି। ଏଠାରେ ଉଲ୍ଲେଖଯୋଗ୍ୟ, ବିଗତ ଦିନରେ ଶାହା ଓଡ଼ିଶା ଗସ୍ତରେ ଆସୁଛନ୍ତି ବୋଲି ବାରମ୍ବାର ବିଭିନ୍ନ ତାରିଖ ପ୍ରକାଶ କରାଯାଇଛି। ହେଲେ ଏହିପରି ଅନେକ ଖବର ପ୍ରକାଶ ପାଇବା ପରେ ଶାହାଙ୍କ ଗସ୍ତ ବାତିଲ ହୋଇଥିବା କୁହାଯାଇଛି।