Garvita Odia
ଦେବଗଡ଼:ଦେବଗଡ଼ ଡିଷ୍ଟ୍ରିକ୍ଟ କଣ୍ଟ୍ରାକ୍ଟର୍ସ ୟୁନିଅନର ଏକ ପ୍ରତିନିଧି ମଣ୍ଡଳୀ ଆଜି ରେଙ୍ଗାଳବେଡ଼ା ସ୍ଥିତ ଗୋହିରା ଜଳସେଚନ ବିଭାଗର ଅଧୀକ୍ଷଣ ଯନ୍ତ୍ରୀଙ୍କୁ ଭେଟି ଏକ ସ୍ମାରକପତ୍ର ପ୍ରଦାନ କରିଛନ୍ତି।ଟେଣ୍ଡର ପ୍ରକ୍ରିୟାରେ କେତେକ ବିଡ଼ର ନିୟମ ଉଲ୍ଲଂଘନ କରିଥିବାରୁ ଏହାର ତୁରନ୍ତ ସମୀକ୍ଷା କରିବାକୁ ସଂଘ ପକ୍ଷରୁ ଦାବି କରାଯାଇଛି।ନିଖିଳ ଓଡ଼ିଶା ଠିକାଦାର ମହାସଂଘ ଅଧୀନରେ ଥିବା ସମସ୍ତ ଜିଲ୍ଲା ସଂଘ ମିଳିତ ଭାବେ ଏକ ସଂକଳ୍ପ ପାରିତ କରିଥିଲେ।ଏହି ନିଷ୍ପତ୍ତି ଅନୁଯାୟୀ,୧୦ କୋଟି ଟଙ୍କା ପର୍ଯ୍ୟନ୍ତ ସମସ୍ତ ଟେଣ୍ଡର କେବଳ ସ୍ଥାନୀୟ ଠିକାଦାରଙ୍କ ପାଇଁ ସଂରକ୍ଷିତ ରହିବ ଏବଂ ଏହା ସରକାରୀ ନିର୍ଦ୍ଧାରିତ ମୂଲ୍ୟ ଅନୁସାରେ କରାଯିବ।ମାତ୍ର କେତେକ ବାହାର ବିଡ଼ର ଏହି ନିୟମକୁ ଅବମାନନା କରି ୧୦ କୋଟିରୁ କମ୍ ମୂଲ୍ୟର ଟେଣ୍ଡରରେ ଭାଗ ନେଇଛନ୍ତି। ଯାହା ସ୍ଥାନୀୟ ଠିକାଦାରଙ୍କ ଜୀବିକାକୁ ପ୍ରଭାବିତ କରୁଛି।ଏହା ସହିତ ଉକ୍ତ ବିଡ଼ରମାନେ ଅତି ଅଯୌକ୍ତିକ ଭାବେ ଅଳ୍ପ ମୂଲ୍ୟ କୋଟ୍ କରିଛନ୍ତି।ଏହାଦ୍ୱାରା ଦେବଗଡ଼ ଜିଲ୍ଲାରେ ହେବାକୁ ଥିବା ବିକାଶମୂଳକ କାର୍ଯ୍ୟର ଗୁଣବତ୍ତା ଏବଂ ସ୍ଥାୟୀତ୍ୱ ବିପନ୍ନ ହେବ ବୋଲି ସଂଘ ଆଶଙ୍କା ପ୍ରକାଶ କରିଛି। କଣ୍ଟ୍ରାକ୍ଟର୍ସ ୟୁନିଅନର ସମସ୍ତ ଅଭିଯୋଗକୁ ଶୁଣିବା ପରେ ଅଧୀକ୍ଷଣ ଯନ୍ତ୍ରୀ ଏହାର ସଠିକ୍ ସମୀକ୍ଷା କରିବା ସହ ଉପଯୁକ୍ତ ପଦକ୍ଷେପ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି।
