ମହାପ୍ରଭୁ ଟାହିଆ ନଥିବା ଶୂନ୍ୟ ମସ୍ତକରେ ରଥାରୂଢ଼

ପୁରୀ: ଆନନ୍ଦ ବଜାର ଗୁମୁଟରୁ ଚୁଙ୍କିଲେନି ମହାପ୍ରଭୁ । ସେବାୟତମାନେ ଯେତେ ବଳ ଲଗାଇ ମହାପ୍ରଭୁ ଶ୍ରୀଜଗନ୍ନାଥଙ୍କୁ ଧାଡ଼ି ପହଣ୍ଡିରେ ଆଗକୁ ଆଣିବା ନିମନ୍ତେ ଚେଷ୍ଟା କରିଥିଲେ ସବୁ ଫେଲ୍ ମାରିଥିଲା । ବହୁବଳୀମାନଙ୍କ ପତିଆରା ଚୁନା ହୋଇଗଲା । ୪୦ ମିନିଟ୍ ଧରି ମହାପ୍ରଭୁ ବାଇଶି ପାହାଚକୁ ସଂଯୋଗ କରୁଥିବା ଆନନ୍ଦ ବଜାର ଗୁମୁଟ ଭିତରେ ଅଟକି ଯାଇଥିଲେ । ସ୍ଥିତି ଏପରି ହୋଇଥିଲା ଯେ ମହାପ୍ରଭୁଙ୍କୁ ପହଣ୍ଡି କରୁଥିବା ସେବାୟତମାନେ ମହାପ୍ରଭୁଙ୍କ ଭାର ବି ସହିପାରିନଥିଲେ । ମହାପ୍ରଭୁ ଆନନ୍ଦ ବଜାର ଗୁମୁଟ ଲୁହା ଗ୍ରୀଲ୍ ଉପରକୁ ଢଳି ପଡ଼ିଥିଲେ । ଗ୍ରୀଲ୍ ଉପରେ ମହାପ୍ରଭୁ ଢଳି ପଡ଼ିବାରୁ ତାଙ୍କ ମଥାରେ ଝଟକୁ ଥିବା ସୁଦୃଶ୍ୟ ଟାହିଆ ଗ୍ରୀଲ୍ ସହ ମାଡ଼ ହୋଇ ନଷ୍ଟ ହୋଇଯାଇଥିଲା । ଗୁରୁବାର ଶ୍ରୀଗୁଣ୍ଡିଚାରେ ଏହି ଅଘଟଣ ସମସ୍ତଙ୍କୁ ଚକିତ କରିଥିଲା ।
ମହାପ୍ରଭୁଙ୍କୁ ରୁଷ୍ଟ ଦେଖି ପହଣ୍ଡି କରୁଥିବା ସେବାୟତମାନେ ତାଙ୍କ ଶରଣ ପଶିଥିଲେ । ସବୁ ଭୁଲ କ୍ଷମା କରି ମହାପ୍ରଭୁ ରଥାରୂଢ଼ ହୁଅନ୍ତୁ ବୋଲି ନିବେଦନ କରିଥିଲେ । ପରେ ମହାପ୍ରଭୁ ରୋଷ ଭୁଲି ଆଗକୁ ବଢ଼ିଥିଲେ। ହେଲେ ସେବାୟତମାନେ ମହାପ୍ରଭୁଙ୍କୁ ବାଇଶିପାହାଚ ଦେଇ ସିଂହଦ୍ୱାର ଗୁମୁଟରେ ପହଣ୍ଡି କରାଇ ପହଞ୍ଚିବା ବେଳକୁ ପ୍ରାୟ ଘଣ୍ଟାଏ ଲାଗିଥିଲା । ମହାପ୍ରଭୁ ବାରମ୍ବାର ବାମ ପାଶ୍ୱର୍କୁ ଢଳି ପଡ଼ିଥିଲେ ।
ସିଂହଦ୍ୱାର ପାର୍ ହେବା ପରେ ମହାପ୍ରଭୁଙ୍କ ଗତି ବଢ଼ିଥିଲା । ମହାପ୍ରଭୁ ଶୀଘ୍ର ପହଣ୍ଡି ହୋଇ ରଥ ଚଢ଼ିଥିଲେ । ହେଲେ ମହାପ୍ରଭୁଙ୍କ ରୁନ୍ଧା କାର୍ଯ୍ୟ ସମାପନରେ ଖୁବ୍ ଅଧିକ ସମୟ ଲାଗିଥିଲା । ସିଂହଦ୍ୱାର ଦେଇ ମହାପ୍ରଭୁ ବଡ଼ଦାଣ୍ଡରେ ପହଞ୍ଚିବା ବେଳକୁ ମହାପ୍ରଭୁଙ୍କ ମୁଣ୍ଡରେ ଟାହିଆ କାହିଁକି ନାହିଁ ଓ ଏହା କୁଆଡ଼େ ଗଲା ତାହାକୁ ନେଇ ଚହଳ ପଡ଼ି ଯାଇଥିଲା । ପରେ ପ୍ରକୃତ କାରଣ ଜଣାପଡ଼ିଥିଲା । ଆନନ୍ଦ ବଜାର ଗୁମୁଟଠାରେ ମହାପ୍ରଭୁଙ୍କ ଟାହିଆ ଭାଙ୍ଗି ଯିବା ପରେ ସେବାୟତମାନେ ଏହାକୁ କାଢ଼ି ଦେଇଥିଲେ । ଫଳରେ ମହାପ୍ରଭୁ ଟାହିଆ ନଥିବା ଶୂନ୍ୟ ମସ୍ତକରେ ରଥାରୂଢ଼ ହୋଇଥିଲେ।