Garvita Odia
ଦେବଗଡ଼:ସାମାନ୍ୟ ବଚସାକୁ କେନ୍ଦ୍ର କରି ଦେବଗଡ଼ ଜିଲ୍ଲା ବାରକୋଟ ଥାନାର ଗୌଡସୁଗୁଡ଼ା ଗ୍ରାମରେ ଆଜି ଯୁବକର ଛୁରା ମାଡରେ ବାପାଙ୍କ ମୃତ୍ୟୁ ଘଟିଥିବାବେଳେ ପୁଅ ଗୁରୁତର ଆହତ ହୋଇଥିବା ଜଣାପଡିଛି। ମୃତକ ହେଲେ ଗୌଡସୁଗୁଡା ଗ୍ରାମର ଗୌତମ ସାହୁ ଏବଂ ତାଙ୍କ ପୁଅ ଟିକେଶ୍ବର ସାହୁ ଗୁରୁତର ଆହତ ହୋଇଛନ୍ତି।ସୂଚନା ଅନୁଯାୟୀ, ଗୌଡସୁଗୁଡା ଗ୍ରାମରେ ଏକ ମଣ୍ଡପ ଘରର ନିର୍ମାଣକାର୍ଯ୍ୟ ଚାଲିଥିଲା।ମୃତକ ଗୌତମ ଏକ ପାଣି ଟ୍ୟାଙ୍କର ନେଇ ଯାଉଥିବା ବେଳେ ବାଟରେ ଗୋରୁ ବନ୍ଧା ଯାଇଥିବାରୁ ଯିବାରେ ସମସ୍ୟା ଦେଖା ଦେଇଥିଲା। ତେବେ ଅଭିଯୁକ୍ତ ବିଜୟ ନାୟକକୁ ଗୋରୁ ହଟାଇବା ପାଇଁ କହିବାରୁ ଏହାକୁ ନେଇ ଉଭୟଙ୍କ ଭିତରେ ବଚସା ସୃଷ୍ଟି ହୋଇଥିଲା। କିଛି ସମୟ ପରେ ଗୌତମଙ୍କ ପୁଅ ଟିକେଶ୍ବର ମଧ୍ୟ ଘଟଣା ସ୍ଥଳକୁ ଆସିଥିଲେ। ମାତ୍ର ବିଜୟ ଉତକ୍ଷିପ୍ତ ହୋଇ ଏକ ଛୁରି ଆଣି ବାପ ପୁଅଙ୍କୁ ଆକ୍ରମଣ କରିଥିଲା। ଗୌତମଙ୍କ ପେଟରେ ଛୁରୀ ବାଜି ଥିବାବେଳେ ପୁଅ ଟିକେଶ୍ବରଙ୍କ ପିଠିରେ ଆଘାତ ଲାଗିଥିଲା। ଗୁରୁତର ଅବସ୍ଥାରେ ବାପା ପୁଅଙ୍କୁ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିବାବେଳେ ଗୌତମଙ୍କୁ ଡାକ୍ତର ମୃତ ଘୋଷଣା କରିଥିଲେ। ଏଥିସହ ଗୁରୁତର ଆହତ ହୋଇଥିବା ଟିକେଶ୍ବରଙ୍କ ଅବସ୍ଥାସଂଙ୍କଟାପନ୍ନ ଥିବାରୁ ବୁର୍ଲା ମେଡିକାଲକୁ ସ୍ଥାନାନ୍ତରିତ କରାଯାଇଛି। ସୂଚନାପାଇ ବାରକୋଟ ଥାନା ପୁଲିସ ଅଭିଯୁକ୍ତ ବିଜୟକୁ ଅଟକ ରଖି ଘଟଣାର ତଦନ୍ତ ଜାରି ରଖିଛି। ଅନ୍ୟପଟେ ବାରକୋଟ ଥାନା ପୁଲିସ ଶବ ଜବତ କରିବା ସହ ସାଇଣ୍ଟିଫିକ ଟିମ ସହାୟତାରେ ଘଟଣାର ଅଧିକ ତଦନ୍ତ ଆରମ୍ଭ କରିଛି।
