Garvita Odia
ଭୁବନେଶ୍ୱର: ରାଜ୍ୟରେ ଦୀର୍ଘ ୯ ବର୍ଷ ହେଲା ହୋଇନାହିଁ ଛାତ୍ର ସଂସଦ ନିର୍ବାଚନ । ଏଥର ହେବ ନା ନାହିଁ ସେନେଇ ବି ସ୍ପଷ୍ଟତା ନାହିଁ। ତଥାପି କିନ୍ତୁ କ୍ୟାମ୍ପସରେ ନିର୍ବାଚନୀ ସଜବାଜ ଆରମ୍ଭ ହୋଇଛି । ତେବେ କାହିଁକି ଛାତ୍ର ସଂସଦ ନିର୍ବାଚନ ନେଇ ନୀତିଗତ ନିଷ୍ପତ୍ତି ହୋଇ ପାରୁନାହିଁ ତାକୁ ନେଇ ଏବେବି ପ୍ରଶ୍ନବାଚୀ ଠିଆ ହୋଇଛି l ବିଜୁ ଛାତ୍ର ଜନତା ଦଳର ଅଭିଯୋଗ Gen-Z ଆନ୍ଦୋଳନ ଦେଖି ଭୟଭୀତ ସରକାର l ଛାତ୍ର ସଂସଦ ନିର୍ବାଚନ ହେଲେ Gen-Z ଉଚିତ୍ ଜବାବ ଦେବେ ।
2018ରୁ ଛାତ୍ର ସଂସଦ ନିର୍ବାଚନ ରାଜ୍ୟରେ ବନ୍ଦ ରହିଛି l ସେତେବେଳେ ବିଜେଡ଼ି ସରକାର କ୍ୟାମ୍ପସ୍ ହିଂସାକୁ ଆଳ କରି ଛାତ୍ର ସଂସଦ ନିର୍ବାଚନକୁ ବନ୍ଦ ରଖିଥିଲେ l ବିଜେପି ସରକାରକୁ ଆସିବା ପରେ ପ୍ରତିଶ୍ରୁତି ଦେଇଥିଲା ଛାତ୍ର ସଂସଦ ନିର୍ବାଚନ ହେବ l କିନ୍ତୁ ଆଜିଯାଏ ତାହା ହୋଇପାରି ନାହିଁ। ଛାତ୍ର ବର୍ଗଙ୍କ ଭିତରେ ନିର୍ବାଚନକୁ ନେଇ ଉତ୍ସାହ ଅଧିକ l
ବିଜୁ ଯୁବ ଜନତା ଦଳର ସଭାପତି ଚିନ୍ମୟ ସାହୁ କହିଛନ୍ତି, ଛାତ୍ର ସଂସଦ ନିର୍ବାଚନ କରିବାକୁ ବିଜେପି ସରକାର ଭୟ କରୁଛନ୍ତି l ହାରିବା ଭୟ ସରକାରଙ୍କୁ ଘାରିଛି l ସରକାରଙ୍କ Gen-Z ଫୋବିଆ ରହିଛି l ପ୍ରତିଶୃତି ପ୍ରତାରଣା ପାଲଟିଛି l ବିଜେପି ସରକାର କେବଳ ଛାତ୍ର ବିରୋଧୀ ନୁହନ୍ତି ଗୋଟିଏ ପୀଢ଼ିର ବିରୋଧୀ ବୋଲି ସେ ଅଭିଯୋଗ କରିଛନ୍ତି l”ବିଜେପି ଗୋଟିଏ ଅଧା ଗଢା ମନ୍ଦିର ସଦୃଶ୍ୟ l ଛାତ୍ରଙ୍କ ପ୍ରତି ସରକାର ବିଶ୍ୱାସ ଘାତକ, ଧୋକା, ପ୍ରତାରଣା ଦେଉଛନ୍ତି l ସରକାରଙ୍କ ଛବି ମଳିନ ହେବା ଭୟ ଘାରିଛି l ଯେତେ ବେଳେ ପୂର୍ଣ୍ଣାଙ୍ଗ ମନ୍ତ୍ରୀମଣ୍ଡଳ କି ନିଗମ ଅଧ୍ୟକ୍ଷ ପଦବୀ ପୂରଣ କରି ପାରୁନାହାନ୍ତି ଛାତ୍ର ସଂସଦ ନିର୍ବାଚନ କଣ କରିବେ l ଉଚ୍ଚଶିକ୍ଷା ମନ୍ତ୍ରୀ କେବଳ ମିଡ଼ିଆରେ ସକରାତ୍ମକ ଅଛନ୍ତି ବାସ୍ତବରେ ଫଳ ଶୂନ,” ବୋଲି କହିଛନ୍ତି ବିଜୁ ଯୁବ ଜନତା ଦଳ ରାଜ୍ୟ ସଭାପତି ଚିନ୍ମୟ ସାହୁ l
