ରାୟଗଡ଼ା ରାଜନୀତି : ଭାସ୍କର ଦେଖାଇଲେ ଦମ୍‌

ଶ୍ରମିତା ହେଲେ ପୌର ଉପାଧ୍ୟକ୍ଷା
ପୌରାଧ୍ୟକ୍ଷ ମହେଶ ଓ ଶ୍ରମିତା ବିଜେଡିରୁ ନିଲମ୍ବିତ
ରାୟଗଡା : ରାୟଗଡା ରାଜନୀତିରେ ଘଡିକେ ଘୋଡା ଛୁଟୁଛି । ପୂର୍ବତନ ରାଜ୍ୟସଭା ସାଂସଦ ଭାସ୍କର ରାଓ ତାଙ୍କର ଦମ୍‌ ଦେଖାଇଛନ୍ତି । ରାୟଗଡ଼ା ପୌରାଧ୍ୟକ୍ଷଙ୍କ ଠାରୁ ନେଇ ୧୯ କାଉନସିଲର ତାଙ୍କ ସହ ରହିଛନ୍ତି । ତେବେ ଉପାଧ୍ୟକ୍ଷା ଶୁଭ୍ରା ପଣ୍ଡା ଭାସ୍କରଙ୍କ ଗୋଷ୍ଠୀରେ ନଥିବାରୁ ଭାସ୍କରଙ୍କ ଅନୁଗାମୀ ତଥା ବିଜେଡ଼ି କାଉନସିଲରମାନେ ତାଙ୍କୁ ହଟାଇବାକୁ ଯେଉଁ ଯୋଜନା କରିଥିଲେ ସେଥିରେ ସଫଳ ହୋଇଛନ୍ତି । ଅବଶ୍ୟ ଏହି ଯୋଜନା ଏବେର ନୁହେଁ, ଗତ କିଛିମାସ ଧରି ଜାରି ରହିଥିଲା । ଉପାଧ୍ୟକ୍ଷା ଭାବେ ୧୬ ନମ୍ବର ୱାଡର଼୍ର କାଉନସିଲର ଶ୍ରମିତା ପାଢ଼ୀ ବାଜିମାତ୍‌ କରିଛନ୍ତି । ଅପରପକ୍ଷରେ ପୌରାଧ୍ୟକ୍ଷ ପି ମହେଶ ପଟ୍ଟନାୟକ ଓ ନବ ନିର୍ବାଚିତ ପୌର ଉପାଧ୍ୟାକ୍ଷା ତଥା ୧୬ ନମ୍ବର କାଉନସିଲର ଶର୍ମିତା ପାଢୀଙ୍କୁ ବିଜେଡି ଦଳରୁ ନିଲମ୍ବିତ କରିଛି ।
ଭାସ୍କର ବିଜେଡ଼ିରୁ ବାହାରିବା ପରେ ତାଙ୍କ ସହ ଅନେକ କାଉନସିଲର ଓ ନେତାମାନେ ବ ବିଜେଡ଼ି ଛାଡ଼ି ଦେଇଥିଲେ । କିନ୍ତୁ ଦଳ ପକ୍ଷରୁ କାର୍ଯ୍ୟାନୁଷ୍ଠାନ ନିଆଯାଇନଥିଲା । ଅପରପକ୍ଷରେ ଉପାଧ୍ୟକ୍ଷା ଥିବା ଶୁଭ୍ରା ପଣ୍ଡାଙ୍କୁ ହଟାଇବାକୁ ଅନାସ୍ଥା ଆସିଥିଲା । କିନ୍ତୁ କୋର୍ଟରେ ମାମଲା ଚାଲିବାରୁ ପ୍ରକ୍ରିୟା ବିଳମ୍ବିତ ହୋଇଥିଲା । ତେବେ କୋର୍ଟଙ୍କ ନିର୍ଦ୍ଦେଶ ପରେ ଉପାଧ୍ୟାକ୍ଷା ନିର୍ବାଚନରେ ୧୬ ନମ୍ବର ୱାର୍ଡ କାଉନସିଲର ଶ୍ରମିତା ପାଢ଼ୀ ପ୍ରାର୍ଥୀପତ୍ର ଦାଖଲ କରିଥିଲେ । ତାଙ୍କ ବିରୋଧରେ ଆଉ କେହି ପ୍ରାର୍ଥୀପତ୍ର ଦାଖଲ ନକରିବାରୁ ନୂତନ ଉପାଧ୍ୟକ୍ଷା ଭାବରେ ଶ୍ରମିତା ପାଢ଼ୀ ନିର୍ବାଚିତ ହୋଇଛନ୍ତି ବୋଲି ନିର୍ବାଚନ ଅଧିକାରୀ ପ୍ରିୟଦର୍ଶନି ସ୍ୱାଇଁ ଘୋଷଣା କରିଛନ୍ତି ।
ଶ୍ରମିତାଙ୍କ ପ୍ରସ୍ତାବକ ରହିଥିଲେ ପାଲକୋଣ୍ଡା ମମିତା ଓ ସମର୍ଥକ ଥିଲେ ସରୋଜିନୀ ଖୋସଲା । ସୂଚନାଯୋଗ୍ୟ ଯେ, ରାୟଗଡ଼ା ପୌରସଂସ୍ଥାର ତତ୍କାଳୀନ ଉପାଧ୍ୟକ୍ଷା ଶୁଭ୍ରା ପଣ୍ଡାଙ୍କ ବିରୋଧରେ ଗତବର୍ଷ ସେପ୍ଟେମ୍ବର ୧୨ ତାରିଖରେ ୧୯ ଜଣ କାଉନସିଲର ଅନାସ୍ଥା ପ୍ରସ୍ତାବ ଆଣିଥିଲେ । ସେତେବେଳେ ପୌରପାଳିକାରେ ବିଜେଡିର ୨୧, ବିଜେପିର ୨ ଓ କଂଗ୍ରେସର ଜଣେ କାଉନସିଲର ଥିଲେ । ପରବର୍ତ୍ତୀ ସମୟରେ ଅନାସ୍ଥା ପ୍ରସ୍ତାବ ଉପରେ ମତଦାନ ହୋଇଥିଲେ ମଧ୍ୟ ଆଇନଗତ ପ୍ରକ୍ରିୟା କାରଣରୁ ଉପାଧ୍ୟକ୍ଷ ପଦକୁ ନେଇ ପରବର୍ତ୍ତୀ ପ୍ରକ୍ରିୟାରେ ବିଳମ୍ବ ଘଟିଥିଲା । ଅନାସ୍ଥା ପ୍ରସ୍ତାବ ବେଳେ ଦଳ ପକ୍ଷରୁ ହ୍ୱିପ୍‌ ଜାରି ହୋଇଥିବା ସତ୍ତେ୍‌୍ୱ ୧୯ କାଉନସିଲର ଅନାସ୍ଥା ପ୍ରସ୍ତାବ ସପକ୍ଷରେ ମତଦାନ କରିଥିଲେ । ଅନ୍ୟପକ୍ଷରେ, ଅନାସ୍ଥା ପ୍ରସ୍ତାବ ସମୟରେ ଏକାଠି ଥିବା ୧୯ ଜଣ କାଉନସିଲରଙ୍କ ବିଜେଡିର କୌଣସି କାର୍ଯ୍ୟକ୍ରମରେ ଯୋଗ ନଦେଇ ପୂର୍ବତନ ରାଜ୍ୟସଭା ସାଂସଦ ଏନ ଭାସ୍କର ରାଓଙ୍କ ‘ବିଜୁ ସ୍ୱାଭିମାନ ମଞ୍ଚ’ର କାର୍ଯ୍ୟକ୍ରମରେ ଯୋଗ ଦେଉଛନ୍ତି ।
ଗତ ୨୦୨୪ ନିର୍ବାଚନ ସମୟରେ ବିଜେଡି ତରଫରୁ ନିଆଯାଇଥିବା ନିଷ୍ପତ୍ତି ଏବଂ ଭାସ୍କର ରାଓ ଗୋଷ୍ଠୀଙ୍କୁ ବାରମ୍ବାର ଅଣଦେଖା କରିଥିବାରୁ ଶ୍ରୀ ରାଓଙ୍କ ସମେତ, ପୂର୍ବତନ ମନ୍ତ୍ରୀ ଲାଲବିହାରୀ ହିମିରିକା ଏବଂ ବହୁ ବରିଷ୍ଠ ନେତା ବିଜେଡି ଛାଡିଥିଲେ ।