Garvita Odia
ୱାଶିଂଟନ : ଫ୍ଲାଏଦୁବାଇ ବିମାନର ସହ ପାଇଲଟ୍ ସେହି ବିମାନର ମୁଖ୍ୟ ପାଇଲଟ୍ ସ୍ମିତ ମଚ୍ଛାରଙ୍କୁ ଛୁରିରେ ଆକ୍ରମଣ କରିବା ଏବଂ ଏହାର ପରବର୍ତ୍ତୀ ଘଟଣାକ୍ରମକୁ ନେଇ ଆମେରିକା ନିଜସ୍ବ ତଦନ୍ତ ଜାରି ରଖିଛି। ଆକ୍ରମଣକାରୀ ସହ ପାଇଲଟଙ୍କ ଇରାନ ସହ କୌଣସି ସମ୍ପର୍କ ଥାଇପାରେ ବୋଲି ସନ୍ଦେହ କରାଯାଉଥିବା ବେଳେ ଯଦି ଏହା ସତ୍ୟ ହୋଇଥାଏ ତେବେ ଇରାନ ଉପରେ ଆମେରିକା ଜୋରଦାର୍ ଆକ୍ରମଣ କରିବ ବୋଲି ଚେତାବନୀ ଦେଇଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ।
ସାମ୍ବାଦିକଙ୍କ ସହ ଆଲୋଚନା କାଳରେ ଟ୍ରମ୍ପ କହିଥିଲେ ଫ୍ଲାଇ ଦୁବାଇ ବିମାନରେ ଯାହା ଘଟିଲା ତାହାକୁ ନେଇ ଆମେରିକା ସୁରକ୍ଷା ଏଜେନ୍ସି ନିଜସ୍ବ ତଦନ୍ତ କରୁଛି। ସହ ପାଇଲଟ୍ଙ୍କ ସହ ଇରାନର ସମ୍ପର୍କ ରହିଥିବା ଆଶଙ୍କା କରାଯାଉଛି। ତେବେ ଏ ନେଇ ସଂପୂର୍ଣ୍ଣ ତଥ୍ୟ ବର୍ତ୍ତମାନ ସୁଦ୍ଧା ହସ୍ତଗତ ହୋଇ ନାହିଁ। ଯଦି ସହ ପାଇଲଟଙ୍କ ସହ ଇରାନର କୌଣସି ପ୍ରକାର ସମ୍ପର୍କ ଥାଏ ତେବେ ଇରାନ ଉପରେ ଆମେରିକା ଜୋର୍ଦାର ଆକ୍ରମଣ କରିବ। ବିମାନ ଅପହରଣ କିମ୍ବା କୌଣସି କୋଠାରେ ଧକ୍କା ଦେବାକୁ ସହ ପାଇଲଟଙ୍କୁ ଇରାନ ତରଫରୁ ପ୍ରବର୍ତ୍ତାଇ ଯାଇଥିଲା କି ବୋଲି ସାମ୍ବାଦିକଙ୍କ ପ୍ରଶ୍ନର ଉତ୍ତରରେ ଟ୍ରମ୍ପ କହିଥିଲେ ଏହା ଅସମ୍ଭବ ନୁହେଁ। ତେବେ କୌଣସି ନିଷ୍କର୍ଷରେ ପହଞ୍ଚିବା ପାଇଁ ତଦନ୍ତ ଜାରି ରହିଛି ଏବଂ ତଦନ୍ତ ଆଧାରରେ ଇରାନ ଉପରେ ପରବର୍ତ୍ତୀ କାର୍ୟ୍ୟାନୁଷ୍ଠାନ ସମ୍ପର୍କରେ ଆମେରିକା ନିଷ୍ପତ୍ତି ନେବ।
ଅନ୍ୟପକ୍ଷରେ ଏହି ଘଟଣାକୁ ନେଇ ଇସ୍ରାଏଲ୍ ପ୍ରଧାନମନ୍ତ୍ରୀ ନେତାନ୍ୟାହୁ କହିଛନ୍ତି ସହ ପାଇଲଟ୍ଙ୍କ ସହ ଇରାନର କୌଣସି ପ୍ରକାର ସମ୍ପର୍କ ରହିଛି କି ନାହିଁ ତାହା ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇ ନାହିଁ। ତଦନ୍ତ ପରେ ପ୍ରକୃତ ସତ୍ୟ ଲୋକଲୋଚନକୁ ଆସିବ।
