୪ଦଫା ଦାବି ନେଇ କଂଗ୍ରେସର ୧୨ ଘଣ୍ଟିଆ ବନ୍ଦ ପାଳନ

ଦେବଗଡ଼:୪ ଦଫା ଦାବି ନେଇ ଆଜି କଂଗ୍ରେସ ପକ୍ଷରୁ ୧୨ ଘଣ୍ଟିଆ ବନ୍ଦ ଡାକରା ଦିଆଯାଇଥିଲା।ଦେବଗଡ ଜିଲ୍ଲାରେ ଆଜି ବନ୍ଦ ପାଳନ ଶାନ୍ତି ପୂର୍ଣ୍ଣ ରହିଥିଲା।ଜିଲ୍ଲା କଂଗ୍ରେସ ସଭାପତି ସେମ ହେମ୍ରମଙ୍କ ନେତୃତ୍ବରେ ବହୁ କଂଗ୍ରେସ କର୍ମୀ ୪୯ ନମ୍ବର ଜାତୀୟ ରାଜପଥର ସ୍ଥାନୀୟ ଆମ୍ବେଦକର ଛକରେ ରାଜପଥ ଅବରୋଧ କରିବାରୁ ରାସ୍ତାର ଉଭୟ ପାଶ୍ୱର୍ରେ ବହୁ ଯାନ ବାହାନ ଅଟକି ରହିଥିଲା। ଏହାପରେ ଏକ ବାଇକ ରାଲି କରି ସହରର ସମସ୍ତ ଦୋକାନ ବଜାର ବନ୍ଦ କରିଥିଲେ। ସେହିପରି ବସ୍ ଚଳାଚଳ ବନ୍ଦ ରହିଥିବା ଯୋଗୁଁ ଯାତ୍ରୀମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଥିଲେ। ଏହାପରେ ଜିଲ୍ଲାପାଳଙ୍କ କାର୍ଯ୍ୟାଳୟ ସମେତ ସମସ୍ତ ସରକାରୀ ଓ ବେସରକାରୀ କାର୍ଯ୍ୟାଳୟ,ସ୍କୁଲ,କଲେଜ,ବ୍ୟାଙ୍କ,ପୋଷ୍ଟ ଅଫିସକୁ ମଧ୍ୟ ପିକେଟିଂ କରି କଂଗ୍ରେସକର୍ମୀ ମାନେ ବନ୍ଦ କରିଥିଲେ। ଏମ ଏମ ଡିଆର ବିଲ ପ୍ରତ୍ୟାହାର ,ନିର୍ବାଚନ କମିଶନଙ୍କ ଇସ୍ତଫା ,ପାଠ୍ୟ ବହିରେ ବ୍ୟାପକ ତ୍ରୁଟି ପାଇଁ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡଙ୍କ ଇସ୍ତଫା ଏବଂ ବନ୍ୟା ସହାୟତା ଦାବିରେ କଂଗ୍ରେସ ପକ୍ଷରୁ ବନ୍ଦ ଡାକରା ଦିଆଯାଇଥିଲା। ଏଥିରେ ଜିଲ୍ଲା କଂଗ୍ରେସର ଉପସଭାପତି ମଞ୍ଜୁଳ ନାଏକ, ସାଧାରଣ ସଂପାଦକ ଆକାଶ ଦାଶ, ନଗର କଂଗ୍ରେସ ସଭାପତି ରେବତୀ ମୋହନ ପଟ୍ଟନାୟକ, ଏସସି ସେଲ ସଭାପତି ରମେଶ ଚନ୍ଦ୍ର ପାତ୍ର, ଏସଟି ସେଲ ସଭାପତି ସୁଶୀଲ ଗୁଡିଆ, ଜିତେନ୍ଦ୍ର ବେହେରାଙ୍କ ସମେତ ବହୁ କଂଗ୍ରେସ କର୍ମୀ ଉପସ୍ଥିତ ଥିଲେ। ସେହିପରି ଅନୁରୂପ ଭାବେ ବାରକୋଟ ବ୍ଲକରେ ଯଶୋବନ୍ତ ସାହୁ, ତିଲେଇବଣି ବ୍ଲକରେ ସୁରେନ୍ଦ୍ର ସାହୁ ଏବଂ ରିଆମାଳ ବ୍ଲକରେ ସୁଶାନ୍ତ ସ୍ବାଇଁ ଓ କୃଷ୍ଣଚନ୍ଦ୍ର ଦେହୁରୀଙ୍କ ନେତୃତ୍ବରେ ବନ୍ଦ ପାଳନ ହୋଇଥିଲା।ଆଇନଶୃଙ୍ଖଳାକୁ ଦୃଷ୍ଟିରୁ ରଖି ପୁଲିସ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଥିଲା।