ବାତ୍ୟା ଆଶଙ୍କା, ଭୟଭୀତ ନହେବାକୁ ପରାମର୍ଶ ଦେଲେ ମନ୍ତ୍ରୀ

ଭୁବନେଶ୍ବର: ବଙ୍ଗୋପ ସାଗରରେ ସୃଷ୍ଟି ହେଲା ଲଘୁଚାପ । ଆସନ୍ତାକାଲି(24 ଅକ୍ଟୋବର) ସୁଦ୍ଧା ଅଧିକ ଘନୀଭୂତ ହୋଇ ଅବପାତରେ ପରିଣତ ହୋଇ ଆସନ୍ତା 26 ତାରିଖରେ ବାତ୍ୟା ରୂପ ନେଇପାରେ । ବାତ୍ୟା ସୃଷ୍ଟି ପରେ ପରବର୍ତ୍ତୀ ଦୁଇଦିନରେ ଏହା ପଶ୍ଚିମ ଓ ଉତ୍ତର ପଶ୍ଚିମ ଦିଗରେ ଗତି କରିବା ସହ ଆହୁରି ଶକ୍ତିଶାଳୀ ହେବ । ଉତ୍ତର ଆନ୍ଧ୍ରପ୍ରଦେଶ ଓ ସଂଲଗ୍ନ ଦକ୍ଷିଣ ଓଡ଼ିଶା ଉପକୂଳ ମୁହାଁ ହେବ ବୋଲି ପୂର୍ବାନୁମାନ କରିଛି ଭାରତୀୟ ପାଣିପାଗ ବିଭାଗ । ଏନେଇ ରାଜସ୍ୱ ଏବଂ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ବାତ୍ୟା ପାଇଁ ସରକାରୀ ପ୍ରସ୍ତୁତି ଜାରି ରହିଥିବା କହିଛନ୍ତି । ୟୁରୋପୀୟ ମଡେଲଗୁଡ଼ିକ ଉପରେ ନଜର ରଖିବା ସହିତ ଜନସାଧାରଣଙ୍କୁ ଭୟଭୀତ ନ ହେବାକୁ ବିପର୍ଯ୍ୟୟ ପରିଚାଳନା ମନ୍ତ୍ରୀ ଅପିଲ୍ କରିଛନ୍ତି । ଶୁକ୍ରବାର ସୁଦ୍ଧା ସ୍ପଷ୍ଟ ଚିତ୍ର ମିଳିଯିବ ବୋଲି କହିଛନ୍ତି ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ।
ରାଜସ୍ୱ ମନ୍ତ୍ରୀ ସୁରେଶ ପୂଜାରୀ କହିଛନ୍ତି, “ଭାରତୀୟ ପାଣିପାଗ ବିଭାଗ ବାତ୍ୟା ନେଇ କୌଣସି ସ୍ପଷ୍ଟ ସୂଚନା ଦେଇନାହିଁ । ୟୁରୋପୀୟ ସଙ୍ଗଠନର ମଡେଲକୁ କେବଳ ସୂଚକ (ଇଣ୍ଡିକେସନ) ଭାବେ ଆମେ ଗ୍ରହଣ କରୁଛୁ । ଆମେ ବାତ୍ୟାକୁ ଦୃଷ୍ଟିରେ ରଖି ପ୍ରସ୍ତୁତି ଆରମ୍ଭ କରିଛୁ । ଆମେ IMD ସହିତ ନିରନ୍ତର ଯୋଗାଯୋଗରେ ଅଛୁ । ବାତ୍ୟା କିମ୍ବା ବର୍ଷା ଆସୁ ନଆସୁ, ଆମେ ପ୍ରସ୍ତୁତ ରହିବା ଉଚିତ ।”IMD ଓ ବିଭିନ୍ନ ସଂସ୍ଥା ଆକଳନ କରୁଛନ୍ତି । 24 ତାରିଖରେ ଏହା ଅବପାତର ରୂପ ନେଇ ଉତ୍ତର – ପଶ୍ଚିମ ଦିଗକୁ ଗତି କରିବ । ହୁଏତ ଏହା ଓଡିଶା – ଆନ୍ଧ୍ରପ୍ରଦେଶର ସମୁଦ୍ର ତଟ ଛୁଇଁପାରେ । ଛୁଇଁଲେ କେତେ ସ୍ଥଳ ଭାଗକୁ ପଶିବ କିମ୍ବା ବାହାରେ ବାହାରେ ପଶ୍ଚିମବଙ୍ଗ ଦେଇ ଆନ୍ଧ୍ରପ୍ରଦେଶ ଯିବ । ଗତି କେତେ ରହିବ ସେନେଇ ସଠିକ ଆକଳନ ନହେବା ପର୍ଯ୍ୟନ୍ତ ଆତଙ୍କିତ ହେବାର ଆବଶ୍ୟକତା ନାହିଁ । କେହି ବିଚଳିତ ହେବାର ଆବଶ୍ୟକତା ନାହିଁ । ରାଜ୍ୟ ସରକାରଙ୍କ ପ୍ରସ୍ତୁତି ଜାରୀ ଅଛି । ଓଡିଶାବାସୀ ବିଚଳିତ ହୁଅନ୍ତୁ ନାହୁଁ, ସରକାର ପ୍ରସ୍ତୁତ ଅଛନ୍ତି