Garvita Odia
ଭୁବନେଶ୍ବର: ବିଧାନସଭାରେ ପୁଣି ଓଡ଼ିଆ ଅସ୍ମିତା ପ୍ରସଙ୍ଗ । ଓଡ଼ିଆ ଅସ୍ମିତାକୁ ନେଇ ତେଜିଛି ରାଜନୀତି । ‘ଅସ୍ମିତା’କୁ ନେଇ ବିଜେଡି ବିଧାୟକ ଅରୁଣ ସାହୁ ଓ ଭାଷା, ସାହିତ୍ୟ ଏବଂ ସଂସ୍କୃତି ମନ୍ତ୍ରୀ ସୂର୍ଯ୍ୟବଂଶୀ ସୂରଜଙ୍କ ମଧ୍ୟରେ କଥା କଟାକଟି ହୋଇଛି ।
ଓଡ଼ିଆ ‘ଅସ୍ମିତା’ ଶବ୍ଦର ଅର୍ଥ କ’ଣ ବୋଲି ଆଜି ବିଧାନସଭାରେ ବିଜେଡି ବିଧାୟକ ଅରୁଣ ସାହୁ ପ୍ରଶ୍ନ କରିଥିଲେ । ଯାହାର ଉତ୍ତର ରଖିଥିଲେ ଭାଷା , ସାହିତ୍ୟ ଏବଂ ସଂସ୍କୃତି ମନ୍ତ୍ରୀ ସୂର୍ଯ୍ୟବଂଶୀ ସୂରଜ । ମନ୍ତ୍ରୀ କହିଥିଲେ,”ଚଳନ୍ତି ଓଡ଼ିଆ ଅଭିଧାନକୁ 2017ରେ ଓଡ଼ିଆ ଭାଷା ସାହିତ୍ୟ ବିଭାଗ ଅଧିନସ୍ଥ ଓଡ଼ିଆ ଏକାଡେମୀ ପ୍ରକାଶିତ କରିଥିଲା । 2020 ମସିହାରେ ଏହାକୁ ପୁନଃ ପ୍ରକାଶିତ କରାଯାଇଥିଲା । ସେ ସମୟର ସରକାର ଯାହା ଅସ୍ମିତାର ଅର୍ଥ ବୁଝିଥିଲେ, ଆମେ ତାକୁ ଆମ ସରକାର କୋଟ କରିଛନ୍ତି । ବିଧାୟକ ଅରୁଣ ସାହୁଙ୍କ ମୋ ଠାରୁ ଅଧିକ ଜ୍ଞାନ ଓ ଅଭିଜ୍ଞତା ରହିଛି । ଓଡ଼ିଆ ଅସ୍ମିତାକୁ ଯଦି ବ୍ୟାଖ୍ୟା କରିବା, ଏହା କେବଳ କାଗଜରେ ଲେଖିବା ସମ୍ଭବ ନୁହେଁ । ଓଡ଼ିଆ ଭାଷା ଓ ସଂସ୍କୃତିରେ ରହିବା ହେଉଛି ଓଡ଼ିଆ ଅସ୍ମିତା । ଭବିଷ୍ୟତ ଖୋଜିବା ଏହି ଅସ୍ମିତା । ଅସ୍ମିତା ଆଧାରରେ ସରକାର ଗଠନ ହୋଇଛି । ଏଥିରେ ରାଜନୈତିକ ମୁଦ୍ଦା ନାହିଁ । ପ୍ରତି ଓଡ଼ିଆଙ୍କ ଭାବାବେଗ ସହ ଏହା ଜଡିତ । ଅସ୍ମିତା ସଂକୁଚିତ ବିଷୟବସ୍ତୁ ନୁହେଁ । ଅସ୍ଥିତ୍ବ ପ୍ରଦର୍ଶନ କରିବା ହିଁ ଅସ୍ମିତା ।”ସେହିପରି ଅହଂ ପ୍ରଶ୍ନର ଉତ୍ତର ରଖି ମନ୍ତ୍ରୀ କହିଛନ୍ତି, “ଏହା ଏକ ନକରାତ୍ମକ ଶବ୍ଦ ନୁହେଁ । ଆମେ କେଉଁଠି ଏହି ଅହଂ ଭାବକୁ ପ୍ରୟୋଗ କରିବା ତାହା ଉପରେ ଶବ୍ଦର ଅର୍ଥ ନିର୍ଭର କରେ ।”ବିଧାନସଭାରେ ଅଣତାରକା ପ୍ରଶ୍ନ ସଂଖ୍ୟା ୧୭୧, ବିଜେଡି ବିଧାୟକ ଅରୁଣ କୁମାର ସାହୁ ପ୍ରଶ୍ନ କରିଥିଲେ, “ଓଡ଼ିଆ ଭାଷା ସାହିତ୍ୟ ଓ ସଂସ୍କୃତି ମନ୍ତ୍ରୀ ଅନୁଗ୍ରହ କରି କହିବେ କି, ଓଡ଼ିଆ ଅଭିଧାନରେ ଅସ୍ମିତା ଶବ୍ଦର ଅର୍ଥ କଣ ? ଓଡ଼ିଆ ଅସ୍ମିତାର ସମ୍ପୂର୍ଣ୍ଣ ବ୍ୟାଖ୍ୟା କରିବେ କି ?” ସୂଚନା ଥାଉ କି, ଗତ 2024 ନିର୍ବାଚନରେ ଓଡ଼ିଆ ଅସ୍ମିତାକୁ ପ୍ରସଙ୍ଗ କରିଥିଲା ଭାରତୀୟ ଜନତା ପାର୍ଟି ।
