ଶ୍ରଦ୍ଧାର ସହିତ ମସାଜ୍ ନେଉଥିଲେ, ଦଳକୁ ବୁଡ଼ାଇଦେଲେ ଏବେ ବ୍ୟକ୍ତିଙ୍କୁ ବୁଡ଼ାଇବେ: ସୂର୍ଯ୍ୟବଂଶୀ

କିଛିଦିନର ନିରବତା ପରେ ପୁଣିଥରେ ଚର୍ଚ୍ଚାରେ ବିଜେଡିର ଅଘୋଷିତ ସର୍ବେସର୍ବା ଭିକେ ପାଣ୍ଡିଆନ । ତାଙ୍କୁ କଡ଼ା ଭାଷାରେ ସିଧାସଳଖ ଆକ୍ଷେପ କରିଛନ୍ତି ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ । ରାଜ୍ୟରେ ବିଭିନ୍ନ ପ୍ରସଙ୍ଗ ରହିଥିଲାବେଳେ କିଭଳି ଏକ ଅପ୍ରସଙ୍ଗକୁ ପ୍ରସଙ୍ଗ କରାଯାଉଛି ଓ ନବୀନ ନିବାସରେ ବସି ସନ୍ୟାସୀ ଭୈରବାନନ୍ଦ କିଭଳି ଏସବୁ କରାଉଛନ୍ତି ତା’ର ପେଡ଼ି ଖୋଲିଛନ୍ତି ସୂର୍ଯ୍ୟବଂଶୀ । ଦଳ(ବିଜେଡି)କୁ ବୁଡ଼ାଇ ସାରିଛନ୍ତି, ଏବେ ବ୍ୟକ୍ତିବିଶେଷଙ୍କୁ ବୁଡ଼ାଇବା ପାଇଁ ଲାଗିଛନ୍ତି ବୋଲି ସୂର୍ଯ୍ୟଂବଶୀ କଟାକ୍ଷ କରିଛନ୍ତି । ଆଜି ସାମ୍ବାଦିକମାନଙ୍କ ପ୍ରଶ୍ନର ଉତ୍ତର ଦେଇ ସୂର୍ଯ୍ୟବଂଶୀ କହିଛନ୍ତି ଯେ, କଳିଙ୍ଗ ଷ୍ଟାଡ଼ିୟମର ଆଥଲେଟିକ୍ ଟ୍ରାକରେ ଗାଡ଼ି ପୁରାଇବାକୁ ସେ କେବେବି ଠିକ୍ କହିନାହାନ୍ତି । ପରିସ୍ଥିତି,ପଦମର୍ଯ୍ୟାଦାର ଗମ୍ଭୀରତାକୁ ଦୃଷ୍ଟିରେ ରଖି ସେ ଏହି ପ୍ରସଙ୍ଗରେ ସ୍ପଷ୍ଟୀକରଣ ରଖିସାରିଛନ୍ତି । ଏକ ଅଭାବନୀୟ ପରିସ୍ଥିତିରେ ସେଦିନ ଟ୍ରାକରେ କାର ବୁଲି ଆସିଥିଲା । ତେବେ ଏଥିପାଇଁ ଟ୍ରାକ୍ କିଛିବି କ୍ଷତିଗ୍ରସ୍ତ ହୋଇନାହିଁ । ଏହାଛଡ଼ା ତାଙ୍କର ଅପରିପକ୍ୱତା ବୋଲି ଯେଉଁମାନେ କହୁଛନ୍ତି ତାକୁ ବି ସେ ସ୍ୱୀକାର କରୁଛନ୍ତି । କେହି ମା’ ପେଟରୁ ପାଠ ପଢ଼ି ଆସିନଥାଏ । ୨୯ବର୍ଷ ବୟସରେ ଅପରିପକ୍ୱତାକୁ ଅସ୍ୱୀକାର କରିବାରେ କୁଣ୍ଠାବୋଧ କରୁନି । କିନ୍ତୁ ଯିଏ ରାଜ୍ୟସାରା ଷ୍ଟାଡ଼ିୟମଗୁଡ଼ିକରେ ପିଚ୍ ଉପରେ ହେଲିକପ୍ଟରକୁ ଓହ୍ଲାଉଥିଲେ ଓ ପଡ଼ିଆକୁ ନଷ୍ଟ କରୁଥିଲେ ତାଙ୍କର କେଉଁ ପରିପକ୍ୱତା ସେତେବେଳେ ଥିଲା ବୋଲି ସେ ପ୍ରଶ୍ନ କରିଛନ୍ତି । ସୂର୍ଯ୍ୟବଂଶୀ କହିଛନ୍ତି ଯେ, କଳିଙ୍ଗ ଷ୍ଟାଡ଼ିୟମକୁ ସାଧାରଣ ଲୋକ ତ ଦୂରର କଥା ମନ୍ତ୍ରୀମାନଙ୍କୁ ବି ଛଡ଼ାଯାଉନଥିଲା । ଗୋଟିଏ ଲୋକ ସକାଳୁ ସକାଳୁ ଯାଇ ବଗ ଭଳିଆ ଟଙ୍ଗଟଙ୍ଗ ହୋଇ ବୁଲି ଭିଡ଼ିଓ ଛାଡ଼ୁଥିଲେ । ଶ୍ରଦ୍ଧାର ସହିତ ମସାଜ୍ ନେଉଥିଲେ । ସୂର୍ଯ୍ୟବଂଶୀର କାର୍ ପଶିବାକୁ ନେଇ ଥରେ କହିଲେ,ଦୁଇଥର କହିଲେ ଠିକ୍ ଅଛି । କିନ୍ତୁ ନବୀନ ନିବାସରେ ବସିଥିବା ଭୈରବାନନ୍ଦ ସନ୍ୟାସୀଙ୍କ କଥାରେ ସୂର୍ଯ୍ୟବଂଶୀକୁ ବ୍ୟକ୍ତିଗତ ଟାର୍ଗେଟ୍ କରାଯାଉଛି । ସାଙ୍ଗିଆ ନାହିଁ, କଲେଜବେଳେ ମଦ ପିଇବା ଭିଡିଓକୁ ଯୋଡ଼ାଯାଉଛି । ସିଏ ତ ଦଳକୁ ବୁଡ଼ାଇଦେଲେ । ଏବେ ବ୍ୟକ୍ତିବିଶେଷଙ୍କୁ ବି ବୁଡ଼ାଇବାରେ ଲାଗିଛନ୍ତି । ଏସବୁ ଲେନିନ୍ ଭାଇ, ତୁଷାର ଭାଇ,ମନ୍ମଥ ଭାଇ ତାଙ୍କ କଥାରେ କହି ହେଉଛନ୍ତି ବୋଲି ସୂର୍ଯ୍ୟବଂଶୀ କହିଛନ୍ତି । ବିଜେଡି ପ୍ରତିଷ୍ଠା ଦିବସରେ ମୁଷ୍ଟିଯୁଦ୍ଧ ହେଲା ସେକଥା ମିଡିଆରେ ଚାଲିଲା । ରୁବେନ ବାନାର୍ଜୀ ଆଗରୁ ଭଲ ସାମ୍ବାଦିକ ଥିଲେ । କିନ୍ତୁ ଯେବେ ପାଣ୍ଡୁ ଉପାଖ୍ୟାନ ଲେଖିଲେ ସେ ଖରାପ ହୋଇଗଲେ । ତାକୁ ଦୃଷ୍ଟି ଏଡ଼ାଇବା ପାଇଁ ୟାକୁ ପ୍ରସଙ୍ଗ କରାଗଲା । ସୂର୍ଯ୍ୟବଂଶୀ ଆହୁରି ମଧ୍ୟ କହିଛନ୍ତି ଯେ, ରାଜ୍ୟରେ ଅନେକ ପ୍ରସଙ୍ଗ ଅଛି । ଲୋକେ ପାଣି ପାଉନାହାନ୍ତି ।ଶିକ୍ଷକ ନାହାନ୍ତି । ଏସବୁ ପାଇଁ ବିଜେଡି ଦାୟୀ । ତା’ଉପରେ ଗଠନମୂଳକ ପରାମର୍ଶ ଦିଅନ୍ତୁ । ଉଚ୍ଚଶିକ୍ଷା ବିଭାଗରେ ଯେଉଁସବୁ ସମସ୍ୟା ହୋଇଛି ତାକୁ ତ ୬ମାସରେ ଆମେ କରିଦେଇନୁ । ଯାହା ସମସ୍ୟା ହୋଇଥିଲା ତାକୁ ସମାଧାନ ପାଇଁ ପ୍ରୟାସ କରାଯାଉଛି ବୋଲି ମନ୍ତ୍ରୀ ସୂର୍ଯ୍ୟବଂଶୀ ସୂରଜ କହିଛନ୍ତି ।