ଏକାଠି ଉଠିଲା ମାଆ- ପୁଅ କୋକେଇ

ଡୁଙ୍ଗୁରିପାଲି: ଏମିତି ବି ଆସେ ମୃତ୍ୟୁ। ଅସହ୍ୟ ହେଲେ ପୁଅର ବିୟୋଗ, ଆଖିବୁଜିଳା ମାଆ। ଏକାଠି ଉଠିଲା ମାଆ- ପୁଅ କୋକେଇ। ଏଭଳି ଅଭାବନୀୟ ଘଟଣା ଡୁଙ୍ଗୁରିପାଲି ବ୍ଲକ ସହଲା ଗ୍ରାମରେ ଘଟିଛି। ଶନିବାର ମାତ୍ର ଅଧଘଣ୍ଟା ବ୍ୟବଧାନରେ ଉଭୟ ମା’ ଓ ପୁଅଙ୍କ ମୃତ୍ୟୁ ଘଟିଛି । ମୃତ ମହିଳା ଜଣକ ହେଲେ ବିଳାସ ବାରିକ(୭୬) ଏବଂ ତାଙ୍କ ପୁଅ ରମେଶ(୫୩) । ମାତ୍ର ଅଧଘଣ୍ଟା ବ୍ୟବଧାନରେ ମା’ ଓ ପୁଅଙ୍କ ମୃତ୍ୟୁ ଖବର ପ୍ରଚାରିତ ହେବାପରେ ଗାଁରେ ଶୋକର ଛାୟା ଖେଳିଯାଇଛି ।

ପ୍ରକାଶଯେ, ଶନିବାର ସକାଳ ପ୍ରାୟ ୫ଟାରେ ରମେଶଙ୍କ ମୃତ୍ୟୁ ହୋଇଥିଲା । ମୃତ୍ୟୁ ଶୋକରେ ଘରେ କାନ୍ଦବୋବାଳି ପଡ଼ିଥିଲା । ରମେଶଙ୍କ ମୃତ୍ୟୁର ଅଧଘଣ୍ଟାପରେ ପ୍ରାୟ ୫.୩୦ରେ ରମେଶଙ୍କ ମା’ ବିଳାସ ବାରିକଙ୍କ ମୃତ୍ୟୁ ଘଟିଥିଲା । ମୃତ୍ୟୁଶଯ୍ୟା ନିକଟରେ ପରିବାରବର୍ଗ ଉପସ୍ଥିତ ଥିଲେ । ପରେ ପରିବାର ଲୋକେ ଦୁହିଁଙ୍କୁ ଶୋଭାଯାତ୍ରାରେ ଶ୍ମଶାନ ଘାଟକୁ ନେଇଥିଲେ । ବଡ଼ନାତି ନଗେଶ ବାରିକ ଉଭୟଙ୍କୁ ମୁଖାଗ୍ନି ଦେଇଥିଲେ । ଏଭଳି ଏକ ଦୁଃଖଦ ଘଟଣାରେ ସମସ୍ତେ ସ୍ତମ୍ଭୀଭୂତ ହୋଇଯାଇଛନ୍ତି।