Garvita Odia
ଜୟପୁର: ରାଜସ୍ଥାନର ଡିଡୱାନା-କୁଚାମନ୍ ଜିଲ୍ଲାସ୍ଥିତ ନାୱା ଅଞ୍ଚଳରେ ବୁଧବାର ସକାଳେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଏକ ଦ୍ରୁତଗାମୀ କାର୍ ଓ ଡମ୍ପର ମଧ୍ୟରେ ମୁହାଁମୁହିଁ ଧକ୍କା ହେବା ଫଳରେ ଗୋଟିଏ ପରିବାରର ୩ ଜଣଙ୍କ ସମେତ ମୋଟ ୪ ଜଣଙ୍କର ଘଟଣାସ୍ଥଳରେ ହିଁ ମୃତ୍ୟୁ ଘଟିଛି। ମୃତକମାନେ ହେଲେ ଲକ୍ଷ୍ମଣ ସିଂହ (୪୬), ତାଙ୍କ ସ୍ତ୍ରୀ ତୁଳସୀ (୪୫), ସେମାନଙ୍କ ଝିଅ ଶୀତଲ (୨୨) ଏବଂ କାର୍ ଚାଳକ ରାମକିଶନ (୩୫)। ତୁଳସୀ କସେରାସ୍ଥିତ ଉପ-ସ୍ୱାସ୍ଥ୍ୟ କେନ୍ଦ୍ରରେ ଏଏନଏମ୍ ଭାବେ କାର୍ଯ୍ୟରତ ଥିଲେ। ସକାଳ ପ୍ରାୟ ୫ଟା ସମୟରେ ପରିବାରଟି ଜୟପୁରରୁ ନାୱା ଆଡ଼କୁ ଆସୁଥିବା ବେଳେ ଏହି ଦୁର୍ଘଟଣା ଘଟିଥିବା ପୁଲିସ ସୂଚନା ଦେଇଛି।
ସଂଘର୍ଷ ଏତେ ଭୟଙ୍କର ଥିଲା ଯେ କାରର ସମ୍ମୁଖ ଭାଗ ସମ୍ପୂର୍ଣ୍ଣ ଚୁରମାର୍ ହୋଇଯାଇଥିଲା ଏବଂ ଚାରିଜଣଙ୍କ ମୃତଦେହ କାର୍ ଭିତରେ ଚାପି ହୋଇ ରହିଯାଇଥିଲା। ଘଟଣାସ୍ଥଳରେ ପୁଲିସ ପହଞ୍ଚି ପ୍ରାୟ ଅଧଘଣ୍ଟା ଅକ୍ଲାନ୍ତ ପରିଶ୍ରମ ପରେ ମୃତଦେହଗୁଡ଼ିକୁ ବାହାର କରି ନାୱା ଉପ-ଜିଲ୍ଲା ଡାକ୍ତରଖାନା ଶବଗୃହରେ ରଖିଛି। ନାୱା ଥାନା ଅଧିକାରୀ ସୁରେଶ ଚୌଧୁରୀଙ୍କ କହିବା ଅନୁସାରେ, ଦୁର୍ଘଟଣା ଘଟାଇଥିବା ଡମ୍ପରକୁ ଜବତ କରାଯାଇଛି, କିନ୍ତୁ ଏହାର ଚାଳକ ଘଟଣାସ୍ଥଳରୁ ଫେରାର ହୋଇଯାଇଛି। ପୁଲିସ ଦୁର୍ଘଟଣାର କାରଣ ଅନୁଧ୍ୟାନ କରିବା ସହ ଫେରାର ଡମ୍ପର ଚାଳକଙ୍କୁ ଗିରଫ କରିବା ପାଇଁ ତଦନ୍ତ ଜାରି ରଖିଛି।
