ଗାନ୍ଧୀ ଜୟନ୍ତୀରେ ରୋଗୀଙ୍କୁ ଫଳ ଓ ଶୁଖିଲା ଖାଦ୍ୟ ବଣ୍ଟନ

ରାଇକିଆ: ଗାନ୍ଧୀ ଜୟନ୍ତୀ ଅବସରରେ କନ୍ଧମାଳ ପାଷ୍ଟର ଆସୋସିଏସନ ଟ୍ରଷ୍ଟ, ରାଇକିଆ ପକ୍ଷରୁ ରାଇକିଆ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ପରିଦର୍ଶନ କରି ରୋଗୀମାନଙ୍କୁ ଭେଟିବା ସହ ଫଳ ଓ ଶୁଖିଲା ଖାଦ୍ୟ ବଣ୍ଟନ କରିଥିଲେ।ବିଶେଷକରି ମା’ ଗୃହରେ ରହୁଥିବା ମହିଳାମାନେ ଏବଂ ପ୍ରସୂତି ବିଭାଗରେ ଚିକିତ୍ସିତ ମା’ ଓ ଶିଶୁମାନଙ୍କୁ ଟ୍ରଷ୍ଟ ପକ୍ଷରୁ ଫଳ ଓ ଶୁଖିଲା ଖାଦ୍ୟ ପ୍ରଦାନ କରାଯାଇଥିଲା। ରୋଗୀ ଓ ସେମାନଙ୍କ ପରିବାର ସଦସ୍ୟଙ୍କ ସହ ସଦସ୍ୟମାନେ ଆଲୋଚନା କରି ସେମାନଙ୍କ ଅବସ୍ଥା ସମ୍ପର୍କରେ ପଚାରି ବୁଝିଥିଲେ। ଏହି ସେବା କାର୍ଯ୍ୟରେ ରାଇକିଆ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଅଧିକାରୀ ଡ଼ଃ ଶ୍ରୀନିବାସ ପାତ୍ର ଓ ଆୟୁଷ ଡ଼ଃ ଚନ୍ଦନା ମିଶ୍ର ସହଯୋଗ କରିଥିଲେ।ଏହା ପୂର୍ବରୁ କନ୍ଧମାଳ ଜିଲ୍ଲାର ବିଭିନ୍ନ ଅଞ୍ଚଳରେ ହାତୀ ଉପଦ୍ରବରେ ମୃତ୍ୟୁବରଣ କରିଥିବା ପରିବାରଗୁଡ଼ିକୁ ମଧ୍ୟ ଟ୍ରଷ୍ଟ ପକ୍ଷରୁ ସାକ୍ଷାତ କରାଯାଇ ସହାୟତାର ହାତ ବଢ଼ାଯାଇଥିଲା। ଅଡାସୀକୁପା, ମାଲାନସୁଗା, ସୁଯେଲି ଓ ଡାଙ୍ଗାଏଜୁ ଗ୍ରାମକୁ ଟ୍ରଷ୍ଟର ସଦସ୍ୟମାନେ ଯାଇ ହାତୀ ଆକ୍ରମଣରେ ପ୍ରଭାବିତ ପରିବାରଙ୍କୁ ଭେଟିବା ସହ ସେମାନଙ୍କ ଦୁଃଖରେ ସାମିଲ ହୋଇଥିଲେ।ଏହି ସେବା କାର୍ଯ୍ୟକ୍ରମରେ କନ୍ଧମାଳ ପାଷ୍ଟର ଆସୋସିଏସନ ଟ୍ରଷ୍ଟର ସଭାପତି ଥୋମାସ ନାୟକ, ଉପସଭାପତି ସନ୍ତୋଷ ଦିଗାଲ, ସମ୍ପାଦକ ଅମିତ କୁମାର ନାୟକ, ଯୁଗ୍ମ ସମ୍ପାଦକ ଅବକାଶ ନାୟକ, କୋଷାଧ୍ୟକ୍ଷ ବାବୁଲା ଦିଗାଲ, ପରାମର୍ଶଦାତା ଦାନିଏଲ ନାୟକ, ଦିଲୀପ ପ୍ରଧାନ, ଅଜିତ ନାୟକ, ଆନନ୍ଦ ଦିଗାଲ ପ୍ରମୁଖ ଉପସ୍ଥିତ ଥିଲେ।
ରିପୋର୍ଟର ଦୁତି କୃଷ୍ଣ ପଣ୍ଡା