Garvita Odia
ରାଇକିଆ: ଗ୍ରାମୀଣ ଆବାସ ଯୋଜନାର ୨୦୨୫-୨୬ ବର୍ଷ ର ସଫଳ ରୂପାୟଣ କ୍ଷେତ୍ରରେ କନ୍ଧମାଳ ଜିଲ୍ଲାରେ ରାଇକିଆ ବ୍ଲକ ଶ୍ରେଷ୍ଠ ସ୍ଥାନ ଅଧିକାର କରିଛି। ଗରିବ ଓ ଆବାସହୀନ ପରିବାରଙ୍କୁ ସ୍ଥାୟୀ ଆବାସ ଯୋଗାଇବା ଦିଗରେ ବ୍ଲକ ପ୍ରଶାସନର ଏହି ସଫଳତାକୁ ନେଇ ସାଧାରଣରେ ଖୁସି ପ୍ରକାଶ ପାଇଛି।
ଏହି ଉଲ୍ଲେଖନୀୟ ସଫଳତା ପାଇଁ ରାଇକିଆ ଗୋଷ୍ଠୀ ଉନ୍ନୟନ ଅଧିକାରୀ ଡ଼ଃ ସବ୍ୟସାଚୀ ସାହୁ ଜିଲ୍ଲା ପ୍ରଶାସନ, ରାଇକିଆ ଗ୍ରାମୀଣ ଆବାସ ଟିମ୍ ସମେତ ଯୋଜନାର ସଫଳ ରୂପାୟଣରେ ପ୍ରତ୍ୟକ୍ଷ ଓ ପରୋକ୍ଷ ଭାବେ ସହଯୋଗ କରିଥିବା ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି। ବ୍ଲକ ଆବାସ ସଂଯୋଜକ କମଲ ପ୍ରସାଦ ନାୟକଙ୍କ ସମେତ ଗ୍ରାମୀଣ ଆବାସ ଟିମ୍ର ସମସ୍ତ ସଦସ୍ୟଙ୍କ ନିଷ୍ଠାପର ପ୍ରୟାସ ଓ ସମନ୍ୱିତ କାର୍ଯ୍ୟ ଯୋଗୁଁ ରାଇକିଆ ବ୍ଲକ ଜିଲ୍ଲାରେ ଶ୍ରେଷ୍ଠ ସ୍ଥାନ ହାସଲ କରିପାରିଛି ବୋଲି ସେ କହିଛନ୍ତି।
ଯୋଜନାର ସୁଫଳ ଯୋଗ୍ୟ ହିତାଧିକାରୀଙ୍କ ନିକଟରେ ପହଞ୍ଚାଇବା, ଆବାସ ନିର୍ମାଣ କାର୍ଯ୍ୟର ଅଗ୍ରଗତି ଉପରେ ନିୟମିତ ନଜର ରଖିବା ଏବଂ ହିତାଧିକାରୀଙ୍କୁ ଆବଶ୍ୟକ ସହଯୋଗ ଓ ମାର୍ଗଦର୍ଶନ ଦେବାରେ ବ୍ଲକ ଆବାସ ସଂଯୋଜକ କମଲ ପ୍ରସାଦ ନାୟକଙ୍କ ସମେତ ଟିମ୍ର ସଦସ୍ୟମାନେ ଗୁରୁତ୍ୱପୂର୍ଣ୍ଣ ଭୂମିକା ତୁଲାଇଥିବା ଜଣାପଡ଼ିଛି।
ଆଗାମୀ ଦିନରେ ମଧ୍ୟ ରାଇକିଆ ବ୍ଲକର ସର୍ବାଙ୍ଗୀନ ଉନ୍ନତି ଓ ଜନସାଧାରଣଙ୍କ କଲ୍ୟାଣ ପାଇଁ ପ୍ରଶାସନ ପକ୍ଷରୁ ପ୍ରୟାସ ଜାରି ରହିବ ବୋଲି ଡ଼ଃ ସାହୁ ମତ ପ୍ରକାଶ କରିଛନ୍ତି। ଏହି ସଫଳତା ରାଇକିଆ ବ୍ଲକର ବିକାଶମୁଖୀ କାର୍ଯ୍ୟଧାରାକୁ ଆହୁରି ଗତିଶୀଳ କରିବ ବୋଲି ଆଶା ପ୍ରକାଶ ପାଇଛି।
ରିପୋର୍ଟର ଦୁତି କୃଷ୍ଣ ପଣ୍ଡା
