ଚାଷୀଙ୍କୁ ଦଳି ଦେଲା ଦନ୍ତା

ଢେଙ୍କାନାଳ: ଢେଙ୍କାନାଳ ବନଖଣ୍ଡ ହିନ୍ଦୋଳ ବନାଞ୍ଚଳରେ ଥମୁନି ହାତୀ ଉପଦ୍ରବ। ରବିବାର ସକାଳୁ ପୁଣି ଜଣଙ୍କୁ ହାତୀ ଦଳି ମାରିଦେଇଛି। ମୃତକ ବାଲିମି ଥାନା ଇଲାକା ବାଲିମି ଗାଁର ନରୋତ୍ତମ ବେହେରା ବୋଲି ଜଣାପଡିଛି।ନରୋତ୍ତମ ସକାଳୁ ଶୌଚ ହେବାପାଇଁ ଘର ପଛ ପଟକୁ ଯାଇଥିବା ବେଳେ ହାତୀ ଆକ୍ରମଣ କରିଥିଲା। ହାତୀଟି ନରୋତ୍ତମଙ୍କ ଛାତିରେ ପାଦ ପକାଇ ଦେବାରୁ ଘଟଣାସ୍ଥଳରେ ତାଙ୍କର ପ୍ରାଣବାୟୁ ଛାଡି ଯାଇଥିଲା । ବାରମ୍ବାର ଏହି ଅଞ୍ଚଳରେ ହାତୀ ଉପଦ୍ରବରୁ ଲୋକଙ୍କ ମୃତ୍ୟୁ ହେଉଛି । ଏନେଇ ବନ ବିଭାଗ କୌଣସି ପଦକ୍ଷେପ ଗ୍ରହଣ କରୁନଥିବାରୁ ଅସନ୍ତୋଷ ପ୍ରକାଶ ପାଇଥିଲା । ଏହାକୁ ନେଇ ସ୍ଥାନୀୟ ଗ୍ରାମବାସୀ ରାସ୍ତାରୋକ କରିଛନ୍ତି। ଫଳରେ ଗୁଡ଼ିଆକାଟେଣୀ-ହିନ୍ଦୋଳ ରାସ୍ତାରେ ଯାତାୟାତ ବାଧାପ୍ରାପ୍ତ ହୋଇଛି।ଏ ସମ୍ପର୍କରେ ଖବର ପାଇ ପୁଲିସ ଓ ବନ ବିଭାଗ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରୁଛନ୍ତି। ହାତୀ ଆକ୍ରମଣରେ ନରୋତ୍ତମଙ୍କ ଦେହାନ୍ତ ହୋଇଥିବା ଖବର ପାଇ ଢେଙ୍କାନାଳ ସାଂସଦ ରୁଦ୍ର ନାରାୟଣ ପାଣି ଶୋକ ପ୍ରକାଶ କରିଛନ୍ତି । ହାତୀ ଉପଦ୍ରବର ସ୍ଥାୟୀ ସମାଧାନ ନିମନ୍ତେ ସଂସଦର ପବିତ୍ର ଗୃହରେ ଉପସ୍ଥାପନ କରିଥିଲି ଓ ବିଭିନ୍ନ ସମୟରେ ମଧ୍ୟ ବିଭିନ୍ନ ଉଚ୍ଚ ପଦସ୍ଥ ଅଧିକାରୀଙ୍କ ସହିତ ଆଲୋଚନା କରୁଛି । ସୋଲାର ବ୍ୟବସ୍ଥା ଓ ଆଲୋକିକରଣ ନିମନ୍ତେ ପଦକ୍ଷେପ ନେଉଛି ବୋଲି ସେ ପ୍ରକାଶ କରିଛନ୍ତି।