Garvita Odia
ଟିଟିଲାଗଡ଼: ଟ୍ରଲି ବ୍ୟାଗରେ ଗଞ୍ଜେଇ ଚାଲାଣ କରି ୬ ଯୁବତୀ ଅଟକ । ଟିଟିଲାଗଡ଼ ରେଲୱେ ଷ୍ଟେସନରେ ଜିଆରପି ପୁଲିସକୁ ବଡ଼ ସଫଳତା । ପେଟ୍ରୋଲିଙ୍ଗ କରୁଥିବାବେଳେ ୬ ଜଣ ଯୁବତୀ ସମତା ଏକ୍ସପ୍ରେସ ଟ୍ରେନରେ ତାଙ୍କର ୬ ଟି ଟ୍ରଲି ବ୍ୟାଗକୁ ଦେଖି ଜିଆରପି ପୁଲିସର ସନ୍ଦେହ ବଢ଼ିଥିଲା । ସେମାନଙ୍କୁ ପଚରାଉଚରା କରି ବ୍ୟାଗକୁ ଖୋଲିବାକୁ ପୁଲିସ କହିଥିଲା । ବ୍ୟାଗ ଖୋଲିବା ପରେ ୬ଟି ବ୍ୟାଗରୁ ପ୍ରାୟ ୩୧ କେଜି ୫ ଶହ ଗ୍ରାମ ଗଞ୍ଜେଇ ଜବତ ହୋଇଛି । ୬ ଜଣ ଯୁବତୀ ଟିଟିଲାଗଡ଼ ରେଲୱେ ଷ୍ଟେସନରୁ ଟ୍ରେନ ଯୋଗେ ଦିଲ୍ଲୀକୁ ଗଞ୍ଜେଇ ଚାଲାଣ କରୁଥିବାର ପ୍ରାଥମିକ ତଦନ୍ତରୁ ଜଣାପଡିଛି । ସେମାନଙ୍କ ମଧ୍ୟରୁ ୨ ଜଣ ଦିଲ୍ଲୀର ହୋଇଥିବାବେଳେ ଦୁଇଜଣ ବଲାଙ୍ଗୀର ଜିଲ୍ଲା ସଇଁତଳା ଅଞ୍ଚଳର ଆଉ ବାକି ୨ ଜଣ କଳାହାଣ୍ଡି ଓ ବରଗଡ଼ ଅଞ୍ଚଳର ବୋଲି ଜଣାପଡ଼ିଛି ।
ସମସ୍ତ ଯୁବତୀଙ୍କୁ ଜିଆରପି ପୁଲିସ ଅଟକ ରଖି ଅଧିକ ପଚରାଉଚରା କରୁଛି । ଆସନ୍ତା କାଲି ସେମାନଙ୍କୁ କୋର୍ଟ ଚାଲାଣ କରାଯିବ ବୋଲି ଟିଟିଲାଗଡ଼ ଜିଆରପି ଅଧିକାରୀ ସୂଚନା ଦେଇଛନ୍ତି ।
