ପିଇବା ପାଣି ପାଇଁ ଗରା,ବାଲଟି ଧରି ବିକ୍ଷୋଭ

ଦେବଗଡ଼:ପିଇବା ପାଣି ପାଇଁ ଅଭିନବ ଉପାୟରେ ପ୍ରତିବାଦ କରିଛନ୍ତି ଗ୍ରାମବାସୀ। ଆଜି ତିଲେଇବଣି ବ୍ଲକର ନୂଆଭୁଇଁ ଗ୍ରାମର ଗ୍ରାମବାସୀ ଗରା, ବାଲଟି ଧରି ଆରଡବ୍ଲୁଏସଏସ ଅଧିକ୍ଷଣ ଯନ୍ତ୍ରୀ କାର୍ଯ୍ୟାଳୟ ଘେରାଉ କରିବା‌ ସହ ବିକ୍ଷୋଭ ପ୍ରଦର୍ଶନ କରିଥିଲେ। ସୂଚନ‌ା ଅନୁଯାୟୀ, ନୂଆଭୁଇଁ ଗ୍ରାମରେ ବସୁଧା ଯୋଜନାରେ ପିଇବା ପାଣି ଯୋଗାଇ ଦିଆଯାଉଥିବା ବେଳେ ପମ୍ପ ଖରାପ ଯୋଗୁଁ ଏହା ବାରମ୍ବାର ବନ୍ଦ ରହୁଥିବା ଗ୍ରାମବାସୀ ଅଭିଯୋଗ କରିଛନ୍ତି।ସେହିଭଳି ଗ୍ରାମରେ ଦୁଇଟି ନଳକୂପ ରହିଥିବା ବେଳେ ସେଗୁଡିକ ମଧ୍ୟ ଅଚଳ ହୋଇ ପଡିରହିଛି। ଏକ ମାସ ହେବ ପାନୀୟଜଳ ଜଳଯୋଗାଣ ବନ୍ଦ ରହିଥିବା ବେଳେ ବିଭାଗୀୟ ଅଧିକାରୀ ମାନଙ୍କୁ ଜଣାଇବା ପରେ ମଧ୍ୟ କୌଣସି ପଦକ୍ଷେପ ନିଆଯାଇନଥିବାରୁ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା।ସମସ୍ୟାର ସମାଧାନ ନ ‌ହେବାରୁ ଗ୍ରାମବାସୀମାନେ ଆଜି ଆରଡବ୍ଲୁଏସଏସ ଅଧିକ୍ଷଣ ଯନ୍ତ୍ରୀ କାର୍ଯ୍ୟାଳୟ ସମ୍ମୂଖରେ ଗରା, ବାଲଟି ଧରି ଧାରଣା ଦେଇଥିଲେ। ପରେ ସମସ୍ୟାର ସମାଧାନ ପାଇଁ ପଦକ୍ଷେପ ଗ୍ରହଣ କରାଯିବ ବୋଲି ବିଭାଗୀୟ ଅଧିକାରୀ ପ୍ରତିଶୃତି ଦେବା ପରେ ପରିସ୍ଥିତି ଶାନ୍ତ ପଡିଥିଲା।