ବଜ୍ରାଘାତରେ ୩ ମୃତ

ରାଜ୍ୟର ପୃଥକ ପୃଥକ ସ୍ଥାନରେ ଶୁକ୍ରବାର ବଜ୍ରାଘାତରେ ୩ ଜଣଙ୍କ ମୃତ୍ୟୁ ଘଟିଥିବା ବେଳେ ଜଣେ ଗୁରୁତର ଆହତ ହୋଇଛନ୍ତି। ଗଜପତି ଜିଲ୍ଲା ଆର୍. ଉଦୟଗିରି ଥାନା ଟଟରଙ୍ଗ ଗାଁରେ ବଜ୍ରାଘାତରେ ବଡ଼ ଭାଇର ମୃତ୍ୟୁ ଘଟିଥିବା ବେଳେ ସାନ ଭାଇ ଗୁରୁତର ଆହତ ହୋଇଛନ୍ତି। ମୃତାହତମାନେ ହେଉଛନ୍ତି ଅନୁଗୁର ପଞ୍ଚାୟତର କାଟାମା ଗାଁର। ମୃତକଙ୍କ ନାଁ ଜିରାଦ ରଇତ ଓ ସାନ ଭାଇଙ୍କ ନାଁ ମୋଜେଶ ରଇତ।

ଦୁଇ ଭାଇ ଅନୁଗୁର ପଞ୍ଚାୟତରୁ ରାସନ୍ ଚାଉଳ ନେଇ ନିଜ ଗାଁ କାଟାମା ଫେରୁଥିବା ବେଳେ ବାଟରେ ବର୍ଷା ହେବାରୁ ଟଟରଙ୍ଗ ସ୍କୁଲ ନିକଟରେ ଥିବା ଏକ ତେନ୍ତୁଳି ଗଛ ତଳେ ଆଶ୍ରୟ ନେଇଥିଲେ। ସେହି ସମୟରେ ବଜ୍ରପାତ ହୋଇଥିଲା। ବଜ୍ରାଘାତରେ ଦୁଇ ଭାଇ ଗୁରୁତର ଆହତ ହୋଇଥିବା ବେଳେ ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରିଥିଲେ। ସେମାନେ ପ୍ରଥମେ ବଡ଼ ଭାଇକୁ ଗୋବର ଭିତରେ ପୋତି ରଖିଥିଲେ। ହେଲେ ସେ ଭଲ ନ ହେବାରୁ ଆର୍. ଉଦୟଗିରି ଡାକ୍ତରଖାନାରେ ଭର୍ତ୍ତି କରିଥିଲେ।
ଡାକ୍ତର ବଡ଼ ଭାଇକୁ ମୃତ ଘୋଷଣା କରିଥିବା ବେଳେ ଚିକିତ୍ସା ପରେ ସାନ ଭାଇର ସ୍ୱାସ୍ଥ୍ୟାବସ୍ଥା ଭଲ ଥିବା ଜଣାପଡ଼ିଛି। ଖବର ପାଇ ଆର.ଉଦୟଗିରି ପୁଲିସ ମୃତଦେହ ଜବତ କରିଥିବା ବେଳେ ଏ ସଂକ୍ରାନ୍ତରେ ଏକ ଅପମୃତ୍ୟୁ ମାମଲା ରୁଜୁ କରି ଘଟଣାର ତଦନ୍ତ କରୁଛି।

ଅନ୍ୟ ଘଟଣାଟି ଘଟିଛି ବୌଦ୍ଧ ଜିଲ୍ଲା ମନମୁଣ୍ଡା ଝାଙ୍କରପଡ଼ା ଗାଁରେ। ବର୍ଷା ହେବାରୁ ଗଛ ତଳେ ଆଶ୍ରୟ ନେଇଥିଲେ ୨ ଯୁବକ। ସେହି ସମୟରେ ବଜ୍ରପାତ ହୋଇଥିଲା ଓ ଉଭୟଙ୍କର ମୃତ୍ୟୁ ଘଟିଥିଲା।