Garvita Odia
ଭୁବନେଶ୍ବର: ରାତି ଆଧରେ ଆକସ୍ମିକ ବନ୍ଦ ହେଲା ବିଧାନସଭା । ଶେଷ କାର୍ୟ୍ୟ ଦିବସ ପୂର୍ବରୁ ଗୃହ କାର୍ୟ୍ୟ ବନ୍ଦ । ବିଧାନସଭାକୁ ଅନିର୍ଦ୍ଧିଷ୍ଟ କାଳ ପାଇଁ ମୁଲତବୀ ଘୋଷଣା କରିଛନ୍ତି ବାଚସ୍ପତି । ଏଭଳି ହଠାତ୍ ବନ୍ଦ ନେଇ ରାଜ୍ୟ ସରକାରଙ୍କୁ ଘେରିଛି ବିଜୁ ଜନତା ଦଳ । ଏ ଡବଲ ଇଞ୍ଜିନ ସରକାର ନୁହେଁ ଦୋମୁହାଁ ସରକାର କହି ବର୍ଷିଛନ୍ତି ବିଜେଡି ବରିଷ୍ଠ ନେତା ପ୍ରସନ୍ନ ଆଚାର୍ୟ୍ୟ ଏବଂ ଦେବୀ ମିଶ୍ର ।
ବିଜେଡି ପକ୍ଷରୁ କୁହାଯାଇଛି, ବିଜେପି ଆନୁଷ୍ଠାନିକ ଭାବେ ନିଶିକାନ୍ତ ଦୁବେଙ୍କ ମନ୍ତବ୍ୟକୁ ପ୍ରତିବାଦ କରୁନାହିଁ । ବିଧାନସଭାରେ ଏସିସିବି ଓ ବିଜୁ ବାବୁଙ୍କ ପ୍ରସଙ୍ଗରେ ଆଲୋଚନା କରିବାକୁ ଚାହୁଁ ନାହାନ୍ତି ସରକାର । ବିଜୁ ବାବୁଙ୍କ ପ୍ରତି ଅପମାନ ସୂଚକ ମନ୍ତବ୍ୟକୁ ନେଇ ଶୂନ୍ୟକାଳରେ ବ୍ୟାପକ ଆଲୋଚନା ହୋଇଛି । ବାଚସ୍ପତି ନିନ୍ଦା ପ୍ରସ୍ତାବକୁ ଗ୍ରହଣ କରି ସଂସଦୀୟ ବ୍ୟାପାର କମିଟିକୁ ପଠାଇଥିଲେ । ମାତ୍ର ହଠାତ୍ କ’ଣ ହେଲା ମଧ୍ୟ ରାତ୍ରିରେ ଆକଷ୍ମିକ ଭାବେ ବିଧାନସଭାକୁ ଅନିର୍ଦ୍ଧିଷ୍ଟ କାଳ ଯାଏ ବନ୍ଦ କରିଦେଲେ । ବିରୋଧୀ ନୁହେଁ ସରକାର ଏଠି ବିଧାନସଭା ଚଳେଇବାକୁ ଚାହୁଁନାହାନ୍ତି । ବିରୋଧୀ ସକ୍ରିୟ ଭାବେ ବିଧାନସଭାରେ ଅଲୋଚନ କରିବାକୁ ଚାହୁଁଥିବା ବେଳେ ସରକାର ଚାଲାକି କରି ମୁଲତବୀ ଘୋଷଣା କରିଛନ୍ତି । ଯାହା କି ସରକାର ଦୋମୁହାଁ ଚରିତ୍ରକୁ ଦର୍ଶାଉଛି ବୋଲି ବିଜେଡି ବରିଷ୍ଠ ନେତା ତଥା ବିଧାୟକ ପ୍ରସନ୍ନ ଆଚାର୍ୟ୍ୟ କହିଛନ୍ତି ।
