Garvita Odia
ଆଜିକାଲି ସେଣ୍ଟେଡ୍ କ୍ୟାଣ୍ଡେଲ ଏବଂ ଇଲେକ୍ଟ୍ରିକ୍ ଡିଫ୍ୟୁଜର୍ ଘରକୁ ଆପଣଙ୍କ ମନ ପସନ୍ଦର ମହକ ଦେବାରେ ସଫଳ ଅଟନ୍ତି । ହେଲେ ଏହା ଘରର ପରିବେଶରେ ପ୍ରାକୃତିକ ସତେଜତା ଭରିବାରେ ବିଫଳ ହୋଇଥାନ୍ତି । ଏପରି ସ୍ଥଳରେ ଆପଣ ନିଜ ଘରେ ଏକ ପ୍ରାକୃତିକ ସତେଜତା ଓ ମହକ ଆଣିବା ପାଇଁ ବେଶ୍ କିଛି ଗଛକୁ ନିଜର ଘରର ବଗିଚା, ବାଲକୋନୀ ଏପରି କି ଘର ଭିତରେ ମଧ୍ୟ ରଖିପାରିବେ । ଗୋଟିଏ ଫୁଲ ଧରିଥିବା ଡ଼ାଳ ପୂରା ପରିବେଶକୁ ନିଜର ବାସ୍ନାରେ ମହକାଇ ଦେଇଥାଏ । କୁତ୍ରିମ ବାସ୍ନା ଠାରୁ ଏହି ବାସ୍ନା ଘରେ ଏକ ସତେଜତା ମଧ୍ୟ ଆଣିଦେଇଥାଏ । ଆମେ ଏପରି 6ଟି ଗଛ ବିଷୟରେ ଏବଂ ଏହାର ଯତ୍ନ ନେବା ଶୈଳୀ ବିଷୟରେ ତଳେ ବର୍ଣ୍ଣନା କରିଛୁ…
1. ମାଡାଗାସ୍କର୍ ଜସ୍ମିନ୍:
ଜସ୍ମିନ୍ ଫୁଲର ସୁଗନ୍ଧ ବିଷୟରେ ଯେତେ କହିବା ସେତେ କମ୍ । ବିନା କୌଣସି ପରିଶ୍ରମରେ ଏହି ଫୁଲ ଆପଣଙ୍କ ଘରକୁ ଏକ ସୁନ୍ଦର ଲୁକ୍ ସହିତ ମହକାଇଥାଏ । ଏହାର ମିଠା ମହକ କୌଣସି ମହଙ୍ଗା ପରଫ୍ୟୁମ୍ ସହିତ ମଧ୍ୟ ତୁଳନା କରାଯାଇପାରେ । ଏହି ଗଛର ଗୋଟିଏ ଫୁଲ ଫୁଟୁଥିବା ଡ଼ାଳ ସାରା ଘରକୁ ମହକାଇ ଦେଇପାରେ । ଏହି ଫୁଲ ମୁଖ୍ୟତଃ ସଂନ୍ଧ୍ୟା ବେଳ ସମୟରେ ଫୁଟିଥାଏ । ଏହା ସହିତ ଯେବେ ଫୁଲ ଫୁଟିବା ଋତୁ ନଥାଏ ଏହାର ଚମକଦାର ସବୁଜ ପତ୍ର ବିଶିଷ୍ଟ ଗଛ ଆପଣଙ୍କ ଘରର ଶୋଭା ବଢାଇଥାଏ ।
କିପରି ଯତ୍ନ ନେବେ?
ଏହି ଗଛ ପାଇଁ ଆଲୋକ ଆବଶ୍ୟକ ମାତ୍ର ସିଧାସଳଖ ନୁହେଁ ବରଂ ଛାଇ ଆବଶ୍ୟକ କରିଥାଏ । ପୂର୍ବ କିମ୍ବା ଦକ୍ଷିଣ ଦିଗରେ ଏହାକୁ ରଖିବା ଉତ୍ତମ । ଦ୍ବିପହରର ଟାଣ ଖରାରେ ଏହାକୁ ବାହାରେ ରଖିବା ଅନୁଚିତ । ଗଛର ମାଟିକୁ ବସନ୍ତ ଓ ଖରା ଦିନରେ ସାମାନ୍ୟ ଓଦା ରଖିବା ଆବଶ୍ୟକ । ଶୀତଦିନରେ ପାଣି ଦେବା ହ୍ରାସ କରାଯାଇପାରେ ମାତ୍ର ମାଟିକୁ ସମ୍ପୂର୍ଣ୍ଣ ଭାବେ ଶୁଖିବା ପାଇଁ ଦେବା ଅନୁଚିତ୍ ।
2. ହୋୟା ଲାକୁନୋସା
ଏହି ଗଛରେ ଖୁବ୍ ଛୋଟଫୁଲ ଫୁଟିଥାଏ । ମାତ୍ର ଏହାର ବାସ୍ନାରେ ଚାରିଆଡ଼ ମହକି ଉଠେ । ଏହାର ବାସ୍ନାକୁ ଅନେକ ଲୋକ ଡାଲଚିନି, ମହୁ ଓ ଭାନିଲା ଆଦିର ମିଶ୍ରଣ ଭାବେ ବର୍ଣ୍ଣନା କରିଥାନ୍ତି । ଏହି ଫୁଲର ବାସ୍ନା ସଂନ୍ଧ୍ୟା ବେଳେ ବେଶି ଚହଟି ଉଠିଥାଏ । ଆପଣ ଏହି ଗଛକୁ ହାଙ୍ଗିଂ ପଟ୍ରେ ଲଗାଇ ପାରିବେ ଫଳରେ ଏହାର ଡ଼ାଳ ତଳକୁ ଓହଳି ଏହାକୁ ଏକ ଅନନ୍ୟ ଲୁକ୍ ଦେଇଥାଏ ।
ଏପରି ନିଅନ୍ତୁ ଯତ୍ନ:
ଏହାକୁ ଆଲୋକିତ ସ୍ଥାନରେ ରଖନ୍ତୁ ମାତ୍ର ସିଧାସଳଖ ଖରାରେ ରଖନ୍ତୁ ନାହିଁ । ଫଳରେ ଅଧିକ ଫୁଲ ଫୁଟିଥାଏ । କମ୍ ଆଲୋକରେ ରଖିଲେ ଏହାର ଫୁଲ ଧରିବା ପ୍ରକ୍ରିୟା ପ୍ରଭାବିତ ହୋଇଥାଏ ।
ଏହାର ମାଟିର ଉପର ସ୍ତର ଶୁଖିଲା ହେବା ପରେ ପାଣି ଦିଅନ୍ତୁ । ଅତ୍ୟଧିକ ପାଣି ଦେଲେ ପୁଣି ଏହାର ମୂଳ ଖରାପ ହୋଇଯିବାର ସମ୍ଭାବନା ରହିଥାଏ ।
3. କାଟ୍ଲେୟା ଅର୍କିଡ୍:
ଅର୍କିଡ୍ ଫୁଲ ମଧ୍ୟରେ କାଟ୍ଲେୟା ଅର୍କିଡ୍ ଭିନ୍ନ ଅଟେ । ଏହାର ଫୁଲର ଆକାର ସାମାନ୍ୟ ବଡ଼ । ବିଭିନ୍ନ ପ୍ରଜାତିର ଅର୍କିଡ୍ର ବାସ୍ନା ମଧ୍ୟ ଭିନ୍ନ ହୋଇଥାଏ । ଏହାର ବାସ୍ନା ସତେଜ ଲେମ୍ବୁର ବାସ୍ନା ଠାରୁ ନେଇ ଭାନିଲା, କେତେକ ଫୁଲ ମହୁ ଭଳି ମଧ୍ୟ ବାସ୍ନା ହୋଇଥାଏ । ଏକ ମୁଠା ଫୁଲ ଆପଣଙ୍କ ସାରା ଘରକୁ ମହକାଇବା ପାଇଁ ଯଥେଷ୍ଟ ଅଟେ ।
ଏପରି ନିଅନ୍ତୁ ଯତ୍ନ:
ଏହି ଗଛ ପାଇଁ ସକାଳର କଁଅଳିଆ ଖରା ସର୍ବୋତ୍ତମ । ମାତ୍ର ମଧ୍ୟାହ୍ଣର ତୀବ୍ର ଖରା ଖୁବ୍ କ୍ଷତିକାରୀ ଅଟେ ।
ଗଛର ମାଟି ପାଖାପାଖି ଶୁଖିଲା ହେବା ପରେ ହିଁ ଏଥିରେ ପାଣି ଦେବା ଆବଶ୍ୟକ । ଅର୍କିଡ୍ ଗଛର ମୂଳ ଅତ୍ୟଧିକ ପାଣିକୁ ସହ୍ୟ କରିପାରେ ନାହିଁ ।
