ରାଜ୍ୟସ୍ତରୀୟ ସ୍ବାଧୀନତା ଦିବସ ପ୍ରସ୍ତୁତି; ଗାନ୍ଧୀ ମାର୍ଗରେ ପରେଡ୍ ରିହଲସଲ

ଭୁବନେଶ୍ୱର: ରାଜଧାନୀ ଭୁବନେଶ୍ବର ମହାତ୍ମା ଗାନ୍ଧୀ ମାର୍ଗରେ ୮୦ତମ ରାଜ୍ୟସ୍ତରୀୟ ସ୍ବାଧୀନତା ଦିବସ ଉତ୍ସବ ଅନୁଷ୍ଠିତ ହେବ । ଏଥିପାଇଁ ପ୍ରସ୍ତୁତି ଜୋରଦାର ଚାଲିଛି । ଆଜି (ମଙ୍ଗଳବାର) ଠାରୁ ପରେଡ୍ ରିହଲସଲ ଆରମ୍ଭ ହୋଇଛି । ଅପରାହ୍ନରେ ଆୟୋଜିତ ପରେଡ ରିହଲସଲକୁ ଅତିରିକ୍ତ ପୋଲିସ କମିଶନର ନରସିଂହ ଭୋଳ ତଦାରଖ କରିଥିଲେ । ବିଭିନ୍ନ କଣ୍ଟିଜେଣ୍ଟ ଉତ୍ସାହର ସହ ଏହି ପରେଡରେ ସାମିଲ ହୋଇଥିଲେ। କଣ୍ଟିଜେଣ୍ଟରେ ରାଜଧାନୀର ବିଭିନ୍ନ ସ୍କୁଲ ଛାତ୍ରଛାତ୍ରୀ ମଧ୍ୟ ରହିଛନ୍ତି ।
ଚଳିତବର୍ଷ ପରେଡ କମାଣ୍ଡର ଭାବେ ୨୦୨୨ ବ୍ୟାଚର ଆଇପିଏସ୍ ଅଫିସର ତଥା ବାଲିଗୁଡା ଏସଡିପିଓ ଭୋସଲେ ଶୁଭମ ସଞ୍ଜୟ ନେତୃତ୍ବ ନେଉଛନ୍ତି । ପରେଡରେ ପ୍ରାୟ ୫୧ଟି କଣ୍ଟିଜେଣ୍ଟ ଅଂଶଗ୍ରହଣ କରୁଛନ୍ତି । ଆସନ୍ତାକାଲି ଅପରାହ୍ନ ୨ଟା ୩୦ରୁ ୬ଟା ଯାଏଁ ପୁଣି ପରେଡ୍ ରିହଲସଲ ଏବଂ ୧୩ ତାରିଖରେ ସକାଳ ୮ଟା ୩୦ରୁ ୧୧ଟା ୩୦ ଯାଏଁ ପୂର୍ଣ୍ଣ ପରେଡ୍ ରିହଲସଲ ହେବ । ୧୫ ତାରିଖ ଦିନ ରାଜ୍ୟସ୍ତରୀୟ ପରେଡ୍ ସକାଳ ୬ଟାରୁ ଆରମ୍ଭ ହେବ ବୋଲି ସୂଚନା ଦିଆଯାଇଛି । ତେବେ ପରେଡର ନେତୃତ୍ୱ ନେଇ ଗର୍ବ ଅନୁଭବ ହେଉଛି ବୋଲି କହିଛନ୍ତି ଆଇପିଏସ୍ ଭୋସଲେ ଶୁଭମ ସଞ୍ଜୟ ।
ଅନ୍ୟପକ୍ଷରେ କମିଶନରେଟ ପୋଲିସ ପକ୍ଷରୁ ଟ୍ରାଫିକ କଟକଣା ଜାରି କରାଯାଇଛି । ପରେଡ୍ ସମୟରେ କଟକଣା ରହିବ । ଏହି ସମୟରେ କୌଣସି ପ୍ରକାର ଭାରିଯାନ ରାମ ମନ୍ଦିର ଏବଂ ରାଜ ମହଲ ପାର୍ଶ୍ବରୁ ମାଷ୍ଟରକ୍ୟାଣ୍ଟିନ୍ କ୍ୟାଣ୍ଟିନ୍ ଛକ ଯିବାକୁ ଯିବାକୁ ଦିଆଯିବ ନାହିଁ । କେବଳ ଦୁଇ ଚକିଆ ତଥା ହାଲୁକା ଯାନ ରାଜ ରାଜମହଲ ଛକରୁ ମାଷ୍ଟରକ୍ୟାଣ୍ଟିନ୍ ଆଡ଼କୁ ଆସି ପାରିବ କିନ୍ତୁ ପିଏମ୍‌ଜି ଛକ ଆଡ଼କୁ ଯିବା ପାଇଁ ଅନୁମତି ଦିଆଯିବ ନାହିଁ । ହାଉସିଂ ବୋର୍ଡ ଛକ ପାର୍ଶ୍ବରୁ ରବୀନ୍ଦ୍ର ମଣ୍ଡପ ଆଡକୁ ଆସୁଥିବା ଯାନବାହନ ଗୁଡ଼ିକ କେଶରୀ ଟକିଜ ଠାରୁ ବାମପାର୍ଶ୍ଵ ଲେନ୍‌ରେ ଯିବ ।