Garvita Odia
ବୀରମିତ୍ରପୁର: ଅନ୍ତର୍ରାଷ୍ଟ୍ରୀୟ ହିନ୍ଦୁ ପରିଷଦର ଅଧ୍ୟକ୍ଷ ପ୍ରବୀଣଭାଇ ତୋଗାଡିଆ ଆଜି ସୁନ୍ଦରଗଡ଼ ଜିଲ୍ଲାର ଏକ କାର୍ୟ୍ୟକ୍ରମରେ ବୀରମିତ୍ରପୁର ଗସ୍ତରେ ଆସିଥିଲେ । ଓଡ଼ିଶା-ଝାଡ଼ଖଣ୍ଡ ସୀମାନ୍ତ ନିକଟରେ ତାଙ୍କ ଶୁଭେଚ୍ଛୁମାନେ ସ୍ୱାଗତ ସମ୍ବର୍ଦ୍ଧନା ଜ୍ଞାପନ କରିଥିଲେ । ବିଭିନ୍ନ ହିନ୍ଦୁ ସଂଗଠନର କର୍ମକର୍ତ୍ତା ମାନେ ପୁଷ୍ପ ଗୁଚ୍ଛ ଓ ଉତ୍ତରୀୟ ଦେଇ ଶ୍ରୀ ତୋଗାଡିଆଙ୍କୁ ସ୍ୱାଗତ ଜଣାଇଥିଲେ । ସେ ମାରୱାଡ଼ି ଧର୍ମଶାଳା ରେ ଏକ ସାଧାରଣ ସଭାରେ ଯୋଗଦେଇ ହିନ୍ଦୁମାନଙ୍କୁ ସଂଗଠିତ ହେବାକୁ ଆହ୍ୱାନ ଦେଇଥିଲେ
ସେ କହିଥିଲେ, ହିନ୍ଦୁମାନଙ୍କର ସଂଖ୍ୟା ଦ୍ରୁତ ଗତିରେ କମୁଛି । ଆଗାମୀ ଦିନରେ ହିନ୍ଦୁ ଜନସଂଖ୍ୟା ୫୦ ପ୍ରତିଶତକୁ କମି ଯିବ । ସେଥିପାଇଁ ହିନ୍ଦୁମାନଙ୍କୁ ୩ ସନ୍ତାନ ପରିବାର ଓ ଜାଗ୍ରତ ହୋଇ ଏକାଠି ହେବା ପାଇଁ ପରାମର୍ଶ ଦେଇଥିଲେ । ସେ ଆହୁରି କହିଥିଲେ, ଆମେ ଆମର ହିନ୍ଦୁ ସଂସ୍କୃତି ପାଳନ କରୁ ନାହିଁ । ଅନ୍ୟ ସମ୍ପ୍ରଦାୟର ଲୋକେ ଯେପରି ପ୍ରତ୍ୟେକ ସପ୍ତାହ ନିଜ ଧର୍ମ ସ୍ଥଳକୁ ଯାଇ ନିଜର ଧର୍ମର ଉନ୍ନତି ପାଇଁ ଆଲୋଚନା କରନ୍ତି । କିନ୍ତୁ ଆମେ ତାହା କରୁ ନାହୁଁ । ଘରେ ନିୟମିତ ପୂଜା କରିବା, ସପ୍ତାହରେ ଦୁଇଥର ହନୁମାନ ଚାଳିଶା ପାଠ କରିବା, ସପ୍ତାହରେ ଦୁଇ ଦିନ ମନ୍ଦିର ଯିବା, ତୁଳସୀ ମାତାର ପୂଜା କରିବା, ଆମର କର୍ତ୍ତବ୍ୟ ।
ସେ କହିଲେ ହିନ୍ଦୁ ମାନଙ୍କୁ ହିନ୍ଦୁ ଲାକ ଠାରୁ ଆବଶ୍ୟକ ଜିନିଷ କିଣିବା ଉଚିତ୍ । ଆମେ ପ୍ରଥମୀ ହିନ୍ଦୁ, ପରେ ଆମର ଜାତି । ଆମେ ଭାରତ ମାତାର ସନ୍ତାନ । ଆମେ ଜାଗୃତ ନ ହେଲେ ଆମର ସୁରକ୍ଷା ପ୍ରତି ବିପଦ । ଦିଲ୍ଲୀର ତରୁଣ ଘଟଣା ଏହାର ଏକ ଜ୍ୱଳନ୍ତ ଉଦାହରଣ । ପରେ ସେ ରାଉରକେଲା ଅଭିମୁଖେ ଯାତ୍ରା କରିଥିଲେ । ତାଙ୍କର ଏହି କାର୍ୟ୍ୟକ୍ରମ ପାଇଁ ପୁଲିସ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା । ଏସଡିପିଓ ସୁଶାନ୍ତ ଦାସ, ଆଇଆଇସି ରାମ ପ୍ରସାଦ ନାଗ ସହିତ ଅନ୍ୟ ପୁଲିସ ଅଧିକାରୀଙ୍କ ସହ ଚାରି ପ୍ଲାଟୁନ ପୁଲିସ ଫୋର୍ସ କାର୍ୟକ୍ରମରେ ଉପସ୍ଥିତ ଥିଲେ ।
