Garvita Odia
ଭୁବନେଶ୍ୱର: ରାଜ୍ୟରେ କାର୍ଯ୍ୟରତ ସାମ୍ୱାଦିକଙ୍କ ସ୍ୱାସ୍ଥ୍ୟ ସେବା ପାଇଁ “ଗୋପବନ୍ଧୁ ସାମ୍ୱାଦିକ ସ୍ୱାସ୍ଥ୍ୟ ବୀମା ଯୋଜନା’ ରହିଛି । ହେଲେ ଏବେ ରାଜ୍ୟ ସରକାର ଏଥିରେ ପରିବର୍ତ୍ତନ କରିବାକୁ ମସୁଧା କରୁଛନ୍ତି । ସାମ୍ବାଦିକଙ୍କ ପାଇଁ ଥିବା ଗୋପବନ୍ଧୁ ସ୍ୱାସ୍ଥ୍ୟ ବୀମା ଯୋଜନା ପରିବର୍ତ୍ତନ କରି ଆୟୁଷ୍ମାନ ଭାରତ ସହ ମିଶାଇବାକୁ ଉଦ୍ୟମ କରୁଥିବା ନେଇ ଖବର ପ୍ରଘଟ ହେବା ପରେ ରାଜ୍ୟବ୍ୟାପୀ ସାମ୍ବାଦିକ ମହଲରେ ଅସନ୍ତୋଷ ଦେଖାଦେଇଛି ।
ସାମ୍ୱାଦିକଙ୍କ ସ୍ୱାସ୍ଥ୍ୟ ସେବା ପାଇଁ “ଗୋପବନ୍ଧୁ ସାମ୍ୱାଦିକ ସ୍ୱାସ୍ଥ୍ୟ ବୀମା ଯୋଜନା’କୁ ଉଚ୍ଛେଦ କରି ଆୟୁଷ୍ମାନ ଭାରତ ଯୋଜନାରେ ଅନ୍ତର୍ଭୁକ୍ତ ପ୍ରତିବାଦରେ ଉତ୍କଳ ସାମ୍ବାଦିକ ସଂଘ ପକ୍ଷରୁ ଅତିରିକ୍ତ ମୁଖ୍ୟ ଶାସନ ସଚିବ ଓ ବିଭାଗୀୟ ନିର୍ଦ୍ଦେଶକଙ୍କୁ ସ୍ମାରକ ପତ୍ର ପ୍ରଦାନ କରାଯାଇଛି । ତଥାପି ନିବୃତ୍ତ ନହେଲେ ରାଜ୍ୟର କାର୍ଯ୍ୟରତ ସାମ୍ୱାଦିକଙ୍କ ସ୍ୱାର୍ଥ ସୁରକ୍ଷା ପରୀପ୍ରେକ୍ଷୀରେ ଉତ୍କଳ ସାମ୍ୱାଦିକ ସଂଘ ରାଜ୍ୟବ୍ୟାପୀ ପ୍ରତିବାଦ କରିବାକୁ ବାଧ୍ୟ ହେବ ବୋଲି ସଂଘର ରାଜ୍ୟ ସଭାପତି ବିଭୂତି ଭୂଷଣ କର ଚେତାବନୀ ଦେଇଛନ୍ତି ।
ସେହିପରି ଓଡ଼ିଶା ୟୁନିୟନ ଅଫ୍ ଜର୍ଣ୍ଣାଲିଷ୍ଟସ୍ (ଓୟୁଜେ) ସଭାପତି ପ୍ରସନ୍ନ ମହାନ୍ତି କହିଛନ୍ତି, ବହୁତ ସଂଗ୍ରାମ ପରେ ସାମ୍ୱାଦିକଙ୍କ ପାଇଁ ସ୍ୱତନ୍ତ୍ର ସ୍ୱାସ୍ଥ୍ୟ ଯୋଜନା ହୋଇଥିଲ । ଏହାକୁ ଆୟୁଷ୍ମାନ ଯୋଜନା ସହ ଯୋଡ଼ିଲେ ଘାତକ ନିଷ୍ପତ୍ତି ହେବ । କିଛି ରାଜ୍ୟରେ ଏହାକୁ ଲାଗୁ କରାଗଲାଣି । ଯେଉଁମାନେ ଏହା ସପକ୍ଷରେ ଯୁକ୍ତି ଦର୍ଶାଉଛନ୍ତି, ସେମାନେ ସାମ୍ୱାଦିକ ବିରୋଧୀ । ଆୟୁଷ୍ମାନ ସହ ଯୋଡିଲେ ଏହାର ସ୍ୱତନ୍ତ୍ରତା ଲୋପ ପାଇଯିବ । ଆମେ ଦାବି କରୁଛୁ, ଏହାର ଅର୍ଥ ରାଶିକୁ ୫ ଲକ୍ଷରୁ ବୃଦ୍ଧି କରାଯାଇ ୧୦ ଲକ୍ଷ କରାଯାଉ । ଅଧିକ ସୁବିଧା ସୁଯୋଗ ଦେବା ବଦଳରେ କମାଉଛନ୍ତି। ସରକାର ଆସିବାର ପ୍ରଥମ ବର୍ଷରୁ ଏହାକୁ ଯୋଡିବାକୁ ଚେଷ୍ଟା କରୁଛନ୍ତି । ଆଗକୁ ସାରା ରାଜ୍ୟରେ ଓୟୁଜେ ଆନ୍ଦୋଳନ କରିବ । ଏହାକୁ କରାଇ ଦିଆଯିବ ନାହିଁ ବୋଲି ଶ୍ରୀ ମହାନ୍ତି ଚେତାବନୀ ଦେଇଛନ୍ତି ।
ଏହି ପ୍ରସଙ୍ଗରେ କେବଳ ସାମ୍ବାଦିକ ନୁହଁନ୍ତି, ବିଭିନ୍ନ ରାଜନୈତିକ ଦଳ ମଧ୍ୟ ମୁହଁ ଖୋଲିଛନ୍ତି । ସାମ୍ବାଦିକଙ୍କ ସପକ୍ଷରେ ମତ ରଖିଛନ୍ତି । ବିଜେଡି ବିଧାୟକ ପ୍ରଦୀପ ଦିଶାରୀ କହିଛନ୍ତି, ବିଜେଡି ସରକାରଙ୍କ ସମୟରେ ସାମ୍ୱାଦିକଙ୍କ ଚିକିତ୍ସା ପାଇଁ ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସ୍ୱାସ୍ଥ୍ୟ କାର୍ଡ କରିଥିଲେ । ହେଲେ ବିଜେପି ସରକାର ଏବେ ଆୟୁଷ୍ମାନ ଯୋଜନାରେ ଏହାକୁ ମିଶାଇବାକୁ ଯାଉଛନ୍ତି । ଆୟୁଷ୍ମାନ କାର୍ଡରେ ସାଧାରଣ ଲୋକ ଠିକ୍ରେ ଚିକିତ୍ସା ପାଇ ପାରୁନାହାନ୍ତି । ଲୋକ ହଇରାଣ ହେଉଛନ୍ତି । ସାମ୍ୱାଦିକ କ’ଣ ପାଇବେ । ଏ ସରକାର ସାମ୍ୱାଦିକଙ୍କୁ ଅଣଦେଖା କରୁଛନ୍ତି । ଯାହା କି ଦୁଃଖଦାୟକ । ଆମେ ସରକାରଙ୍କୁ ନିବେଦନ କରୁଛୁ, ଏଥିରୁ ନିବୃତ୍ତ ରୁହନ୍ତୁ । ନହେଲେ ଆମେ ଏହାକୁ ବିଧାନସଭାରେ ଉଠାଇବୁ । ସାମ୍ୱାଦିକଙ୍କ ଅଧିକାର ପାଇଁ ଲଢେଇ କରିବୁ । ସାମ୍ୱାଦିକ କୋଭିଡ ସମୟରେ ଜୀବନକୁ ବାଜି ଲଗାଇ କାମ କରୁଥିଲେ । ଏବେ ବନ୍ୟା ସମୟରେ ମଧ୍ୟ ବିପଦପୂର୍ଣ୍ଣ ସ୍ଥାନରେ କାମ କରୁଛନ୍ତି । ତେଣୁ ତାଙ୍କ ପାଇଁ ସରକାର ଏ ଯୋଜନାକୁ ଅଧିକ କ୍ରିୟାଶୀଳ କରନ୍ତୁ । ନ ହେଲେ ବିଜେଡି ଆନ୍ଦୋଳନକୁ ଓହ୍ଲାଇବ ବୋଲି ଶ୍ରୀ ଦିଶାରୀ ସତର୍କ କରାଇଛନ୍ତି ।
କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ କହିଛନ୍ତି, ଆୟୁଷ୍ମାନ କାର୍ଡରେ ସବୁ ଲୋକ ସାମିଲ ହୋଇ ପାରୁନାହାନ୍ତି । ଲୋକେ ଏଥିରେ ହଇରାଣ ହେଉଛନ୍ତି । ପୁଣି ଏଥିରେ ସାମ୍ୱାଦିକଙ୍କୁ ସାମିଲ କରିବା ଠିକ୍ ନୁହେଁ । ସାମ୍ୱାଦିକମାନଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା କାଟିବା ଠିକ୍ ନୁହେଁ । ଏ ନେଇ ମୁଁ ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ଦାବି କରିବି ବୋଲି ଶ୍ରୀ କାଡ଼ାମ କହିଛନ୍ତି ।
କଂଗ୍ରେସ ବିଧାୟକ ଦଳ ଉପନେତା ଅଶୋକ ଦାସ କହିଛନ୍ତି, ରାଜ୍ୟରେ ଆୟୁଷ୍ମାନ ଯୋଜନା ବାଟବଣା ହୋଇଛି । ଏ ପର୍ଯ୍ୟନ୍ତ ଆୟୁଷ୍ମାନ ଯୋଜନାର ନୀତି ନିୟମ ନାହିଁ । ଲୋକମାନେ ହଇରାଣ ହେଉଛନ୍ତି । ସାମ୍ୱାଦିକଙ୍କୁ ଏଥିରେ ଅନ୍ତର୍ଭୁକ୍ତ କରିବା ନିନ୍ଦନୀୟ । ସେମାନଙ୍କୁ ପୂର୍ବ ଭଳି ଗୋପବନ୍ଧୁ ସାମ୍ୱାଦିକ ସ୍ୱାସ୍ଥ୍ୟ ବୀମା ଯୋଜନାରେ ସାମିଲ କରାଯାଉ ବୋଲି ଶ୍ରୀ ଦାସ ସରକାରଙ୍କ ନିକଟରେ ଦାବି କରିଛନ୍ତି ।
ଅନ୍ୟପକ୍ଷରେ ସ୍ୱାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ କହିଛନ୍ତି, ଆୟୁଷ୍ମାନ ଯୋଜନାରେ ସାମ୍ୱାଦିକଙ୍କୁ ସାମିଲ କରିବା ନେଇ ପ୍ରକ୍ରିୟା ଆରମ୍ଭ ହୋଇଛି । ଗତ ଦିନରେ ମୁଖ୍ୟମନ୍ତ୍ରୀଙ୍କ ଅଧକ୍ଷତାରେ ସ୍ୱାସ୍ଥ୍ୟ ବିଭାଗ, ସୂଚନା ଓ ଲୋକ ସମ୍ପର୍କ ବିଭାଗ ସହ ବୈଠକ ବସିଥିଲା ଯେଉଁଥିରେ ସାମ୍ୱାଦିକଙ୍କ ସମସ୍ୟା ଉପରେ ଆଲୋଚନା ହୋଇଥିଲା । ସାମ୍ୱାଦିକଙ୍କ ସ୍ୱାସ୍ଥ୍ୟକୁ ନେଇ ସରକାର ଦାୟିତ୍ୱବାନ ଅଛନ୍ତି। ଯଦି ସାମ୍ୱାଦିକମାନେ ଆୟୁଷ୍ମାନରେ ସାମିଲ ହେବା ପାଇଁ ମନା କରୁଛନ୍ତି, ସରକାର ଏହାର ତର୍ଜମା କରିବେ ବୋଲି ଶ୍ରୀ ମହାଲିଙ୍ଗ କହିଛନ୍ତିି ।
