ପୀଡ଼ିତାଙ୍କୁ ରକ୍ଷା କରିଥିବା ସହପାଠୀମାନଙ୍କୁ ଦାୟୀ କରିବା ଏକ ରାଜନୈତିକ ଷଡ଼ଯନ୍ତ୍ର:ଏବିଭିପି

ଭୁବନେଶ୍ବର: ବାଲେଶ୍ୱର ଏଫଏମ ସ୍ବୟଂଶାସିତ କଲେଜ ଛାତ୍ରୀ ପୋଡ଼ି ହୋଇ ନିଜ ଜୀବନ ନେବା ଘଟଣାରେ ତାଙ୍କୁ ବଞ୍ଚାଇବାର ପ୍ରୟାସ କରିଥିବା ଛାତ୍ରଙ୍କୁ ପୁଲିସ ଗିରଫ କରିବା ନେଇ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ(ଏଭିବିପି) ମୁହଁ ଖୋଲିଛି। ଘଟଣାରେ ଏବିଭିପି ପକ୍ଷରୁ କଲେଜ ଏବଂ ପୁଲିସର ବିଫଳତା ରହିଥିବା ଦର୍ଶାଯାଇଛି। ପୀଡ଼ିତାଙ୍କୁ ରକ୍ଷା କରିଥିବା ସହପାଠୀମାନଙ୍କୁ ଦାୟୀ କରିବା ଏକ ରାଜନୈତିକ ଷଡ଼ଯନ୍ତ୍ର ବୋଲି ଏବିଭିପି ପକ୍ଷରୁ କୁହାଯାଇଛି।ଚରିତ୍ରକୁ ବଦନାମ କରୁଥିବା ରାଜନୈତିକ ତତ୍ତ୍ୱମାନଙ୍କୁ ସୁରକ୍ଷା ଦେବା କାର୍ୟ୍ୟ ଓଡ଼ିଶା ପୁଲିସ ବନ୍ଦ କରିବା ଉଚିତ୍ ବୋଲି ଏବିଭିପି ପକ୍ଷରୁ ପ୍ରକାଶିତ ଏକ ପ୍ରେସ୍ ବିଜ୍ଞପ୍ତିରେ କୁହାଯାଇଛି।ଅଖିଳ ଭାରତୀୟ ବିଦ୍ୟାର୍ଥୀ ପରିଷଦର କର୍ମୀ ମୃତ ଛାତ୍ରୀଙ୍କ ହୃଦୟ ବିଦାରକ ଆତ୍ମହତ୍ୟା ଘଟଣାରେ, ପୁଲିସ ପ୍ରଶାସନ ବିଳମ୍ବିତ ରାତିରେ ଦୁଇ ସହପାଠୀଙ୍କୁ ଗିରଫ କରିବା ଅତ୍ୟନ୍ତ ପକ୍ଷପାତପୂର୍ଣ୍ଣ ଘଟଣା ଯାହା ଏକ ଗଭୀର ରାଜନୈତିକ ଷଡ଼ଯନ୍ତ୍ରକୁ ଦର୍ଶାଉଛି। ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ ପକ୍ଷରୁ ରାଜନୈତିକ ସୂତ୍ରଧରଙ୍କୁ ବଞ୍ଚାଇବା ପାଇଁ ପୁଲିସ ପ୍ରଶାସନର ବିଫଳ ପ୍ରୟାସକୁ ଦୃଢ଼ ନିନ୍ଦା କରାଯାଇଛି।
ଛାତ୍ରୀଙ୍କ ଉପରେ ଯୌନ ଶୋଷଣର ଚାପ ପକାଇଥିବା ବିଭାଗ ଅଧ୍ୟକ୍ଷ(ଏଚଓଡି) କଂଗ୍ରେସ ଏବଂ ବିଜେଡିର ଛାତ୍ର ସଂଗଠନର ପଦାଧିକାରୀମାନେ ସୋସିଆଲ ମିଡିଆରେ ଛାତ୍ରୀଙ୍କ ଚରିତ୍ର ହନନର ପ୍ରୟାସ। ଯୌନ ଶୋଷଣ ଏବଂ ସରକାର ଓ ପ୍ରଶାସନ ଦ୍ୱାରା ବାରମ୍ବାର ଅବହେଳା ଯୋଗୁ ଚାପଗ୍ରସ୍ତ ପରେ ମାନସିକ ନିର୍ୟାତନା ଯୋଗୁ ନିଜ ଜୀବନ ନେବାର ହୃଦୟ ବିଦାରକ ଘଟଣା ସମଗ୍ର ସମାଜକୁ ଦୋହଲାଇ ଦେଇଛି। ଏହି ଘଟଣା କେବଳ ଏକ ଦୁର୍ଘଟଣାଜନିତ ଘଟଣା ନୁହେଁ ବରଂ ଦୀର୍ଘକାଳୀନ ମାନସିକ ଏବଂ ସାଂଗଠନିକ ଚାପର ପରିଣାମ ଯାହା ଜଣେ ଛାତ୍ରୀଙ୍କୁ ଏତେ ଅସହାୟ ଏବଂ ଅସୁରକ୍ଷିତ ଅନୁଭବ କରାଇଥିଲା ଯେ, ସେ ଏହି ଯନ୍ତ୍ରଣାଦାୟକ ପଦକ୍ଷେପ ନେଇଥିଲେ। ଛାତ୍ରୀଙ୍କ ସହ ହୋଇଥିବା ଅନ୍ୟାୟ, ଅବହେଳା ଏବଂ ସେ ହୋଇଥିବା ହଇରାଣ ଏହି ଦୁଃଖଦ ଘଟଣାର ମୂଳ କାରଣ। ନ୍ୟାୟ ପାଇଁ ତାଙ୍କର ପ୍ରୟାସ, ଅଭିଯୋଗକୁ ବାରମ୍ବାର ଅଣଦେଖା କରାଯାଇଥିଲା, ଯାହା ତାଙ୍କୁ ଗଭୀର ମାନସିକ ସଙ୍କଟ ଆଡ଼କୁ ନେଇଯାଇଥିଲା।
ଘଟଣା ପରେ ଓଡ଼ିଶା ପୁଲିସର ମନୋଭାବ ଗମ୍ଭୀର ଚିନ୍ତାର ବିଷୟ। କଂଗ୍ରେସ ଏବଂ ବିଜେଡି ସହଯୋଗୀ ଛାତ୍ର ସଂଗଠନର ପଦାଧିକାରୀମାନଙ୍କ ବିରୁଦ୍ଧରେ ପୁଲିସ କାର୍ୟ୍ୟାନୁଷ୍ଠାନ ନେଇନାହିଁ ଯେଉଁମାନେ ଛାତ୍ରୀଙ୍କୁ ବଦନାମ କରିଛନ୍ତି ଏବଂ ଯୌନ ନିର୍ୟାତନା ବିରୁଦ୍ଧରେ ତାଙ୍କର ଚାଲିଥିବା ଲଢ଼େଇକୁ ଦୁର୍ବଳ କରିବା ପାଇଁ ତାଙ୍କୁ ମାନସିକ ଭାବରେ ହଇରାଣ କରିଛନ୍ତି। ଅନ୍ୟପକ୍ଷରେ, ଛାତ୍ରୀଙ୍କୁ ରକ୍ଷା କରିବାକୁ ଚେଷ୍ଟା କରିଥିବା ଏବଂ ନିଜେ ପୋଡ଼ି ହୋଇ ଯାଇଥିବା ତଥା ସମ୍ପ୍ରତି ହସ୍ପିଟାଲରୁ ଡିସଚାର୍ଜ ହୋଇଥିବା ଏବିଭିପି କର୍ମୀଙ୍କୁ ପୁଲିସ ଗିରଫ କରିଛି। ଏହି ମନୋଭାବ କେବଳ ଓଡ଼ିଶା ପୁଲିସର ବିଫଳତାକୁ ପ୍ରତିଫଳିତ କରୁ ନାହିଁ ବରଂ ପୁଲିସର ପକ୍ଷପାତୀ ମନୋଭାବକୁ ମଧ୍ୟ ପ୍ରକାଶ କରୁଛି ବୋଲି ପ୍ରେସ୍ ବିଜ୍ଞପ୍ତିରେ କୁହାଯାଇଛି।