‘ବସ୍ତାନି ଭାରି କିନ୍ତୁ ପାଠ ଘର ଶୂନ: ନବୀନ

ଭୁବନେଶ୍ବର: ସରିଲା ପ୍ରଥମ ପର୍ୟ୍ୟାୟ ବଜେଟ ଅଧିବେଶନ । ଫେବୃଆରୀ ୧୩ ତାରିଖକୁ ଆରମ୍ଭ ହୋଇ ୮ ଦିନ ଧରି ଚାଲିବା ପରେ ଶେଷ ହୋଇଛି । ଆସନ୍ତା ମାର୍ଚ୍ଚ ୭ରୁ ଦ୍ବିତୀୟ ପର୍ୟ୍ୟାୟ ଅଧିବେଶନ ଆରମ୍ଭ ହେବ । ଶେଷ ଦିନରେ ବଜେଟ ଆଲୋଚନାରେ ଭାଗ ନେଇଥିଲେ ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ । ସରକାର ଆଣିଥିବା ବଜେଟର ବିଭିନ୍ନ ଦିଗକୁ ନେଇ ନବୀନ ନିଜର ମତ ରଖିଥିଲେ । ବସ୍ତାନି ଭାରି କିନ୍ତୁ ପାଠ ଘର ଶୂନ ଭଳି ସଦୃଶ ହୋଇଛି ବୋଲି ସରକାରଙ୍କୁ କଟାକ୍ଷ କରିଥିଲେ ନବୀନ ।
ସେ କହିଛନ୍ତି “ଆମର ମିଶନ ଶକ୍ତି ମହିଳା ରାଜରାସ୍ତାରେ ବସିଛନ୍ତି । ଉପଯୁକ୍ତ ଦାବି ପୂରଣ କରିବା ପାଇଁ ଦାବି କରୁଛନ୍ତି । ୨୦୨୭ ସୁଦ୍ଧା ୨୫ ଲକ୍ଷ ଲକ୍ଷପତି ଦିଦି ସୃଷ୍ଟି କରିବାକୁ ବିଜେପି ସରକାର ପ୍ରତିଶ୍ରୁତି ଦେଇଛନ୍ତି । ଲକ୍ଷପତି ଦିଦିଙ୍କ ତାଲିକା ଗୃହରେ ପ୍ରଦାନ କରିବାକୁ ମୁଁ ବିଜେପି ସରକାରଙ୍କ ନିକଟରେ ଗତ ବକ୍ତବ୍ୟ ସମୟରେ ଦାବି କରିଥିଲି । ତାଲିକା ପ୍ରଦାନ କରିବା ବଦଳରେ ସରକାର ମିଶନ ଶକ୍ତି ପାଇଁ ଅର୍ଥ ହ୍ରାସ କରିଛନ୍ତି ସରକାର । ଓଡିଶା ଲୋକଙ୍କ ସମସ୍ୟା ଦୂର କରିବା ପରିବର୍ତ୍ତେ ଏହାକୁ ଏଡ଼ାଇବା ଲାଗି ବଜେଟରେ ସୁନ୍ଦର ସ୍ଲୋଗାନ ଦିଆଯାଇଛି । ଯାହା ବସ୍ତାନି ଭାରି କିନ୍ତୁ ପାଠ ଘର ଶୂନ ଭଳି ସଦୃଶ ହୋଇଛି ।
”ରାଜ୍ୟର ଆର୍ଥିକ ସ୍ୱାସ୍ଥ୍ୟ ପାଇଁ ବିଜେପି ସରକାର ବିଜେଡିକୁ ଧନ୍ୟବାଦ ଦେବା ଉଚିତ । କାରଣ ବିଜେପିକୁ ଉତ୍ତରାଧିକାରୀ ସୁତ୍ରରେ ଏକ ସୁସ୍ଥ ଆର୍ଥିକ ବ୍ୟବସ୍ଥା ବିଜେଡି ଦେଇଛି । ଏହା କେନ୍ଦ୍ର ସରକାରଙ୍କ ହ୍ୟାଣ୍ଡଆଉଟ ଉପରେ ନିର୍ଭର ନକରି ବିକାଶ ପ୍ରକଳ୍ପଗୁଡିକ ପାଇଁ ଅତି କମରେ ପାଣ୍ଠି ଯୋଗାଇବାରେ ସକ୍ଷମ ଅଟେ । ଯାହା ଏଥିରୁ ସ୍ପଷ୍ଟ ହୋଇଛି ଯେ ବଜେଟର ଅଧାରୁ ଅଧିକ ଅର୍ଥ ଓଡିଶାର ନିଜସ୍ୱ ଟିକସ ରାଜସ୍ୱ । ଯାହା ରାଜ୍ୟର ନିଜସ୍ୱ ଟ୍ୟାକ୍ସ, ରାଜ୍ୟର ନିଜସ୍ୱ ଅଣ ଟ୍ୟାକ୍ସ ଏବଂ ଅଂଶୀଦାର କର ଅଟେ । ଭୁବନେଶ୍ୱରରେ ଟ୍ରାଫିକକୁ ହ୍ରାସ କରିବାକୁ ସିଟି ରୋଡ ଯୋଜନା ହୋଇଛି । ଚଳିତ ବର୍ଷର ବଜେଟରେ ଉଲ୍ଲେଖ କରାଯାଇଛି । କିନ୍ତୁ ଡବଲ ଇଞ୍ଜିନ ସରକାର ଭୁବନେଶ୍ୱର ମେଟ୍ରୋ ରେଳ ପ୍ରକଳ୍ପ ପାଇଁ ଆର୍ଥିକ ଆବଣ୍ଟନ ହ୍ରାସ କରିଛନ୍ତି ।