ବିମାନ ବାତିଲକୁ ନେଇ ଭୁବନେଶ୍ୱର ବିମାନବନ୍ଦରରେ ମହିଳା ଯାତ୍ରୀଙ୍କ ହାଇଡ୍ରାମା

ଭୁବନେଶ୍ବର: ବିମାନ ବାତିଲକୁ ନେଇ ଭୁବନେଶ୍ୱର ବିମାନବନ୍ଦରରେ ହାଇଡ୍ରାମା । ଯାନ୍ତ୍ରିକ ତ୍ରୁଟି ଯୋଗୁଁ ଫ୍ଲାଇଟ୍ ବାତିଲ ହେବା ପରେ ଉତ୍ତେଜିତ ହେଲେ ମହିଳା ଯାତ୍ରୀ । ରାଗରେ ବିମାନ ବନ୍ଦରରେ ଥିବା କିଛି ଉପକରଣ ଭାଙ୍ଗିଥିବା ଅଭିଯୋଗ ହୋଇଛି । ମନିଟର, କିବୋର୍ଡ ଓ ପାସପୋର୍ଟ ସ୍କାନିଂ ମେସିନ୍ କ୍ଷତିଗ୍ରସ୍ତ ହୋଇଥିବା ବେଳେ ଘଟଣାକୁ ନେଇ ଏୟାରପୋର୍ଟ ଥାନାରେ ଅଭିଯୋଗ ହୋଇଛି ।
କ୍ଷତିଗ୍ରସ୍ତ ସାମଗ୍ରୀ ମଧ୍ୟରେ ମନିଟର, କିବୋର୍ଡ ଏବଂ ପାସପୋର୍ଟ ସ୍କାନିଂ ମେସିନ୍ ରହିଛି । ଏଗୁଡ଼ିକର ଆନୁମାନିକ ମୂଲ୍ୟ ଯଥାକ୍ରମେ ୨୨ ହଜାର, ୫ ହଜାର ଏବଂ ୨୩ ହଜାର ବୋଲି ବିମାନ ବନ୍ଦର ପକ୍ଷରୁ ଦର୍ଶାଯାଇଛି । ତେବେ ତିନୋଟି ସାମଗ୍ରୀର ଦର ମିଶାଇଲେ ମୋଟ କ୍ଷତିର ପରିମାଣ ପ୍ରାୟ 50 ହଜାର ଟଙ୍କା ହେବ ।
ସୂଚନା ଅନୁସାରେ ଯାତ୍ରୀ ମାମୋନି ଖରାଟ ଇଣ୍ଡିଗୋର 6E 7352 ବିମାନରେ ଭୁବନେଶ୍ୱରରୁ କୋଲକାତା ଯିବା ପାଇଁ ବୁକିଂ କରିଥିଲେ । ବିମାନଟି ଭୁବନେଶ୍ବରରୁ ଅପରାହ୍ନ ସାଢେ 2ଟାରେ ଉଡାଣ ଭରିବାର ଥିଲା । କିନ୍ତୁ ସାଢେ 5ଟାରେ ଏହା ବାତିଲ ହୋଇଥିଲା । ଏହାପରେ ବିମାନ ଉଡାଣ ଭରିବା ନେଇ ଇଣ୍ଡିଗୋ କର୍ତ୍ତୃପକ୍ଷ କୌଣସି ସୂଚନା ଦେଇନଥିଲେ । ତେବେ ଯାନ୍ତ୍ରିକ ସମସ୍ୟା କାରଣରୁ ଯୋଗୁଁ ଉକ୍ତ ବିମାନଟି ବାତିଲ ହୋଇଥିଲା । ବିମାନ ବାତିଲ ପରେ ଯାତ୍ରୀ ଜଣକ ଉତ୍ତେଜିତ ହୋଇ ବିମାନବନ୍ଦରର କିଛି ସମ୍ପତ୍ତି ଓ ଉପକରଣ କ୍ଷତିଗ୍ରସ୍ତ କରିଥିବା ଅଭିଯୋଗ ହୋଇଛି । ଘଟଣା ସମୟରେ CISF, ଇଣ୍ଡିଗୋ, ଏୟାରପୋର୍ଟ ଅଥରିଟି ଅଫ୍ ଇଣ୍ଡିଆ (AAI)ର କର୍ମଚାରୀ ଉକ୍ତ ଯାତ୍ରୀଙ୍କୁ ବୁଝାସୁଝା କରିଥିଲେ ।
ଗତ ଗୁରୁବାର ସନ୍ଧ୍ୟା ସମୟରେ ଜଣେ ମହିଳା ଯାତ୍ରୀଙ୍କ ବିମାନ ବାତିଲ ହେବା ପରେ ସେ କିଭଳି ଭାବରେ ଉତ୍ତେଜିତ ହୋଇ ବିମାନ ବନ୍ଦରରେ ଥିବା କିଛି ଅତ୍ୟାଧୁନିକ ମେସିନ ଆଦି କ୍ଷତି ଘଟାଇଥିଲେ ତାହାର ଭିଡିଓ ଏବେ ଭାଇରାଲ ହେଉଛି । ଭିଡିଓରେ ମହିଳା ଜଣଙ୍କ ଉତ୍ତେଜିତ ହୋଇ ଭଙ୍ଗାରୁଜା କରୁଛନ୍ତି । କର୍ମଚାରୀଙ୍କୁ ଗାଳିଗୁଲଜ କରୁଥିବାର ମଧ୍ୟ ସ୍ପଷ୍ଟ ଜଣା ପଡ଼ୁଛି । ମହିଳା ଜଣଙ୍କର ପିଲାର ସ୍ୱାସ୍ଥ୍ୟବସ୍ଥା ଖରାପ ରହିଥିବା ନେଇ ସେ ବାରମ୍ବାର କହୁଥିବାର ଭିଡିଓରେ ଶୁଣିବାକୁ ମିଳୁଛି ।

ଏହି ଘଟଣା ପରେ ଅନ୍ୟ ଯାତ୍ରୀ ମାନେ ମହିଳାଙ୍କୁ ତୁରନ୍ତ ଅନ୍ୟ ଏକ ବିମାନ ଯୋଗେ ଗନ୍ତବ୍ୟ ସ୍ଥଳକୁ ପଠାଇବା ପାଇଁ ବିମାନ ବନ୍ଦର କର୍ତ୍ତୃପକ୍ଷହ୍କୁ ଅନୁରୋଧ କରିଥିଲେ । ଏହା ପରେ ଉକ୍ତ ଯାତ୍ରୀଙ୍କୁ ଏକ ବିମାନ ଯୋଗେ କଲିକତା ପଠାଯାଇଥିଲା । ତେବେ ଏତେ ମାତ୍ରାରେ କ୍ଷତି ଦେଖିବା ପରେ ବିମାନ ବନ୍ଦର ପକ୍ଷରୁ ଏୟାରପୋର୍ଟ ଥାନାରେ ଏକ ମାମଲା ରୁଜୁ ହୋଇଛି ।