ମହୁଲନାଳୀ ସାହି ବାସିନ୍ଦାଙ୍କୁ ବିସ୍ଥାପିତ ନ କରିବା ପାଇଁ ଦାବି

ଦେବଗଡ଼: ଦେବଗଡ ଜିଲ୍ଲା ରିଆମାଳ ବ୍ଲକ ମହେଳହିପଡା ପଂଚାୟତର ଗ୍ରାମରେ ସରକାର ସୋଲାର ପ୍ଲାଣ୍ଟ ବସାଇବା ପାଇଁ ସ୍ଥିର କରିଛନ୍ତି। ତେବେ ଏହାକୁ ନେଇ ଅଂଚଳବାସୀ ବିରୋଧ କରିଛନ୍ତି। ତେବେ ମହେଳହିପଡା ପଂଚାୟତର କ‌ାଦୋପଡା ଗ୍ରାମର ମହୁଲନାଳୀ ସାହି ବାସିନ୍ଦାଙ୍କୁ ବିସ୍ଥାପିତ ନ କରିବା ପାଇଁ ସ୍ଥାନୀୟ ବାସିନ୍ଦା ଦାବି କରିଛନ୍ତି। ‌ଏନେଇ ଆଜି ମହୁଲନାଳୀ ସାହି ବାସିନ୍ଦା ଜିଲ୍ଲାପାଳଙ୍କୁ ସାକ୍ଷାତ କରି ଏକ ଦାବି ପତ୍ର ଦେଇଛନ୍ତି। ଦାବି ପତ୍ର ପ୍ରଦାନ ବେଳେ ଜିଲ୍ଲା କୃଷକ ସଂଘର ସଭାପତି ପ୍ରମୋଦ ଝାଙ୍କର, ଓକିଲ ବିଭୂତି ଗଙ୍ଗଦେବ, ରେଖା ପ୍ରଧାନ, ନିରାକର ପ୍ରଧାନ,ଏଜରା କୁଜୁର, ଧରଣୀଧର ଦେହୁରୀ, ବିଜୟ ପ୍ରଧାନ, କୃତାର୍ଥ ସାହୁଙ୍କ ସମେତ ଅଂଚଳବାସୀ ଉପସ୍ଥିତ ଥିଲେ। ସୂଚନା ଅନୁଯାୟୀ,କାଦୋପଡା ଗ୍ରାମ ମହୁଲନାଳୀ ସାହି ବାସିନ୍ଦାଙ୍କୁ ୧୯୮୪ରେ ଉଷାକୋଠୀଜଙ୍ଗଲରୁ ବିସ୍ଥାପିତ କରି ସେହି ଗ୍ରାମରେ ଥଇଥାନ କରିଥିଲେ। ପୁର୍ନବାର ୧୯୮୮ ଓ ୧୯୯୨ ରେ ଆଉ କିଛି ଅଧିବାସୀଙ୍କୁ ମଧ୍ୟ ପୁନଃଥଇଥାନ କରିଥିଲେ। ଏବେ ବି ପୁଣି ସରକାର ସୋଲାର ପ୍ଲାଣ୍ଟ ବସାଇବା ପାଇଁ ସ୍ଥିର କରିଛନ୍ତି।ଯାହାକୁ ଅଂଚଳ ବାସୀ ବିରୋଧ କରିବା ସହ ବିଧାୟକଙ୍କ ସମେତ ଜିଲ୍ଲାର ଅନେକ ସଂଗଠନ ଓ ଅଞ୍ଚଳବାସୀଙ୍କୁ ନେଇ ଏକ ବୈଠକ ଅନୁଷ୍ଠିତ ହୋଇଥିଲା।ଉକ୍ତ ବୈଠକରେ ଏହାକୁ ବିରୋଧ କରିବା ପାଇଁ ନିଷ୍ପତ୍ତି ଗ୍ରହଣ କରାଯାଇଥିଲା। ତେବେ ମହେଳହିପଡା ପଂଚାୟତର କ‌ାଦୋପଡା ଗ୍ରାମର ମହୁଲନାଳୀ ସାହି ବାସିନ୍ଦାଙ୍କୁ ବିସ୍ଥାପିତ ନ କରିବା ପାଇଁ ସ୍ଥାନୀୟ ବାସିନ୍ଦା ଦାବି କରିଛନ୍ତି।