ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କୁ ଭେଟିଲେ ୭ ବିଜେଡି ସାଂସଦ

ଭୁବନେଶ୍ୱର : ପୂର୍ବତଟ ରେଳବାଇରୁ ୱାଲଟିୟରକୁ କାଢ଼ି ନେବା ନିଷ୍ପତ୍ତି ବିରୋଧରେ କେନ୍ଦ୍ର ରେଳମନ୍ତ୍ରୀଙ୍କ ନିକଟରେ ଦୃଢ଼ ପ୍ରତିବାଦ କରିଛି ବିଜେଡି। ଏହି ପ୍ରସଙ୍ଗରେ ବିଜେଡିର ସମସ୍ତ ରାଜ୍ୟସଭା ସାଂସଦ ରେଳମନ୍ତ୍ରୀଙ୍କୁ ଭେଟି ନିଷ୍ପତ୍ତିର ପୁନର୍ବିଚାର କରିବା ନିମନ୍ତେ ଦାବିପତ୍ର ପ୍ରଦାନ କରିଛନ୍ତି। ୱାଲଟିୟର ଡିଭିଜନରୁ ପୂର୍ବତଟ ରେଳପଥ ବାର୍ଷିକ ୧୦ ହଜାର କୋଟିରୁ ଅଧିକ ରାଜସ୍ୱ ପାଉଛି। କେନ୍ଦ୍ର ସରକାର ଯଦି ୱାଲଟିୟର ଡିଭିଜନକୁ ଅଲଗା କରନ୍ତି, ତାହେଲେ କ୍ରମାଗତ ଭାବେ ଭାରତୀୟ ରେଳବାଇକୁ ସର୍ବାଧିକ ରାଜସ୍ୱ ଦେଉଥିବା ପୂର୍ବତଟ ରେଳପଥ ବିପୁଳ ଆର୍ଥିର୍କ କ୍ଷତିର ସମ୍ମୁଖୀନ ହେବ ଓ ପରିଣତି ସ୍ୱରୂପ ଓଡ଼ିଶା କ୍ଷତିଗ୍ରସ୍ତ ହେବ।

ପୂର୍ବତଟ ରେଳପଥର ପରିସୀମା ହ୍ରାସ ପାଇବା ସହିତ ରାଜସ୍ୱ ବି କମିଯିବ। ଓଡିଶାର ବିକାଶରେ ବଡ଼ ଅଂଶଦାନ ଥିବା ୱାଲଟିୟର୍‌ ଡିଭିଜନ୍‌କୁ ଭାଗ କରିବା ପୂର୍ବତଟ ରେଳପଥ ପାଇଁ ମହଙ୍ଗା ପଡ଼ିବ। ତେଣୁ ପୂର୍ବତଟ ରେଳପଥକୁ ଭାଗଭାଗ କରିବା ପରିବର୍ତ୍ତେ ତାକୁ ଅଧିକ ସୁଦୃଢ଼ କରିବା ପାଇଁ ପଦକ୍ଷେପ ନେବାକୁ ବିଜେଡି ସାଂସଦ ଡ. ସସ୍ମିତ ପାତ୍ର, ମାନସ ରଞ୍ଜନ ମଙ୍ଗରାଜ, ସୁଲତା ଦେଓ, ମୁଜିବୁଲ୍ଲା ଖାନ୍‌, ଦେବାଶିଷ ସାମନ୍ତରାୟ, ଶୁଭାଶିଷ ଖୁଣ୍ଡିଆ ଓ ନିରଞ୍ଜନ ବିଶି ପ୍ରମୁଖ ରେଳମନ୍ତ୍ରୀଙ୍କୁ ଅନୁରୋଧ କରିଛନ୍ତି।