Garvita Odia
ଭୁବନେଶ୍ୱର: ଆଜି ନୂଆପଡ଼ା ଉପନିର୍ବାଚନ ନେଇ ଭୋଟ ଗଣତି ଚାଲିଛି । ତେବେ ବର୍ତ୍ତମାନର ଟ୍ରେଣ୍ଡ ଅନୁସାରେ ବିଜେପି ପ୍ରାର୍ଥୀ ଜୟ ଢେ଼ାଲକିଆ ବଡ଼ ବିଜୟ ମୁଖେ ଅଗ୍ରସର ହେଉଛନ୍ତି । ତେବେ ନୂଆପଡ଼ାରେ ଲୋକେ ପରିବର୍ତ୍ତନ ଚାହୁଁଥିଲେ । ଯାହାର ପ୍ରତିଫଳନ ଭୋଟ ଗଣତିରୁ ସ୍ପଷ୍ଟ ହେବାରେ ଲାଗିଛି ବୋଲି ବିଜେପି ରାଜ୍ୟ ସଭାପତି ମନମୋହନ ସାମଲ କହିଛନ୍ତି ।
ସେ କହିଛନ୍ତି ନୂଆପଡ଼ା ଏକ ସମସ୍ୟାବହୁଳ ନିର୍ବାଚନମଣ୍ଡଳୀ । ଏଠାରେ ଶିଳ୍ପ, କାରଖାନା ନାହିଁ । ଜଳସେଚନର ବ୍ୟବସ୍ଥା ହୋଇନାହିଁ । ଏସବୁ ସମସ୍ୟା ଦୂର କରିବା ପାଇଁ ଲୋକେ ପରିବର୍ତ୍ତନ ଚାହିଁଛନ୍ତି । ସେହିପରି କଂଗ୍ରେସର ଆରୋପ ନେଇ ମଧ୍ୟ ଶ୍ରୀ ସାମଲ ପ୍ରତିକ୍ରିୟା ରଖି କହିଛନ୍ତି ଯେ ଆମେ ବହୁବାର ହାରିଛୁ, ମାତ୍ର ଏଭଳି ଅଭିଯୋଗ କରିନାହୁଁ । ଅନ୍ୟକୁ ଦୋଷ ନଦେଇ ବିରୋଧୀ ଆତ୍ମସମୀକ୍ଷା କରନ୍ତୁ ।
ପ୍ରକାଶ ଯେ ନୂଆପଡ଼ା ଉପନିର୍ବାଚନରେ ଦଳର ପ୍ରଦର୍ଶନକୁ ନେଇ କଂଗ୍ରେସ ପ୍ରାର୍ଥୀ ଘାସିରାମ ମାଝୀ କ୍ଷୋଭ ପ୍ରକାଶ କରିବା ସହ କହିଥିଲେ ଯେ ଭୋଟର ଟଙ୍କାରେ କିଣି ହୋଇଗଲେ । ମାଟିର ପୁଅକୁ ଚିହ୍ନିଲେନି । କେନ୍ଦ୍ରୀୟ ନେତାଙ୍କ ସହାଯ୍ୟ, ସହଯୋଗ ମିଳିଲାନି । ଏହାଛଡ଼ା ସେ କହିଥିଲେ ଯେ ଆବ୍ରାହମ ଲିଙ୍କନ ୯ଥର ହାରିଥିଲେ, ମୁଁ ୬ ଥର ହାରିଛି । ଆଉ ୩ଥର ନିର୍ବାଚନ ଲଢ଼ିବି ।
