ହିମନ୍ତ ବିଶ୍ୱଶର୍ମାଙ୍କ ଜଲୱା, ପଛରେ ପଡ଼ିଲେ ଗୌରବ ଗୋଗୋଇ

ନୂଆଦିଲ୍ଲୀ: ଆସାମରେ ବିଜେପି କ୍ରମାଗତ ତୃତୀୟ ଥର ସରକାର ଗଠନ କରିବା ଏକପ୍ରକାରର ନିଶ୍ଚିତ ହେବାରେ ଲାଗିଛି। ରାଜ୍ୟର ୧୨୬ ବିଧାନସଭା ଆସନରୁ ବିଜେପି ଏବେ ପ୍ରାୟ ୯୫ଟି ଆସନରେ ଲିଡ କରୁଛି।କଂଗ୍ରେସ ୨୭ଟି ଆସନରେ ସୀମିତ ରହିଛି। ଅନ୍ୟାନ୍ୟ ଦଳ ମାତ୍ର ୩ଟି ଆସନରେ ଲିଡ କରୁଛନ୍ତି। ଆସାମରେ ସରକାର ଗଠନ ପାଇଁ ଆବଶ୍ୟକ ମ୍ୟାଜିକ ନମ୍ବର ହେଉଛି ୬୪। ତେଣୁ ପ୍ରାରମ୍ଭିକ ଟ୍ରେଣ୍ଡରେ ବିଜେପି ଏହାକୁ ବେଶ ସହଜରେ ହାସଲ କରିନେଇଛି।

ଅନ୍ୟପକ୍ଷରେ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା ମଧ୍ୟ କମାଲ କରିବାରେ ଲାଗିଛନ୍ତି। ଜାଲୁକବାରି ଆସନରୁ ପ୍ରାର୍ଥୀ ହୋଇଥିବା ବିଶ୍ୱଶର୍ମା ଗଣତି ଆରମ୍ଭରୁ ଲିଡ ହାସଲ କରିଥିବା ବେଳେ ଏବେ ସେ ବହୁ ଆଗକୁ ଚାଲି ଯାଇଛନ୍ତି। ଏଠାରେ ସେ ବଡ଼ ବିଜୟ ହାସଲ କରିବା ନିଶ୍ଚିତ ହୋଇଛି। ତେବେ ଆସାମ କଂଗ୍ରେସ ପ୍ରମୁଖ ଚେହେରା ଗୌରବ ଗୋଗୋଇଙ୍କ ପାଇଁ ରେଜଲ୍ଟ ନିରାଶଜନକ ଖବର ଆଣିଛି। ଏବେ ଲୋକସଭାର ସାଂସଦ ଥାଇ ମଧ୍ୟ ଗୌରବ ଆସାମ ବିଧାନସଭା ନିର୍ବାଚନ ଲଢ଼ୁଥିଲେ।

ଦଳ ତାଙ୍କୁ ଗୁରୁତ୍ୱପୂର୍ଣ୍ଣ ଜୋରହାଟ ଆସନରୁ ପ୍ରାର୍ଥୀ କରିଛି। ହେଲେ ଏଠାରେ ଶ୍ରୀ ଗୋଗୋଇ ପଛରେ ପଡ଼ିଛନ୍ତି। ଯଦିଓ ଏହା ପ୍ରାରମ୍ଭିକ ଟ୍ରେଣ୍ଡ, କିନ୍ତୁ ଗୌରବ ଗୋଗୋଇ ପଛରେ ପଡ଼ିବା କଂଗ୍ରେସ ପାଇଁ ଶକ୍ତ ଝଟକା। ଏଠାରେ ବିଜେପିର ହିତେନ୍ଦ୍ରନାଥ ଗୌସ୍ୱାମୀ ଲିଡ କରୁଛନ୍ତି।