ଅଧଘଣ୍ଟା ବଢ଼ିଲା ବାଲିଯାତ୍ରା ସାଂସ୍କୃତିକ କାର୍ୟ୍ୟକ୍ରମ ଅବଧି

କଟକ: ବଢ଼ିଲା ବାଲିଯାତ୍ରା ସଂଧ୍ୟାକାଳୀନ ସାଂସ୍କୃତିକ କାର୍ୟ୍ୟକ୍ରମର ଅବଧି । ଏଣିକି ରାତି ୧୦ଟା ନୁହେଁ, ବରଂ ୧୦ଟା ୩୦ ମିନିଟ ପର୍ୟ୍ୟନ୍ତ ସଂସ୍କୃତିକ କାର୍ୟ୍ୟକ୍ରମ ହେବ । ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନିର୍ଦ୍ଦେଶକ୍ରମେ ଏହି ନିଷ୍ପତ୍ତି ଗ୍ରହଣ କରାଯାଇଛି । ଶନିବାର ରାତିରେ କଣ୍ଠଶିଳ୍ପୀ ଅସୀମା ପଣ୍ଡାଙ୍କ ଦ୍ବାରା ସଙ୍ଗୀତ ପରିବେଷଣ କରାଯାଉଥିବା ବେଳେ ନିର୍ଦ୍ଧାରିତ ସମୟ ଅତିକ୍ରାନ୍ତ ହୋଇଥିବାରୁ ପୋଲିସ ପହଞ୍ଚି କାର୍ୟ୍ୟକ୍ରମ ବନ୍ଦ କରିବା ସହ ମଞ୍ଚ ଖାଲି କରିଥିଲା ।
ଶନିବାରର ଘଟଣାକୁ ଗମ୍ଭୀରତାର ସହ ନେଇଛନ୍ତି ମୁଖ୍ୟମନ୍ତ୍ରୀ । ସାଂସ୍କୃତିକ କାର୍ୟ୍ୟକ୍ରମରେ ବାଧା ନଉପୁଜିବା ସଂକ୍ରାନ୍ତରେ ମୁଖ୍ୟମନ୍ତ୍ରୀ କଟକ ଜିଲ୍ଲାପାଳ ଓ ପୋଲିସ କମିଶନରଙ୍କୁ ନିର୍ଦ୍ଦେଶ ଦେଇଛନ୍ତି । ଫଳ ସ୍ୱରୂପ କଟକ ଜିଲ୍ଲାପାଳ ମାଜିଷ୍ଟ୍ରେଟ କ୍ଷମତା ପ୍ରୟୋଗ କରି ସାଂସ୍କୃତିକ କାର୍ୟ୍ୟକ୍ରମ ଅବଧିକୁ ଆଉ ଅଧ ଘଣ୍ଟା ବୃଦ୍ଧି କରିଛନ୍ତି । ଏଣିକି ରାତି ସାଢେ ୧୦ଟା ପର୍ୟ୍ୟନ୍ତ ଉଭୟ ମଞ୍ଚ ‘ଗଣକବି ବୈଷ୍ଣବ ପାଣି ମଞ୍ଚ’ ଓ ‘ଅକ୍ଷୟ ମହାନ୍ତି’ ମଞ୍ଚରେ ସଂସ୍କୃତିକ କାର୍ୟ୍ୟକ୍ରମ ପରିବେଷଣ କରାଯିବ । ଏହି ନିର୍ଦ୍ଦେଶ ଜାରି ହେବା ପରେ ଗତକାଲି (ରବିବାର) ସନ୍ଧ୍ୟାରେ ରାତି ସାଢେ ୧୦ଟା ପର୍ୟ୍ୟନ୍ତ ସଂସ୍କୃତିକ କାର୍ୟ୍ୟକ୍ରମ ଚାଲିଥିଲା । ସୁଫି ଗୀତରେ ଝୁମିଥିଲେ ହଜାର ହଜାର ଦର୍ଶକ ଓ ଅତିଥି । ‘ହମସୁଫି ବ୍ୟାଣ୍ଡ’ ପକ୍ଷରୁ କଣ୍ଠଶିଳ୍ପୀ କ୍ରିଷ୍ଣା ବିଭିନ୍ନ ସୁଫି ଗୀତ ପରିବେଷଣ କରି ଦର୍ଶକଙ୍କୁ ମତୁଆଲା କରିଥିଲେ ।
ଗତ ଶନିବାର(୧୬ ତାରିଖ) ଜଣାଶୁଣା କଣ୍ଠଶିଳ୍ପୀ ଅସୀମା ପଣ୍ଡାଙ୍କ ମେଲୋଡି କାର୍ୟ୍ୟକ୍ରମ ଥିଲା । ହଜାର ହଜାର ଦର୍ଶକ ଉପସ୍ଥିତ ଥିଲେ । ମାତ୍ର କୌଣସି କାରଣରୁ କାର୍ୟ୍ୟକ୍ରମ ବେଶ ବିଳମ୍ବରେ ଆରମ୍ଭ ହୋଇଥିଲା । ଅସୀମା ପଣ୍ଡା ସଙ୍ଗୀତ ପରିବେଷଣ ଆରମ୍ଭ କରିଥିବା ବେଳେ ପୋଲିସ ପହଞ୍ଚି କାର୍ୟ୍ୟକ୍ରମ ବନ୍ଦ କରିଥିଲା । ହାଇକୋର୍ଟଙ୍କ ନିର୍ଦ୍ଦେଶାବଳୀ ଅନୁସାରେ, ନିର୍ଦ୍ଧାରିତ ସମୟ ଅତିକ୍ରାନ୍ତ କରିଥିବାରୁ କାର୍ୟ୍ୟକ୍ରମକୁ ବନ୍ଦ କରାଯାଇଥିଲା । ଜିଲ୍ଲା ପ୍ରଶାସନ ଓ ପୋଲିସ ପ୍ରଶାସନ ଆଲୋଚନା ସତ୍ତ୍ବେ ମଧ୍ୟ କୌଣସି ସୁଫଳ ମିଳିନଥିଲା । କାର୍ୟ୍ୟକ୍ରମ ବନ୍ଦ ହେବା ପରେ ଦର୍ଶକଙ୍କ ମଧ୍ୟରେ ଅସନ୍ତୋଷ ଦେଖାଯାଇଥିଲା । ଏବେ ଏହି ଘଟଣା ପରେ କାର୍ୟ୍ୟକ୍ରମ ଅବଧି ବଢିଛି ।