ଅଭିଯୁକ୍ତକୁ ବିବାହ ବେଦୀରୁ ଉଠାଇ ଆଣିଲା ପୁଲିସ

ଅପରାଧ ଘଟାଇବା ପଡ଼ିଲା ମହଙ୍ଗା
ନିମାପଡ଼ାରୁ ବସନ୍ତ ନାୟକ,
ଏକାଧିକ ଅପରାଧ ଘଟାଇବା ଜଣେ ଯୁବକକୁ ମହଙ୍ଗା ପଡ଼ିଛି। ସମ୍ପୃକ୍ତ ଅଭିଯୁକ୍ତ ଯୁବକ ଜଣକ ବିବାହ କରିବା ପାଇଁ ବର ବେଶରେ ବିବାହ ବେଦୀରେ ବସି ଥିବା ବେଳେ ଗତ ବୁଧବାର ରାତ୍ରରେ ଚାରିଛକ ପଲିସ୍ ପହଂଚି ଗିରଫ କରିଛି। ଗିରଫ ଅଭିଯୁକ୍ତ ହେଲେ ଏହି ଥାନା ଅନ୍ତର୍ଗତ ଓରପଟ ଗ୍ରାମର ପ୍ରକାଶ କାଣ୍ଡି । ଉକ୍ତ ଘଟଣା ଚାରିଛକ ଅଂଚଳରେ ବେଶ୍ ଚର୍ଚ୍ଚା ବିଷୟ ପାଲଟିଛି । ଖବରରୁ ପ୍ରକାଶ, ଗତ ଶନିବାର ରାତ୍ରିରେ ଚାରିଛକ ଥାନା ଅନ୍ତର୍ଗତ ଛଣିଜଙ୍ଗ ପଞ୍ଚାୟତ ବିଲସାହି ଗ୍ରାମର ଯୁବକ ଜ୍ୟୋତିରଞ୍ଜନ ବେହେରା ଙ୍କୁ ଓରପଟ ଗ୍ରାମର ପ୍ରକାଶ କାଣ୍ଡି ମରଣାନ୍ତକ ଆକ୍ରମଣ କରି ଥିବା ନେଇ ଚାରିଛକ ଥାନାରେ ଅଭିଯୋଗ ହୋଇଥିଲା । ଅଭିଯୋଗ ପରେ ପୋଲିସ ୯୯/୨୦୨୬ ରେ ଏକ ମାମଲା ରୁଜୁ କରି ଘଟଣାର ତଦନ୍ତ ଚାଲୁ ରଖିଥିଲା। ପରେ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଏଥିରେ ବ୍ୟବହୃତ ଗାଡ଼ି ଟିକୁ ଜବତ କରିଥିବା ବେଳେ ଅଭିଯୁକ୍ତ ଘଟଣା ସ୍ଥଳରୁ ଫେରାର ହୋଇଯାଇଥିଲେ। ସେହିପରି ଗତ ବର୍ଷ ଅକ୍ଟୋବର ମାସ ୧ ତାରିଖରେ ଚାରିଛକ ବଜାରରେ ପ୍ରକାଶ କାଣ୍ଡି ଜଣେ ମହିଳାଙ୍କୁ ଆକ୍ରମଣ ଘଟଣାରେ ପୋଲିସ ୧୨୧/୨୫ରେ ମାମଲା ରୁଜୁ କରି ପୋଲିସ ମୁଖ୍ୟ ଅଭିଯୁକ୍ତ କୁ ଗିରଫ କରିବାକୁ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଥିଲା ।ଗତ କାଲି ବିଳମ୍ବିତ ରାତ୍ରିରେ ଚାରିଛକ ପୋଲିସ ଓରପଟରେ ଅଭିଯୁକ୍ତ ପ୍ରକାଶ ବର ବେଶରେ ବେଦୀରେ ବସି ବିବାହ କରୁଥିବା ବେଳେ ପୁଲିସ ତାଙ୍କୁ ସେଠାରୁ ଗିରଫ କରିଛି। ଆଜି ପ୍ରକାଶକୁ ପୁଲିସ କୋର୍ଟ ଚାଲାଣ କରିଥିବା ଜଣାପଡିଛି।