Garvita Odia
ଚଣ୍ଡିଗଡ଼: ପଞ୍ଜାବ ରାଜନୀତିରେ ପୁଣିଥରେ ହଇଚଇ ସୃଷ୍ଟି ହୋଇଛି । ଶୁକ୍ରବାର ସକାଳୁ ସକାଳୁ ପଞ୍ଜାବ ସରକାରଙ୍କ କ୍ୟାବିନେଟ୍ ମନ୍ତ୍ରୀ ତଥା ଆମ ଆଦମୀ ପାର୍ଟି ନେତା ସଞ୍ଜୀବ ଅରୋଡ଼ାଙ୍କ ବାସଭବନ ସମେତ ବିଭିନ୍ନ ଠିକଣାରେ ପ୍ରବର୍ତ୍ତନ ନିର୍ଦ୍ଦେଶାଳୟ ଚଢ଼ାଉ କରିଛି । ଏହି କାର୍ଯ୍ୟାନୁଷ୍ଠାନକୁ ନେଇ ଆମ୍ ଆଦମୀ ପାର୍ଟି ଏବଂ କେନ୍ଦ୍ର ସରକାରଙ୍କ ମଧ୍ୟରେ ବାକ୍ଯୁଦ୍ଧ ତୀବ୍ର ହୋଇଛି । ସୂଚନା ଅନୁଯାୟୀ, ଚଣ୍ଡିଗଡ଼ ସେକ୍ଟର-୨ ସ୍ଥିତ ମନ୍ତ୍ରୀଙ୍କ ସରକାରୀ ବାସଭବନରେ ସକାଳ ପ୍ରାୟ ୭ଟା ସମୟରେ ED ଟିମ୍ ପହଞ୍ଚିଥିଲେ । ପ୍ରାୟ ୨୦ଟି ଗାଡ଼ିରେ ଅଧିକାରୀମାନେ ମନ୍ତ୍ରୀଙ୍କ ଘରେ ପହଞ୍ଚିବା ସହ ସୁରକ୍ଷା ପାଇଁ CIA ଏବଂ ସ୍ୱତନ୍ତ୍ର ବାହିନୀର ପ୍ରାୟ ୩ ଡଜନ ଯବାନଙ୍କୁ ମୁତୟନ କରାଯାଇଥିଲା । ସକାଳ ୭:୨୫ ମିନିଟ୍ରେ ତଲାସି ଅଭିଯାନ ଆରମ୍ଭ ହୋଇଥିଲା । କେବଳ ଚଣ୍ଡିଗଡ଼ ନୁହେଁ, ବରଂ ଲୁଧିଆନା, ଜାଲନ୍ଧର ଏବଂ ଗୁରୁଗ୍ରାମ ଭଳି ସହରରେ ଥିବା ତାଙ୍କର ସହଯୋଗୀ ଓ କମ୍ପାନୀ କାର୍ଯ୍ୟାଳୟରେ ମଧ୍ୟ ଏକକାଳୀନ ଚଢ଼ାଉ କରାଯାଇଛି ।
EDର ଏହି କାର୍ଯ୍ୟାନୁଷ୍ଠାନ ମୁଖ୍ୟତଃ କଥିତ ମନି ଲଣ୍ଡରିଂ, ଫେମା (FEMA) ନିୟମର ଉଲ୍ଲଂଘନ, ଜମି କାରବାରରେ ହେରଫେର ଏବଂ ସନ୍ଦେହଜନକ ଆର୍ଥିକ କାରବାର ସହ ଜଡ଼ିତ । ସଞ୍ଜୀବ ଆରୋଡାଙ୍କ ପରିବାର ଏବଂ ତାଙ୍କ ବ୍ୟବସାୟିକ ପ୍ରତିଷ୍ଠାନଗୁଡ଼ିକ ଏବେ ଏଜେନ୍ସିର ସ୍କାନରରେ ଅଛନ୍ତି । ଉଲ୍ଲେଖଯୋଗ୍ୟ ଯେ, ଗତ ଅକ୍ଟୋବର ୨୦୨୪ରେ ମଧ୍ୟ ଶିଳ୍ପ ଜମି ଆବଣ୍ଟନରେ ଅନିୟମିତତା ଅଭିଯୋଗରେ ତାଙ୍କ ଠିକଣାରେ ଚଢ଼ାଉ କରାଯାଇଥିଲା । ବର୍ତ୍ତମାନ ବିଦେଶୀ ପାଣ୍ଠି କାରବାରକୁ ନେଇ ତଦନ୍ତ ଜାରି ରହିଛି ।
ଆଶ୍ଚର୍ଯ୍ୟର କଥା ହେଉଛି, ଯେତେବେଳେ ED ତାଙ୍କ ଘରେ ଚଢ଼ାଉ କରୁଥିଲା, ସେତେବେଳେ ସଞ୍ଜୀବ ଅରୋଡ଼ା ଦେଶରେ ନଥିଲେ । ସେ ଏକ ସରକାରୀ ଗସ୍ତରେ ନେଦରଲ୍ୟାଣ୍ଡର ଆମଷ୍ଟରଡାମ୍ ଯାଇଛନ୍ତି । ସେଠାରେ ସେ ‘ଇନଭେଷ୍ଟ ପଞ୍ଜାବ’ କାର୍ଯ୍ୟକ୍ରମ ମାଧ୍ୟମରେ ପଞ୍ଜାବରେ ପୁଞ୍ଜି ବିନିଯୋଗ ଆଣିବା ପାଇଁ ଶିଳ୍ପପତିମାନଙ୍କ ସହ ଆଲୋଚନା କରୁଛନ୍ତି । ମନ୍ତ୍ରୀ କହିଛନ୍ତି ଯେ, ଯଦି ତାଙ୍କ ବିରୋଧରେ କୌଣସି ବି ଦୁର୍ନୀତି ପ୍ରମାଣିତ ହୁଏ, ତେବେ ସେ ରାଜନୀତି ଛାଡ଼ିଦେବେ ।
