Garvita Odia
ଚେନ୍ନାଇ: ତାମିଲନାଡ଼ୁ ରାଜନୀତିରେ ସରକାର ଗଠନକୁ ନେଇ ଜାରି ହଟଚମଟ ଜାରି ରହିଛି । ବିଧାନସଭା ନିର୍ବାଚନରେ ୧୦୮ ଆସନ ସହିତ ଏକକ ବୃହତ୍ତମ ଦଳ ଭାବରେ ଉଭା ହୋଇଥିବା ଥାଲାପତି ବିଜୟଙ୍କ ଟିଭିକେ ବହୁମତ ହାସଲ କରିବାକୁ ଚେଷ୍ଟା କରୁଛି । ଏବେ ସମର୍ଥନ ପତ୍ରକୁ ନେଇ ଏକ ନୂତନ ବିବାଦ ସୃଷ୍ଟି ହୋଇଛି । ଏଏମଏମକେ ଦଳର ମହାସଚିବ ଟିଟିଭି ଦିନାକରନ ଅଭିଯୋଗ କରିଛନ୍ତି ଯେ, ଟିଭିକେ ସେମାନଙ୍କ ବିଧାୟକ କାମରାଜଙ୍କ ନକଲି ସମର୍ଥନ ପତ୍ର ରାଜ୍ୟପାଳଙ୍କ ନିକଟକୁ ପଠାଇଛି । ସେ କହିଛନ୍ତି ଏହି ମାମଲାରେ ଏକ ଅପରାଧିକ ଅଭିଯୋଗ ଦାୟର କରୁଛନ୍ତି ।
AMMK ମୁଖ୍ୟ TTV ଦିନାକରନ ତାଙ୍କ ଦଳ ବିଜୟଙ୍କ ନେତୃତ୍ୱାଧୀନ TVKକୁ ସମର୍ଥନ କରିଥିବା କଥାକୁ ଅସ୍ୱୀକାର କରିଛନ୍ତି । ସେ କହିଛନ୍ତି ସେ NDA ସହିତ ଅଛନ୍ତି । ଦିନାକରନ ଗଣମାଧ୍ୟମ ରିପୋର୍ଟକୁ ଖାରଜ କରି କହିଛନ୍ତି, କାମରାଜ ବର୍ତ୍ତମାନ ଅଲ୍ ଇଣ୍ଡିଆ ଆନ୍ନା ଦ୍ରାବିଡ ମୁନେତ୍ର କାଝଗମ (AIADMK)ର ନବ ନିର୍ବାଚିତ ସଦସ୍ୟମାନଙ୍କ ସହିତ ପୁଡୁଚେରୀର ଏକ ରିସର୍ଟରେ ରହୁଛନ୍ତି । AMMK ସାଧାରଣ ସମ୍ପାଦକ TTV ଦିନାକରନ ଅଭିଯୋଗ ଦାଖଲ କରିବା ପାଇଁ ଗୁଇଣ୍ଡି ରେଞ୍ଜର ସହାୟକ ପୁଲିସ କମିଶନରଙ୍କ କାର୍ଯ୍ୟାଳୟରେ ଅଭିଯୋଗ ଦାୟର କରିଛନ୍ତି । ରାଜ୍ୟପାଳଙ୍କୁ ବିଧାୟକ କାମରାଜଙ୍କ ସମର୍ଥନର ଏକ ନକଲି ଚିଠି ପଠାଯାଇଛି । ଏହି ମାମଲାରେ ଏକ ଅପରାଧିକ ଅଭିଯୋଗ ଦାଖଲ କରିଛୁ । ଅନ୍ୟପକ୍ଷରେ, ଟିଭିକେ ବିଧାୟକ କାମରାଜଙ୍କ ଏକ ଭିଡିଓ ସେୟାର କରିଛନ୍ତି, ଯେଉଁଥିରେ ସେ ଦାବି କରୁଛନ୍ତି ଯେ ସେ ଏଏମଏମକେ ସାଧାରଣ ସମ୍ପାଦକଙ୍କ ଅନୁମତି ନେଇ ସ୍ୱେଚ୍ଛାକୃତ ଏବଂ ଖୁସିରେ ଟିଭିକେକୁ ସମର୍ଥନ କରି ଚିଠି ଲେଖିଛନ୍ତି ।
ସସପେନ୍ସ ଭିତରେ ଗତକାଲି ଥଲାପତି ବିଜୟଙ୍କୁ ବଡ଼ଧରଣର ରାଜନୈତିକ ସମର୍ଥନ ମିଳିଥିବା ଖବର ଆସିଥିଲା । କଂଗ୍ରେସ ପରେ ଡିଏମ୍କେ ସହ ମେଣ୍ଟରେ ଥିବା ବାମପନ୍ଥୀ ଦଳ ସିପିଆଇ, ସିପିଆଇଏମ୍, ଭିସିକେ, ଆଇୟୁଏମ୍ଏଲ୍ ବିଜୟଙ୍କ ଦଳ ଟିଭିକେକୁ ସମର୍ଥନ ଦେବାକୁ ନିଷ୍ପତ୍ତି ନେଇଛନ୍ତି । ଫଳରେ ୧୦୮ ସିଟ୍ରେ ଜିତି ରାଜ୍ୟରେ ସବୁଠୁ ବଡ଼ ରାଜନୈତିକ ଦଳ ହୋଇ ଉଭା ହୋଇଥିବା ଟିଭିକେ ସରକାର ଗଠନ ଲାଗି ମ୍ୟାଜିକ୍ ନମ୍ବର (୧୧୮) ବି ଯୋଗାଡ଼ କରିଥିବା ଜଣାପଡ଼ିଛି । ତେବେ ବିଜୟ ତୃତୀୟ ଥର ପାଇଁ ଶୁକ୍ରବାର ରାଜ୍ୟପାଳଙ୍କୁ ଭେଟି ସରକାର ଗଠନ ଲାଗି ଦେଇଥିବା ସମର୍ଥନପତ୍ରରେ ଭିସିକେ ଏବଂ ଆଇୟୁଏମ୍ଏଲ୍ ବିଧାୟକଙ୍କ ସ୍ୱାକ୍ଷର ନ ଥିବା କୁହାଯାଉଛି । ସମର୍ଥନ ବଦଳରେ ଭିସିକେ ଉପମୁଖ୍ୟମନ୍ତ୍ରୀ ପଦ ଦାବି କରିଥିବା ଚର୍ଚ୍ଚା ହେଉଛି । ତେଣୁ ପୁଣି ମୁଖ୍ୟମନ୍ତ୍ରୀ ଭାବେ ବିଜୟ ଶପଥ ନେବାକୁ ନେଇ ଦ୍ୱନ୍ଦ୍ୱ ଜାରି ରହିଛି ।
ପ୍ରାରମ୍ଭିକ ରିପୋର୍ଟ ଅନୁସାରେ, ରାଜ୍ୟପାଳ ରାଜେନ୍ଦ୍ର ବିଶ୍ୱନାଥ ଆର୍ଲେକର ବିଜୟଙ୍କୁ ସରକାର ଗଠନ ଲାଗି ଆଜି ମଞ୍ଜୁରି ଦେଇଥିଲେ । ଫଳରେ ଶନିବାର ପୂର୍ବାହ୍ନ ୧୧ଟାରେ ବିଜୟ ଚେନ୍ନାଇର ଜବାହରଲାଲ ନେହରୁ ଇନ୍ଡୋର ଷ୍ଟାଡିୟମରେ ମୁଖ୍ୟମନ୍ତ୍ରୀ ଭାବେ ଶପଥ ନେଇପାରନ୍ତି ବୋଲି ଜଣାଯାଇଥିଲା । ବିଜୟ ଶୁକ୍ରବାର ଲୋକଭବନରେ ଲଗାତର ତୃତୀୟ ଦିନ ରାଜ୍ୟପାଳଙ୍କୁ ଭେଟି ସରକାର ଗଠନ ଦାବି ରଖିଥିଲେ । ସେ ରାଜ୍ୟପାଳଙ୍କୁ ଟିଭିକେ, କଂଗ୍ରେସ, ସିପିଆଇ, ସିପିଆଇଏମ୍, ଭିସିକେର ମୋଟ ୧୧୮ ବିଧାୟକଙ୍କ ସମର୍ଥନ ପତ୍ର ପ୍ରଦାନ କରିଥିବା ଜଣାଯାଇଥିଲା । ପରେ ରାଜ୍ୟପାଳ ତାଙ୍କୁ ସରକାର ଗଠନ ଲାଗି ନିମନ୍ତ୍ରଣ କରିଥିବା ରିପୋର୍ଟ ପ୍ରକାଶ ପାଇଥିଲା ।
ତାମିଲନାଡ଼ୁ ବିଧାନସଭାରେ ୨୩୪ ଆସନ ମଧ୍ୟରୁ ୧୦୮ ଆସନ ଟିଭିକେ ଜିତିଛି । ତେବେ ବିଜୟ ଦୁଇଟି ଆସନରେ ଜିତିଥିବାରୁ ତାଙ୍କୁ ଗୋଟିଏ ଆସନ ଛାଡ଼ିବାକୁ ପଡ଼ିବ । ଏବେର ସ୍ଥିତିରେ ଟିଭିକେର ମୋଟ ବିଧାୟକ ସଂଖ୍ୟା ୧୦୭ । କଂଗ୍ରେସର ୫, ସିପିଆଇର ୨, ସିପଆଇଏମ୍ର ୨ ଏବଂ ଭିସିକେର ୨ ବିଧାୟକଙ୍କ ସମର୍ଥନରେ ଟିଭିକେ କଣ୍ଟାକଣ୍ଟି ଭାବେ ୧୧୮ ମ୍ୟାଜିକ ନମ୍ବର ଜୁଟାଉଛି । ତେବେ କେତେକ ରିପୋର୍ଟ ଅନୁସାରେ, ଟିଭିକେ ମୁଖ୍ୟ ବିଜୟ ରାଜ୍ୟପାଳଙ୍କୁ ଭେଟି ୧୧୬ ଜଣ ବିଧାୟକଙ୍କ ସ୍ୱାକ୍ଷରଯୁକ୍ତ ସମର୍ଥନ ପତ୍ର ପ୍ରଦାନ କରିଛନ୍ତି । ସେଥିରେ ଭିସିକେ ବିଧାୟକଙ୍କ ଦସ୍ତଖତ ନ ଥିବା କୁହାଯାଇଛି । ସେହି ଦୃଷ୍ଟିରୁ ବିଜୟଙ୍କ ଶପଥଗ୍ରହଣରେ ବାଧା ସୃଷ୍ଟି ହୋଇଛି । ସୂଚନା ଅନୁସାରେ ଭିସିକେ ସମର୍ଥନ ବଦଳରେ ଉପମୁଖ୍ୟମନ୍ତ୍ରୀ ପଦ ମାଗିଛି । ଅନ୍ୟପକ୍ଷରେ ରାଜ୍ୟପାଳ ଆଉ ୨ ବିଧାୟକଙ୍କ ସମର୍ଥନ ପତ୍ରକୁ ଅପେକ୍ଷା କରିଛନ୍ତି । ତେଣୁ ରାଜ୍ୟପାଳଙ୍କ ପକ୍ଷରୁ ଔପଚାରିକ ଭାବେ ଶପଥ ଗ୍ରହଣର ଦିନ କିମ୍ବା ସମୟ ଧାର୍ଯ୍ୟ କରାଯାଇନାହିଁ ।
