Garvita Odia
ଭୁବନେଶ୍ବର/କଟକ: ରାଜ୍ୟରେ ଡାକ୍ତର ଆନ୍ଦୋଳନ ତୃତୀୟ ଦିନରେ ପହଞ୍ଚିଛି । ଡାକ୍ତରମାନଙ୍କ ଆନ୍ଦୋଳନ ଯୋଗୁଁ ସ୍ୱାସ୍ଥ୍ୟସେବା ବ୍ୟାପକ ଭାବେ ପ୍ରଭାବିତ ହୋଇଛି । ରାଜ୍ୟରେ ଡାକ୍ତରମାନଙ୍କ ଧର୍ମଘଟ ଯୋଗୁ ସ୍ୱାସ୍ଥ୍ୟସେବା ପ୍ରଭାବିତ ହେବା ପରେ ରାଜ୍ୟ ସରକାର କଠୋର ଆଭିମୁଖ୍ୟ ପୋଷଣ କରିଛନ୍ତି। ଧର୍ମଘଟକାରୀ ଡାକ୍ତରମାନଙ୍କୁ ଆନ୍ଦୋଳନରୁ ଓହରିବା ପାଇଁ ଅନୁରୋଧ ଓ ଆଲୋଚନା ପାଇଁ ସରକାରଙ୍କ ଅପିଲ୍ ପରେ କୌଣସି ନିଷ୍କର୍ଷ ନବାହାରିବାରୁ ସରକାର କଠୋର ହୋଇଛନ୍ତି। ଆନ୍ଦୋଳନ ଯୋଗୁ କାର୍ଯ୍ୟରେ ଅନୁପସ୍ଥିତ ରହୁଥିବା ଡାକ୍ତରମାନଙ୍କର ଦରମା ବନ୍ଦ ଓ ଚୁକ୍ତିଭିତ୍ତିକ ଡାକ୍ତରମାନଙ୍କୁ ଚାକିରିରୁ ବହିଷ୍କାର କରିବା ପାଇଁ ସ୍ୱାସ୍ଥ୍ୟ ବିଭାଗ ନିର୍ଦ୍ଦେଶନାମା ଜାରି କରିଛି।
ସରକାର କଠୋର ହେବା ପରେ ଆହୁରି କଠୋର ହେଲା ଡାକ୍ତରୀ ସଂଘ। ଆସନ୍ତାକାଲି (ଶନିବାର) ଠୁ ରାଜ୍ୟବ୍ୟାପୀ ଦିନ ୯ ରୁ ୧୦ ଓପିଡ଼ି ସେବା ବନ୍ଦ। ରାଜ୍ୟରେ ଡାକ୍ତରଙ୍କ ଧାରଣା ପ୍ରସଙ୍ଗରେ ସ୍ୱାସ୍ଥ୍ୟ ବିଭାଗର କଡା ଆଭିମୁଖ୍ୟକୁ ନେଇ ଏସସିବି ଜୁନିଅର୍ ଡାକ୍ତର ସଂଘର ପ୍ରତିକ୍ରିୟା ରଖିଛନ୍ତି ଜୁନିୟର ଡାକ୍ତର ସଙ୍ଘ ସଭାପତି ଚିନ୍ମୟ କୁମାର ପ୍ରଧାନ । ଦାବି ପୂରଣ ପାଇଁ ସରକାର ଆଲୋଚନାକୁ ନ ଆସିଲେ ଆସନ୍ତାକାଲି ଠାରୁ ଏକ ଘଣ୍ଟା ପାଇଁ ଓପିଡି ସେବା ବନ୍ଦ୍ ରଖିବାକୁ ଚେତାବନୀ ଦେଇଛି ସଂଘ । ୪୮ ଘଣ୍ଟା ଧରି ଡାକ୍ତର ସଂଘ କଳାବ୍ୟାଚ ପିନ୍ଧି ରୋଗୀ ସେବା ଜାରି ରଖିଥିଲା ବେଳେ ଦରମା ବନ୍ଦ ଓ ଚାକିରିରୁ ବହିଷ୍କାର ଭଳି କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି ସରକାର । ଦୁଇ ବର୍ଷ ଧରି ଡାକ୍ତର ମାନଙ୍କ ଦାବିକୁ ନେଇ ବାରମ୍ବାର ସରକାରଙ୍କୁ ସଚେତନ କରିବା ସତ୍ୱେ ସରକାର କର୍ଣ୍ଣପାତ କରୁ ନଥିବା ନେଇ ଅଭିଯୋଗ କରିଛନ୍ତି ଜୁନିୟର ଡାକ୍ତର ସଂଘ । ଯଦି ସରକାର ଏହି ଦିଗରେ କୌଣସି ପଦକ୍ଷେପ ଗ୍ରହଣ ନ କରନ୍ତି ତେବେ ଆଗମୀ ଦିନରେ ଆହୁରି କଡା ଅଭିମୁଖ୍ୟ ଗ୍ରହଣ କରାଜିବ ବୋଲି କହିଛନ୍ତି ଜୁନିୟର ଡାକ୍ତର ସଂଘ ।
ସ୍ୱାସ୍ଥ୍ୟ ନିର୍ଦ୍ଦେଶକ ମୋହନ ପଣ୍ଡା କହିଛନ୍ତି ‘‘ଡାକ୍ତରଙ୍କ କାର୍ଯ୍ୟ ବନ୍ଦ ଆନ୍ଦୋଳନ ସ୍ଥିତି ଉପରେ ଅନୁଧ୍ୟାନ କରାଯାଉଛି । ଢେଙ୍କାନାଳ ଓ କଳାହାଣ୍ଡି ଜିଲ୍ଲାରେ ଡାକ୍ତର କାର୍ଯ୍ୟରେ ଯୋଗ ଦେଲେଣି । ସରକାରଙ୍କ ନିୟମ ଅନୁସାରେ କଡ଼ା କାର୍ଯ୍ୟାନୁଷ୍ଠାନ ନେଇ ଚିଠି କରାଯାଇଛି ’’।
