କଳିଙ୍ଗା ଘାଟି ବନ୍ଦ, ସତର୍କତା ପାଇଁ ସମାଜସେବୀଙ୍କ ପରାମର୍ଶ

ରାଇକିଆ: ଲଗାଣ ବର୍ଷା ଯୋଗୁଁ କନ୍ଧମାଳ ଜିଲ୍ଲାରୁ ଗଞ୍ଜାମକୁ ସଂଯୋଗ କରୁଥିବା ବିଭିନ୍ନ ଘାଟି ରାସ୍ତା ପ୍ରଭାବିତ ହୋଇଛି। କଳିଙ୍ଗା, କରଡ଼ା ଓ ଗାଜଲବାଡ଼ି ଘାଟି ଦେଇ ପ୍ରତିଦିନ ବହୁ ସଂଖ୍ୟାରେ ଯାନବାହନ ଚଳାଚଳ କରୁଥିବାବେଳେ ବର୍ଷା ଯୋଗୁଁ ଏହି ରାସ୍ତାଗୁଡ଼ିକରେ ଯାତାୟାତ ପ୍ରଭାବିତ ହୋଇଛି।ପ୍ରବଳ ବର୍ଷାରେ କଳିଙ୍ଗା ଘାଟିର ବିଭିନ୍ନ ସ୍ଥାନରୁ ବଡ଼ ବଡ଼ ପଥର ଖସି ରାସ୍ତା ଉପରେ ପଡ଼ିଥିବାରୁ ଯାତାୟାତ ବନ୍ଦ ରହିଛି। ରାସ୍ତାରୁ ପଥର ହଟାଇ ଯାତାୟାତ ସ୍ୱାଭାବିକ କରିବାକୁ କିଛି ଦିନ ସମୟ ଲାଗିପାରେ ବୋଲି ପ୍ରଶାସନ ପକ୍ଷରୁ ସୂଚନା ମିଳିଛି। ଏପଟେ ଗାଜଲବାଡ଼ି ଘାଟିର କେତେକ ସ୍ଥାନରେ ରାସ୍ତା ଦବିଯାଇଥିବା ମଧ୍ୟ ଜଣାପଡ଼ିଛି।
କଳିଙ୍ଗା ଘାଟିରେ ଯାତାୟାତ ବନ୍ଦ ଥିବାରୁ ଏବେ କରଡ଼ା ଘାଟି ରାସ୍ତା ଉପରେ ଯାନବାହନ ଚଳାଚଳ ବଢ଼ିଛି। ଫଳରେ କରଡ଼ା ଘାଟିରେ ଯାନବାହନ ଭିଡ଼ ଦେଖିବାକୁ ମିଳୁଛି। ବର୍ଷା ଜାରି ରହିଥିବାରୁ ଘାଟି ରାସ୍ତାରେ ଭୂସ୍ଖଳନ ଓ ପଥର ଖସିବା ଆଶଙ୍କା ରହିଥିବାରୁ ଯାତ୍ରୀ ଓ ଜନସାଧାରଣ ସତର୍କତାର ସହ ଯାତାୟାତ କରିବା ଆବଶ୍ୟକ ବୋଲି କୁହାଯାଇଛି।ଏହି ପରିପ୍ରେକ୍ଷୀରେ ସୋସିଆଲ ୱାର୍କର ଆସୋସିଏସନ ଅଫ୍ କନ୍ଧମାଳ (ସ୍ୱାକ୍) ସଦସ୍ୟ ତଥା ସମାଜସେବୀ ସନ୍ତୋଷ ଦିଗାଳ ଯାତ୍ରୀ ଓ ଜନସାଧାରଣଙ୍କୁ ଘାଟି ରାସ୍ତାରେ ଯାତାୟାତ ସମୟରେ ସତର୍କତା ଅବଲମ୍ବନ କରିବାକୁ ପରାମର୍ଶ ଦେଇଛନ୍ତି।
ରିପୋର୍ଟର ଦୁତି କୃଷ୍ଣ ପଣ୍ଡା