Garvita Odia
ବଡ଼ବିଲ: ଦୁଇ କୋମଳମତୀ ଛାତ୍ରଙ୍କ ଉପରେ ଗାଡି ଚଢାଇ ଚମ୍ପଟ ମାରିଲା ବୋଲେରୋ । କେନ୍ଦୁଝର ଜିଲ୍ଲା ବଲାଣୀ ଥାନା ଅନ୍ତର୍ଗତ ଷ୍ଟିଲ ଅଥୋରିଟି ଅଫ୍ ଇଣ୍ଡିଆ (ଝଇଓଖ)ର ଖଣି ଟାଉନସିପ୍ ଅଞ୍ଚଳରେ ଏଭଳି ଅଭାବନୀୟ ଘଟଣା ଘଟିଛି । ଦୁର୍ଘଟଣା ସମୟର ପୁରା ଦୃଶ୍ୟ ସିସିଟିଭିରେ କଏଦ ହୋଇଥିବା ବେଳେ, ପୋଲିସ ଘଟଣାର ତଦନ୍ତ ଚଳାଇଛି । କେନ୍ଦୁଝର ଜିଲ୍ଲା ବଲାଣୀ ଟାଉନସିପରେ ଥିବା ସରକାରୀ ବିଦ୍ୟାଳୟର ତୃତୀୟ ଶ୍ରେଣୀର ଦୁଇ ଛାତ୍ର ସ୍କୁଲ ଛୁଟି ହେବା ପରେ ସାଙ୍ଗ ହୋଇ ବିର୍ସା ମୁଣ୍ଡା କ୍ଲବ ନିକଟସ୍ଥ ନିଜ ଘରକୁ ଫେରୁଥିଲେ । ଏହି ସମୟରେ ବିର୍ସା ମୁଣ୍ଡା କ୍ଲବ ଓ ମସଜିଦ ରାସ୍ତାରେ ସାମ୍ନାପଟୁ ଏକ ବୋଲେରୋ ଦ୍ରୁତ ଗତିରେ ଆସି ସେମାନଙ୍କ ଉପରେ ଚଢାଇ ଚମ୍ପଟ ହୋଇଯାଇଥିଲା । ସ୍ଥାନୀୟ ଲୋକେ ଉଭୟ ଛାତ୍ରଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ସ୍ଥାନୀୟ ସେଲ୍ ବଲାଣୀ ଡାକ୍ତରଖାନାକୁ ନେଇଥିଲେ । ପରେ ସେମାନଙ୍କୁ କେନ୍ଦୁଝର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି ।
ଏଭଳି ଦୁଃଖଦ ଘଟଣା ପରେ ସ୍ଥାନୀୟ ଅଞ୍ଚଳରେ ଚାପା ଉତ୍ତେଜନା ଦେଖାଦେଇଛି । ଦୁର୍ଘଟଣା ଘଟାଇଥିବା ବୋଲେରୋ ଓ ଚାଳକଙ୍କୁ ତୁରନ୍ତ ଗିରଫ କରିବାକୁ ଦାବି ହୋଇଛି । ବଲାଣୀ ପୋଲିସ ସିସିଟିଭି ଫୁଟେଜ ଓ ପ୍ରତ୍ୟକ୍ଷଦର୍ଶୀଙ୍କ ସୂଚନା ଅନୁସାରେ ଯାଞ୍ଚ କରୁଥିବା ବେଳେ ଦୁର୍ଘଟଣା ଘଟାଇଥିବା ବୋଲେରୋ ଓ ଚାଳକଙ୍କ ସମ୍ବନ୍ଧରେ ଟେର ପାଇନଥିବା ଜଣାପଡ଼ିଛି ।
