Garvita Odia
– ବିଜେଡିର ‘ଚଟୁ ଆମିଷ, ବେଣ୍ଟ ନିରାମିଷ’ ନୀତି ସେମାନଙ୍କ ରାଜନୈତିକ ମତିଭ୍ରମକୁ ପ୍ରମାଣିତ କରୁଛି
– ବିଜେଡି ସଭାପତି ନବୀନ ପଟ୍ଟନାୟକଙ୍କ ବିବୃତି ତଥ୍ୟହୀନ ଓ ନିନ୍ଦନୀୟ
– ଦେଶରେ କମ୍ୟୁନିଷ୍ଟମାନେ ନିଜର ଜନାଦେଶ ହରାଇସାରିଛନ୍ତି, ଓଡ଼ିଶାରେ ମଧ୍ୟ ବିଜେଡି ଖୁବ୍ ଦ୍ରୁତଗତିରେ ନିଜର ଜନାଦେଶ ହରାଉଛି
– ୨୦୧୫ରୁ ୨୦୨୩ ମଧ୍ୟରେ ବିଜେଡି ଶାସନ ସମୟରେ ପୁଲିସ କନଷ୍ଟେବଳ, OPSC,OJSE, ମାଟ୍ରିକ୍ ଆଦି ଅନେକ ପରୀକ୍ଷାରେ ବ୍ୟାପକ ପ୍ରଶ୍ନପତ୍ର ଲିକ୍ ହୋଇଥିଲା
– ପରୀକ୍ଷା ଦୁର୍ନୀତିକୁ ନେଇ ମାନ୍ୟବର ଓଡ଼ିଶା ହାଇକୋର୍ଟ ବିଜେଡ଼ି ସରକାରଙ୍କୁ କଡ଼ା ସମାଲୋଚନା ଓ ଭର୍ତ୍ସନା କରିଥିଲେ
– ପୂର୍ବରୁ ଏତେ ବଡ଼ ବଡ଼ ପରୀକ୍ଷା ଦୁର୍ନୀତି ଓ ଆନ୍ଦୋଳନ ସତ୍ତ୍ୱେ ନବୀନ ପଟ୍ଟନାୟକ କିମ୍ବା ତାଙ୍କ ସରକାରର ଜଣେ ହେଲେ ମନ୍ତ୍ରୀ ଇସ୍ତଫା କଣ ପାଇଁ ଦେଇନଥିଲେ
– କଂଗ୍ରେସ ଓ ସିଜେପିର ଦେଶବିରୋଧୀ ଓ ହିଂସାତ୍ମକ କାର୍ଯ୍ୟକଳାପକୁ ନବୀନ ପଟ୍ଟନାୟକ ସମର୍ଥନ କରିବା ତାଙ୍କର ନିମ୍ନ ମନୋବୃତ୍ତିକୁ ଦର୍ଶାଉଛି
– ଦେଶର ବିକାଶ ଛାତ୍ରଛାତ୍ରୀଙ୍କ ଉପରେ ନିର୍ଭର କରେ, ସେମାନଙ୍କ ଭବିଷ୍ୟତକୁ ନେଇ ସଂକୀର୍ଣ୍ଣ ରାଜନୀତି କରାଯିବା ଅନୁଚିତ୍
– ବିଜେପି ପରୀକ୍ଷା ପ୍ରଣାଳୀର ସୁଧାର ପାଇଁ ଗଠନମୂଳକ ଆଲୋଚନା ଚାହୁଁଛି; ତେଣୁ ବିଜେଡି ସାଂସଦମାନେ ଗୃହ କାର୍ଯ୍ୟ ପରିଚାଳନାରେ ସହଯୋଗ କରନ୍ତୁ
ନୂଆଦିଲ୍ଲୀ, ୨୨/୦୭/୨୦୨୬ : ଗତକାଲି ଓଡ଼ିଶା ବିଧାନସଭାର ବିରୋଧୀ ଦଳ ନେତା ଶ୍ରୀ ନବୀନ ପଟ୍ଟନାୟକ ଯେଉଁ ଢଙ୍ଗରେ ଏବଂ ଯେଉଁ ବିଷୟରେ ବିବୃତି ଦେଇଛନ୍ତି, ତାହା ସମ୍ପୂର୍ଣ୍ଣ ତଥ୍ୟହୀନ, ଭିତ୍ତିହୀନ ଏବଂ ଉଦ୍ଦେଶ୍ୟମୂଳକ । ଭାରତୀୟ ଜନତା ପାର୍ଟି ପକ୍ଷରୁ ଆମେ ସମସ୍ତେ ମିଳିତ ଭାବରେ ଏହାକୁ ଦୃଢ଼ ଶବ୍ଦରେ ନିନ୍ଦା କରୁଛୁ ବୋଲି ଆଜି ନୂଆଦିଲ୍ଲୀ ଠାରେ ଓଡ଼ିଶାର ବିଜେପି ସାଂସଦମାନେ ଏକ ସାମ୍ବାଦିକ ସମ୍ମିଳନୀ ଜରିଆରେ କହିଛନ୍ତି ।
ସାଂସଦ ଶ୍ରୀ ଭର୍ତ୍ତୃହରି ମହତାବ କହିଛନ୍ତି ଯେ, ଶ୍ରୀ ନବୀନ ପଟ୍ଟନାୟକ ବୋଧହୁଏ ଭାବିଛନ୍ତି ଯେ ଲୋକଙ୍କର ସ୍ମୃତିଶକ୍ତି କମ୍ ଏବଂ ଓଡ଼ିଶାବାସୀ ସବୁକିଛି ଭୁଲି ଯାଇଛନ୍ତି । କିନ୍ତୁ ଓଡ଼ିଆ ଲୋକମାନଙ୍କୁ, ଓଡ଼ିଶାବାସୀଙ୍କୁ ଏତେ ଦୁର୍ବଳ କିମ୍ବା ଅଜ୍ଞ ମନେକରିବା ଉଚିତ ନୁହେଁ । ୨୦୧୫ ମସିହାରୁ ୨୦୨୩ ମସିହା ପର୍ଯ୍ୟନ୍ତ ତାଙ୍କ ନିଜ ଶାସନ କାଳରେ ଓଡ଼ିଶାରେ ପ୍ରତ୍ୟେକ ବର୍ଷ ପ୍ରତିଯୋଗିତାମୂଳକ ପରୀକ୍ଷାଗୁଡ଼ିକରେ ବ୍ୟାପକ ଅନିୟମିତତା ଓ ପ୍ରଶ୍ନପତ୍ର ଲିକ୍ ଘଟିଥିଲା। ପୁଲିସ କନଷ୍ଟେବଳ ପରୀକ୍ଷା, ଓପିଏସସି, ଓଜେଏସଇ, ମାଟ୍ରିକ୍ ପରୀକ୍ଷା ଆଦି ଅନେକ ପରୀକ୍ଷାରେ ପ୍ରଶ୍ନପତ୍ର ଲିକ୍ ଓ ଦୁର୍ନୀତି ଯୋଗୁଁ ଓଡ଼ିଶା ହାଇକୋର୍ଟ ତତ୍କାଳୀନ ବିଜେଡି ସରକାରଙ୍କ କାର୍ଯ୍ୟକଳାପ ପ୍ରତି କଡ଼ା ଭର୍ତ୍ସନା କରିଥିଲେ । ସେ ସମୟରେ ବିରାଟ ଆନ୍ଦୋଳନ, ଶୋଭାଯାତ୍ରା ଓ ବିକ୍ଷୋଭ ହୋଇଥିଲେ ସୁଦ୍ଧା ସେତେବେଳର ସରକାର ଜଣେ ହେଲେ ମନ୍ତ୍ରୀଙ୍କ ଇସ୍ତଫା ନେଇନଥିଲେ ।
ଯେଉଁଭଳି ଭାବରେ ନବୀନ ପଟ୍ଟନାୟକ ଓ ବିଜେଡି କଂଗ୍ରେସ ଓ ସିଜେପିର ଦେଶବିରୋଧୀ ଓ ହିଂସାତ୍ମକ କାର୍ଯ୍ୟକଳାପକୁ ସମର୍ଥନ କରିବାକୁ ଆଗେଇ ଆସିଛନ୍ତି, ତାହା ତାଙ୍କର ନିମ୍ନ ମନୋବୃତ୍ତିକୁ ପରିପ୍ରକାଶ କରୁଛି । ଗଣତନ୍ତ୍ରରେ ଧାରଣା ଦେବା ଓ ମତ ପ୍ରକାଶ କରିବାର ଅଧିକାର ସମସ୍ତଙ୍କର ଅଛି। କିନ୍ତୁ ସୁରକ୍ଷା ବାରିକେଡ୍ ଗୋଟାଏ ପରେ ଗୋଟାଏ ଭାଙ୍ଗି ପାର୍ଲାମେଣ୍ଟ ଭିତରକୁ ଜୋରଜବରଦସ୍ତ ପଶିବାକୁ ଚେଷ୍ଟା କରିବା, ହିଂସାକାଣ୍ଡ ରଚନା କରିବା ଅତ୍ୟନ୍ତ ଦେଶବିରୋଧୀ ଅଟେ। ଘରେ ବସି ଏହି ହିଂସାକାଣ୍ଡକୁ ସମର୍ଥନ କରିବା ପୂର୍ବରୁ ନବୀନ ପଟ୍ଟନାୟକ ପ୍ରଥମେ ସେହି ହିଂସାକାଣ୍ଡକୁ ନିନ୍ଦା କରିବା ଦରକାର ଥିଲା, ଯାହା ସେ କରିନାହାନ୍ତି।
ବିଜେଡିର କିଛି ନେତା କହୁଛନ୍ତି ଯେ “ଆମେ ସି.ଜେ.ପି.କୁ ସମର୍ଥନ କରୁନୁ, ଆନ୍ଦୋଳନକୁ ସମର୍ଥନ କରୁଛୁ।” ଏହା ‘ଚଟୁ ଆମିଷ, ବେଣ୍ଟ ନିରାମିଷ’ ଭଳି ଦୋମୁହାଁ ନୀତି ଅଟେ। ଏଥିରୁ ସ୍ପଷ୍ଟ ପ୍ରମାଣିତ ହେଉଛି ଯେ ବିଜେଡି ନେତାମାନଙ୍କର ସମ୍ପୂର୍ଣ୍ଣ ମତିଭ୍ରମ ଘଟିଛି।
ନିଟ୍ ପରୀକ୍ଷାରେ ପ୍ରଶ୍ନପତ୍ର ଲିକ୍ ଅଭିଯୋଗ ନଜରକୁ ଆସିବା କ୍ଷଣି କେନ୍ଦ୍ର ସରକାର ଓ ଶିକ୍ଷା ମନ୍ତ୍ରଣାଳୟ ତୁରନ୍ତ ଦୃଢ଼ ଓ ସଂଶୋଧନାତ୍ମକ ପଦକ୍ଷେପ ଗ୍ରହଣ କଲେ। ପ୍ରତ୍ୟେକ ରାଜ୍ୟ ସରକାର ଏବଂ ପ୍ରତିରକ୍ଷା ବିଭାଗର ସହଯୋଗରେ ବିମାନ ଯୋଗେ ପ୍ରଶ୍ନପତ୍ର ପଠାଯାଇ ନିର୍ଦ୍ଦିଷ୍ଟ ସମୟସୀମା ମଧ୍ୟରେ ପୁନଃପରୀକ୍ଷା ସଫଳତାର ସହ ପରିଚାଳିତ ହେଲା। ନିର୍ଦ୍ଦିଷ୍ଟ ସମୟ ମଧ୍ୟରେ ଖାତା ଦେଖା ଶେଷ ହୋଇ ରେଜଲ୍ଟ ମଧ୍ୟ ପ୍ରକାଶ ପାଇଲା। ପୂର୍ବର ୟୁପିଏ ସରକାର ଅମଳରେ ବହୁବାର ପ୍ରଶ୍ନପତ୍ର ଲିକ୍ ହୋଇଥିଲା, କିନ୍ତୁ କେନ୍ଦ୍ରର ମୋଦୀ ସରକାର ଛାତ୍ରଛାତ୍ରୀଙ୍କ ଭବିଷ୍ୟତ ପ୍ରତି ସମ୍ପୂର୍ଣ୍ଣ ସମ୍ବେଦନଶୀଳ ।
ସମଗ୍ର ଦେଶରେ କମ୍ୟୁନିଷ୍ଟମାନେ ନିଜର ଜନାଦେଶ ହରାଇସାରିଛନ୍ତି । ଓଡ଼ିଶାରେ ମଧ୍ୟ ବିଜେଡି ଖୁବ୍ ଦ୍ରୁତଗତିରେ ନିଜର ଜନାଦେଶ ହରାଉଛି । କୌଣସି ପ୍ରକୃତ ପ୍ରସଙ୍ଗ ନଥିବାରୁ ‘ଔଷଧ ରାଗରେ ତାଟିଆ କାମୁଡ଼ିଲା’ ଭଳି ଏକ ଅଣ-ପ୍ରସଙ୍ଗକୁ ନେଇ ସେମାନେ ରାଜନୀତି କରୁଛନ୍ତି। ମାନ୍ୟବର ପ୍ରଧାନମନ୍ତ୍ରୀଙ୍କ କହିବା ଅନୁଯାୟୀ, ଛାତ୍ରଛାତ୍ରୀଙ୍କ ଭବିଷ୍ୟତ ସହ ରାଜନୀତି କରାଯିବା ଉଚିତ ନୁହେଁ, କାରଣ ଦେଶର ପ୍ରଗତି ଓ ବିକାଶ ସେମାନଙ୍କ ଭବିଷ୍ୟତ ଉପରେ ନିର୍ଭର କରେ। ଭାରତୀୟ ଜନତା ପାର୍ଟି ସଂସଦର ଗୃହ ଭିତରେ ଓ ବାହାରେ ନିଟ୍ ଏବଂ ଜାତୀୟ ସ୍ତରର ପରୀକ୍ଷା ପରିଚାଳନାରେ ସୁଧାର ଆଣିବା ପାଇଁ ଗଠନମୂଳକ ଆଲୋଚନା ଚାହୁଁଛି । ବିଜେଡି ଓ ଅନ୍ୟ ବିରୋଧୀ ଦଳଗୁଡ଼ିକ ଗୃହ କାର୍ଯ୍ୟ ପରିଚାଳନାରେ ସହଯୋଗ କରନ୍ତୁ । ବିଶେଷ କରି ରାଜ୍ୟସଭାରେ ଥିବା ବିଜେଡି ସାଂସଦମାନେ ଗୃହ ଚାଲିବାରେ ସହଯୋଗ କରନ୍ତୁ ବୋଲି ଶ୍ରୀ ମହତାବ ଆହ୍ୱାନ ଦେଇଛନ୍ତି ।
ଏହି ସାମ୍ବାଦିକ ସମ୍ମିଳନୀରେ ସାଂସଦ ସଙ୍ଗୀତା ସିଂହଦେଓ, ଅନିତା ପ୍ରିୟଦର୍ଶିନୀ, ମାଳବିକା ଦେବୀ, ରୁଦ୍ର ନାରାୟଣ ପାଣି, ପ୍ରଦୀପ ପୁରୋହିତ, ଅନନ୍ତ ନାଏକ, ଅଭିମନ୍ୟୁ ସେଠୀ, ରବି ନାରାୟଣ ବେହେରା, ବଳଭଦ୍ର ମାଝୀ, ସୁକାନ୍ତ ପାଣିଗ୍ରାହୀ, ବିଭୂ ପ୍ରସାଦ ତରାଇ, ଉପସ୍ଥିତ ଥିଲେ ।
