ପୁଣି ଗର୍ଜିଲେ ଶ୍ରୀମୟୀ, ଜେଡିକୁ ପୁଣି ଟାର୍ଗେଟ

ଭୁବନେଶ୍ୱର: ବିଜୁବାବୁଙ୍କ ଶ୍ରାଦ୍ଧ ଦିବସରରେ ବିଜେଡିକୁ ପୁଣି ଟାର୍ଗେଟ କଲେ ବରିଷ୍ଠ ନେତ୍ରୀ ଶ୍ରୀମୟୀ ମିଶ୍ର। ବିଜୁ ଜନତା ଦଳରେ ମହିଳାଙ୍କୁ ଅଣଦେଖା କରାଯାଉଥିବା ଅଭିଯୋଗ କରି ତୀବ୍ର ସମାଲୋଚନା କରିଛନ୍ତି ଶ୍ରୀମୟୀ। ସାମାଜିକ ଗଣମାଧ୍ୟମରେ ଏକ ବାର୍ତ୍ତା ପୋଷ୍ଟ କରି ସମାଲୋଚନା କରିଛନ୍ତି ଶ୍ରୀମୟୀ ମିଶ୍ର। ସେ ଲେଖିଛନ୍ତି, ବିଜୁଙ୍କ ନୀତି ଓ ଆଦର୍ଶରେ ଚାଲିଥିବା ମହିଳାଙ୍କୁ ହୋଇଛି ଅଣଦେଖା। ବିଜେଡିରେ ଜଣେ ବି ମହିଳା ଦଳର ସଭାପତି ପାଇଁ ଯୋଗ୍ୟ ହେଲେନି କି ବୋଲି ସେ ପ୍ରଶ୍ନ କରିଛନ୍ତି। ରାଜ୍ୟର ମୁଖିଆ କି ସାଂଗଠନିକ ସମ୍ପାଦକ ହୋଇପାରିଲେ ନାହିଁ। କିଛି ମହିଳା ଅନେକ ଥର ବିଧାନସଭାକୁ ନିର୍ବାଚିତ ହୋଇ ଆସିଛନ୍ତି। ହେଲେ ମୁଖିଆଙ୍କ ନଜରରେ ସେମାନେ ମୁଖିଆ ହେବାର ବୋଧେ ଯୋଗ୍ୟ ନ ଥିଲେ। ୨୪ ବର୍ଷ ଶାସନରେ କେହି ଜଣେ ମହିଳା ମୁଖିଆ ହେବାକୁ ମିଳିଲେ ନାହିଁ ନା ସେ ଦଳର ମୁଖିଆ କାହାକୁ କରେଇ ଦେଲେ ନାହିଁ। ବିଜୁ ଜନତା ଦଳ କେବଳ କଥାରେ ଧୁରନ୍ଧର ବୋଲି କହିଛନ୍ତି ଶ୍ରୀମୟୀ ମିଶ୍ର। ମହିଳାଙ୍କୁ ନିଜ ଦଳ ଓ ସରକାରରେ ସର୍ବୋଚ୍ଚ ପଦ ଦେବାକୁ ସାହାସ ନାହିଁ। ବିଜୁ ଫାଉଣ୍ଡେସନରେ ମଧ୍ୟ କେହି ଜଣେ ମହିଳା ଟ୍ରଷ୍ଟି ନାହାଁନ୍ତି ବୋଲି କହିଛନ୍ତି ଶ୍ରୀମୟୀ।
୨୦୨୫ ମସିହାରେ ଦଳବିରୋଧୀ କାର୍ୟ୍ୟକଳାପ ଅଭିଯୋଗରେ ବିଜେଡି ଶ୍ରୀମୟୀଙ୍କୁ ନିଲମ୍ବିତ କରିଥିଲା। ନିଲମ୍ବନ ପରେ ସେ ଦଳର ନେତୃତ୍ୱ ବିଶେଷ କରି ନବୀନ ପଟ୍ଟନାୟକ ଓ ଭି.କେ. ପାଣ୍ଡିଆନଙ୍କୁ ନିଶାନା କରି ବିଭିନ୍ନ ପୋଷ୍ଟ ଓ ବୟାନ ଦେଇଛନ୍ତି। ଏହାକୁ ନେଇ ସେ ସବୁବେଳେ ଗଣମାଧ୍ୟମରେ ଚର୍ଚ୍ଚାରେ ରହି ଆସିଛନ୍ତି।