ବଙ୍ଗ ନିର୍ବାଚନ ହାରିଲେ ‘ଦିଦି’; ଜଗୁନୀ କହିଲେ କାରଣ

ପୁରୀ: ପଶ୍ଚିମବଙ୍ଗ ବିଧାନସଭା ନିର୍ବାଚନରେ ବିଜେପି ବିପୁଳ ବିଜୟ ହାସଲ କରିଛି । ୨୦୦ରୁ ଅଧିକ ବିଧାନସଭା ଆସନରେ ଜିତି ବିଜେପି ବହୁମତ ହାସଲ କରିଛି । ତେବେ ପଶ୍ଚିମବଙ୍ଗ ବିଧାନସଭା ନିର୍ବାଚନରେ ମମତା ବାନାର୍ଜୀ ହାରିବା ପଛରେ ଦିଘା ଜଗନ୍ନାଥ ମନ୍ଦିର ନିର୍ମାଣ ପ୍ରସଙ୍ଗ ରହିଥିବା ଚର୍ଚ୍ଚା ଜୋର ଧରିଛି ।ଦିଘା ଜଗନ୍ନାଥ ମନ୍ଦିରରେ ପଥର ମୂର୍ତ୍ତି ନିର୍ମାଣକୁ ମଧ୍ୟ ବିରୋଧ କରିଥିଲେ ମହାପ୍ରଭୁ ଶ୍ରୀଜଗନ୍ନାଥଙ୍କ ବାଡଗ୍ରାହୀ ଜଗନ୍ନାଥ ସ୍ୱାଇଁ ମହାପାତ୍ର । ପଥର ମୂର୍ତ୍ତି ନିର୍ମାଣ ହେଲେ ମମତାଙ୍କ ପାଇଁ ଆଗାମୀ ଦିନରେ ଅଘଟଣ ଘଟିବ ବୋଲି ସେ ଚେତାବନୀ ଦେଇଥିଲେ । ୨୦୨୬ ପଶ୍ଚିମବଙ୍ଗ ବିଧାନସଭା ନିର୍ବାଚନରେ ମମତାଙ୍କ ଟିଏମସି ଶୋଚନୀୟ ପରାଜୟ ବରଣ କରିଛି । ଯାହାକୁ ନେଇ ଏବେ ବିଭିନ୍ନ ଚର୍ଚ୍ଚା ଲାଗି ରହିଛି । ବିଶେଷ କରି ମହାପ୍ରଭୁଙ୍କ ପ୍ରତି ଅପମାନ ଓ ଅହଙ୍କାର ଯୋଗୁଁ ମମତା ନିର୍ବାଚନରେ ହାରିଥିବା ସବୁଆଡ଼େ ଚର୍ଚ୍ଚା ହେଉଛି । ଏନେଇ ପ୍ରତିକ୍ରିୟା ରଖିଛନ୍ତି ଶ୍ରୀ ଜଗନ୍ନାଥଙ୍କ ବାଡଗ୍ରାହୀ ଜଗନ୍ନାଥ ସ୍ୱାଇଁ ମହାପାତ୍ର ।

ଜଗନ୍ନାଥ ସ୍ୱାଇଁ ମହାପାତ୍ର କହିଛନ୍ତି, “ଚଳିତ ନିର୍ବାଚନରେ ପଶ୍ଚିମବଙ୍ଗରେ ଯେଉଁ ସରକାର ପରିବର୍ତ୍ତନ ହୋଇଛି, ତାହା ମହାପ୍ରଭୁଙ୍କ ପାଇଁ ହୋଇଛି । ଦିଘାରେ ଯେଉଁ ଜଗନ୍ନାଥ ମନ୍ଦିର ହୋଇଥିଲା ଏହା ତାହାର ପ୍ରଭାବ । ଦିଘାରେ ଯେତେବେଳେ ମମତା ବାନାର୍ଜୀ ଜଗନ୍ନାଥ ମନ୍ଦିର ନିର୍ମାଣ କରିଥିଲେ, ସେତେବେଳେ ମୁଁ ତାଙ୍କୁ କହିଥିଲି ଯେ, ମନ୍ଦିରରେ ପଥର ମୂର୍ତ୍ତି କରନ୍ତୁ ନାହିଁ । ସେ କିନ୍ତୁ ମୋ କଥାକୁ ଗୁରୁତ୍ଵ ଦେଲେନାହିଁ । ପଥର ମୂର୍ତ୍ତି ହେଲେ ଅଘଟଣ ଘଟିପାରେ ବୋଲି ମୁଁ ମମତାଙ୍କୁ କହିଥିଲି । ତାଙ୍କ ସହ ମୋର ବ୍ୟକ୍ତିଗତ ସମ୍ପର୍କ ବହୁତ ଭଲ । ଚତୁର୍ଦ୍ଧାମୂର୍ତ୍ତି ପଥରରେ ନିର୍ମାଣ ହେଲେ ଯଦି କିଛି ବିଘ୍ନ ଘଟେ କିମ୍ବା ଭାଙ୍ଗିଯାଏ, ତେବେ ଅଶୁଭ ହେବାର ଆଶଙ୍କା ରହିଛି । ହେଲେ ମୋ କଥାକୁ ମମତା ଗୁରୁତ୍ଵ ନଦେଇ ପଥରରେ ମୂର୍ତ୍ତି ନିର୍ମାଣ କରିଥିଲେ ।”

ସେ ପୁଣି କହିଛନ୍ତି, “ମମତା ବାନାର୍ଜୀ ଜଣେ ବହୁତ ଭଲ ଲୋକ । କିନ୍ତୁ ତାଙ୍କ ଚାରିପାଖରେ କିଛି କୁଚକ୍ରୀ ଥିଲେ । ଯେଉଁମାନେ ତାଙ୍କୁ ଭୁଲ ମାର୍ଗରେ ନେଉଥିଲେ । ଅହଙ୍କାର ମଣିଷକୁ ପତନ କରାଇଥାଏ । ମୋ କଥାକୁ ସେ ଗୁରୁତ୍ଵ ନଦେଇ ଦିଘା ଜଗନ୍ନାଥ ମନ୍ଦିରରେ ପଥର ମୂର୍ତ୍ତି ନିର୍ମାଣ କଲେ । ଯାହା ଫଳରେ ତାଙ୍କ ସହ ଆଜି ନିର୍ବାଚନରେ ଏହି ଦଶା ଘଟିଛି । ରଥଯାତ୍ରାରେ ବଙ୍ଗାଳି ଲୋକମାନେ ପୁରୀ ନଯିବାକୁ ସେ ଲୋକଙ୍କୁ କହିଲେ । ଏହାକୁ ଲୋକମାନେ ଗ୍ରହଣ କଲେନାହିଁ । ପ୍ରଭୁ ଜଗନ୍ନାଥ କାହାର ଅହଙ୍କାର ସହ୍ୟ କରନ୍ତି ନାହିଁ । ଯାହା ଫଳରେ ଆଜି ତାଙ୍କର ପତନ ହୋଇଛି । ମୁଁ ପୂର୍ବରୁ ଏନେଇ ଯାହା କହିଥିଲି ତାହା ହିଁ ହେଲା । ”

ପଶ୍ଚିମବଙ୍ଗରେ ବିଜେପିର ନେତୃତ୍ବ ନେଉଥିବା ଶୁଭେନ୍ଦୁ ଅଧିକାରୀଙ୍କୁ ନେଇ ଜଗନ୍ନାଥ ସ୍ୱାଇଁ ମହାପାତ୍ର କହିଛନ୍ତି ଯେ, ଶୁଭେନ୍ଦୁ ଅଧିକାରୀ ଜଣେ ସଚ୍ଚୋଟ ନେତା । ତାଙ୍କୁ ଟିଏମସିରେ ଉପଯୁକ୍ତ ସମ୍ମାନ ମିଳିଲା ନାହିଁ । କିଛି କୁଚକ୍ରୀଙ୍କ ଯୋଗୁଁ ସେ ଟିଏମସି ପରିତ୍ୟାଗ କରି ବିଜେପିରେ ଯୋଗଦେଲେ । ବିଜେପି ଏହାର ବହୁତ ଫାଇଦା ଉଠାଇ ପାରିଲା । ଶୁଭେନ୍ଦୁ ଜଣେ ସଚ୍ଚୋଟ ଏବଂ ପରିଶ୍ରମୀ ନେତା । ତାଙ୍କ ଅକ୍ଲାନ୍ତ ପରିଶ୍ରମ ଯୋଗୁଁ ଆଜି ବିଜେପି ପଶ୍ଚିମବଙ୍ଗ ଦଖଲ କରିବାରେ ସକ୍ଷମ ହୋଇଛି । ଶୁଭେନ୍ଦୁଙ୍କ ଭଳି ଅନେକ ଭଲ ସଚ୍ଚୋଟ ନେତା ଟିଏମସିରୁ ବାହାରି ଯିବାରୁ ଆଜି ଟିଏମସିର ଏହି ଅବସ୍ଥା ହୋଇଛି ।

” ମୁଁ ଶୁଭେନ୍ଦୁ ଅଧିକାରୀଙ୍କୁ ଅଭିନନ୍ଦନ ଜଣାଉଛି । ତାଙ୍କର ଅକ୍ଲାନ୍ତ ପରିଶ୍ରମ ଯୋଗୁଁ ଆଜି ବିଜେପି ବିପୁଳ ବିଜୟ ହାସଲ କରିଛି । ମୁଁ ଚାହୁଁଛି ବେଙ୍ଗଲର ଉନ୍ନତି ହେଉ । ଓଡ଼ିଶା ସହ ଭଲ ସମ୍ପର୍କ ରହୁ । ମହାପ୍ରଭୁ ହେଉଛନ୍ତି ଜଗତ ଠାକୁର । ତାଙ୍କୁ ଆମେ କାଠ ମୂର୍ତ୍ତି ବୋଲି ଭାବିବା ଅନୁଚିତ । ମହାପ୍ରଭୁଙ୍କ ବିଧି ପରମ୍ପରାକୁ ଯିଏ ଅପମାନ କରିଛି ତାହାର ନିଶ୍ଚିତ ପତନ ହୋଇଛି” ବୋଲି ମହାପ୍ରଭୁଙ୍କ ବାଡ଼ଗ୍ରାହୀ ଜଗନ୍ନାଥ ସ୍ୱାଇଁ ମହାପାତ୍ର କହିଛନ୍ତି ।