ମନ୍‌ କି ବାତ୍‌ରେ ଏମିତି କହିଲେ ପ୍ରଧାନମନ୍ତ୍ରୀ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମାସିକ ରେଡିଓ କାର୍ୟ୍ୟକ୍ରମ ‘ମନ୍‌ କି ବାତ୍‌’ର ୧୨୫ତମ ଏସିସୋଡରେ ସମ୍ବୋଧନ କରିଛନ୍ତି । ଏହି ଅବସରରେ ସେ ଓଡ଼ିଶା ଝିଅ ରଶ୍ମିତା ସାହୁଙ୍କ ସହ କଥା ହେବା ସହିତ ସ୍ୱଦେଶୀ ଉତ୍ପାଦ ଉପଯୋଗ କରିବାକୁ ଅପିଲ୍ କରିଛନ୍ତି । ଏହା ସହିତ ଭୂସ୍ୱର୍ଗରୁ ନେଇ ଦେବଭୂମିରେ ହୋଇଥିବା ପ୍ରାକୃତିକ ବିପର୍ୟ୍ୟୟକୁ ନେଇ ଦୁଃଖ ପ୍ରକାଶ କରି ପୀଡ଼ିତଙ୍କ ଦୁଃଖ ଆମର ଦୁଃଖ ବୋଲି କହିଛନ୍ତି ପ୍ରଧାନମନ୍ତ୍ରୀ ।
‘ଦୁଃଖ ଦେଇଛି ପ୍ରାକୃତିକ ବିପର୍ୟ୍ୟୟ’- ପ୍ରଧାନମନ୍ତ୍ରୀ ମୋଦୀ କହିଛନ୍ତି,” ଏହି ମୌସୁମୀ ଋତୁରେ, ପ୍ରାକୃତିକ ବିପର୍ୟ୍ୟୟ ଦେଶକୁ ପରୀକ୍ଷା କରୁଛି । ଗତ କିଛି ସପ୍ତାହ ମଧ୍ୟରେ, ଆମେ ବନ୍ୟା ଏବଂ ଭୂସ୍ଖଳନର କ୍ଷୟକ୍ଷତି ଦେଖିଛୁ । କେଉଁଠି ଘର ନଷ୍ଟ ହୋଇଯାଇଛି, କେଉଁଠି କ୍ଷେତ ବୁଡ଼ି ଯାଇଛି । ଫସଲ ନଷ୍ଟ ହୋଇଛି । କେଉଁଠି ପାଣିର ଦ୍ରୁତ ପ୍ରବାହରେ ପୋଲ୍ ଭାସି ଯାଇଛି, ରାସ୍ତାଘାଟ ବୁଡ଼ିଛି । ଲୋକଙ୍କ ଜୀବନ ବିପଦରେ ଫସିଛି । ଏହି ଘଟଣାଗୁଡ଼ିକ ପ୍ରତ୍ୟେକ ଭାରତୀୟଙ୍କୁ ଦୁଃଖ ଦେଇଛି । ନିଜ ପ୍ରିୟଜନଙ୍କୁ ହରାଇଥିବା ପରିବାରର ଯନ୍ତ୍ରଣା ଆମ ସମସ୍ତଙ୍କର ଯନ୍ତ୍ରଣା । ପୀଡ଼ିତଙ୍କୁ ଦୁଃଖ ଆମର ଦୁଃଖ ।”

୧୨୫ତମ ମନ୍‌ କି ବାତ୍‌ରେ ଓଡ଼ିଆ ଝିଅ ରଶ୍ମିତା ସାହୁଙ୍କ ସହ କଥା ହୋଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଶ୍ରୀନଗରରେ ଆୟୋଜିତ ୱାଟର ସ୍ପୋର୍ଟସରେ ଭାଗ ନେଇଥିବା ରଶ୍ମିତାଙ୍କୁ ପ୍ରଶଂସା କରିଛନ୍ତି ପ୍ରଧାନମନ୍ତ୍ରୀ । ନୌଚାଳନାରେ ଭାଗ ନେଇଥିବା ରଶ୍ମିତାଙ୍କୁ ୨ଟି ସ୍ବର୍ଣ୍ଣ ପଦକ ପାଇଁ ଶୁଭେଚ୍ଛା ଜଣାଇଛନ୍ତି । କିପରି କ୍ରୀଡ଼ା ଜୀବନ ଆରମ୍ଭ କଲେ, କ’ଣ ସଂଘର୍ଷ ଥିଲା ପଚାରି ବୁଝିଲେ ପିଏମ୍‌ । ସଂଘର୍ଷ ସତ୍ତ୍ବେ ଖେଳକୁ ନ ଛାଡ଼ି ଜାରି ରଖିବାକୁ ପରାମର୍ଶ ଦେଇଛନ୍ତି ପ୍ରଧାନମନ୍ତ୍ରୀ । ୱାଟର ସ୍ପୋର୍ଟସକୁ ଅଧିକ ଲୋକପ୍ରିୟ କରିବାକୁ ଆହ୍ୱାନ ଦେଇଛନ୍ତି । ଜାତୀୟ ଚାମ୍ପିଅନସିପ ଓ ଜାତୀୟ କ୍ରାଡାରେ ରଶ୍ମିତା ୧୩ ସ୍ୱର୍ଣ୍ଣ ପଦକ ସହିତ ୪୧ଟି ପଦକ ଜିତିଛନ୍ତି ।
ମନ୍‌ କି ବାଦରେ ପ୍ରଧାନମନ୍ତ୍ରୀ କହିଛନ୍ତି ବନ୍ୟା ଏବଂ ବର୍ଷାର ଏହି କ୍ଷୟକ୍ଷତି ମଧ୍ୟରେ, ଜମ୍ମୁ ଏବଂ କାଶ୍ମୀର ମଧ୍ୟ ଦୁଇଟି ବିଶେଷ ସଫଳତା ହାସଲ କରିଛି । ଜମ୍ମୁ ଏବଂ କାଶ୍ମୀର ପୁଲୱାମାର ଏକ ଷ୍ଟାଡିୟମରେ ରେକର୍ଡ ସଂଖ୍ୟକ ଲୋକ ଏକାଠି ହୋଇଥିଲେ । ପୁଲୱାମାର ପ୍ରଥମ ଦିବାରାତ୍ର କ୍ରିକେଟ୍ ମ୍ୟାଚ୍ ଖେଳାଯାଇଥିଲା। ପୂର୍ବରୁ ଏହା ଅସମ୍ଭବ ଥିଲା, କିନ୍ତୁ ଏବେ ମୋ ଦେଶ ବଦଳୁଛି । ଏହି ମ୍ୟାଚ୍ ‘ରୟାଲ୍ ପ୍ରିମିୟର ଲିଗ୍’ର ଏକ ଅଂଶ, ଯେଉଁଥିରେ ଜମ୍ମୁ ଏବଂ କାଶ୍ମୀରର ବିଭିନ୍ନ ଦଳ ଖେଳୁଛନ୍ତି । ଦ୍ୱିତୀୟ ସଫଳତାଟି ହେଉଛି ଦେଶର ପ୍ରଥମ ‘ଖେଲୋ ଇଣ୍ଡିଆ ଜଳ କ୍ରୀଡ଼ା ମହୋତ୍ସବ’ ଶ୍ରୀନଗରର ଡାଲ୍ ହ୍ରଦରେ ହୋଇଥିଲା । ଏପରି ଏକ ଉତ୍ସବ ଆୟୋଜନ କରିବା ପାଇଁ ଏକ ବିଶେଷ ସ୍ଥାନ । ଏହାର ଉଦ୍ଦେଶ୍ୟ ହେଉଛି ଜମ୍ମୁ ଏବଂ କାଶ୍ମୀରରେ ଜଳ କ୍ରୀଡ଼ାକୁ ଅଧିକ ଲୋକପ୍ରିୟ କରିବା ଏବଂ ସାରା ଭାରତରୁ ୮୦୦ରୁ ଅଧିକ ଖେଳାଳି ଅଂଶଗ୍ରହଣ କରିଥିଲେ ।